വംശനാശം നേരിടുന്ന മൃഗങ്ങളുടെ കടത്ത്​: ഷാർജയിൽ അറബ്​ പൗരൻ അറസ്റ്റിൽ

ഷാർജ: വംശനാശ ഭീഷണി നേരിടുന്ന, സംരക്ഷിത വിഭാഗങ്ങളിൽപെടുന്ന വന്യ മൃഗങ്ങളെ നിയമവിരുദ്ധമായി കടത്തിയ കേസിൽ ഷാർജയിൽ അറബ്​ പൗരൻ അറസ്റ്റിൽ. വിവിധ അതോറിറ്റികൾ ഒരുമിച്ച്​ നടത്തിയ നീക്കത്തിലാണ്​ അപൂർവയിനം കൊക്കുകൾ, കുറുക്കൻ തുടങ്ങിയ മൃഗങ്ങളെ രഹസ്യമായി സൂക്ഷിച്ചുപോന്ന അറബ്​ പൗരനെ പിടികൂടിയതെന്ന്​ ഷാർജ പൊലീസ്​ അറിയിച്ചു.

പിടികൂടിയ മൃഗങ്ങളെ ഷാർജ പരിസ്ഥിതി സംരക്ഷണ അതോറിറ്റി, കാലാവസ്ഥ വ്യതിയാന-പരിസ്ഥിതി മന്ത്രാലയം എന്നിവയുടെ സഹകരണത്തിലൂടെ എമിറേറ്റിലെ പ്രകൃതിസംരക്ഷണ കേന്ദ്രത്തിന്​ കൈമാറി. പ്രതിയെ നിയമനടപടികൾക്കായി പബ്ലിക്​ പ്രോസിക്യൂഷനും കൈമാറിയിട്ടുണ്ട്​. ഡയറക്ടറേറ്റ് ഓഫ് ഇൻവെസ്റ്റിഗേഷൻസ് ആൻഡ് ക്രിമിനൽ ഇൻവെസ്റ്റിഗേഷൻസ് പ്രതിനിധീകരിക്കുന്ന ഷാർജ പൊലീസാണ് മുഴുവൻ നീക്കങ്ങളും നടത്തിയത്.

ജനറൽ ഡയറക്ടറേറ്റ്​ ഓഫ്​ ഫെഡറൽ ക്രിമിനൽ പൊലീസ്​, എൻവയോൺമെന്‍റ്​ ആൻഡ്​ നേച്വർ റിസർവ്​സ്​ അതോറിറ്റി എന്നിവയുടെ സഹകരണവും നീക്കത്തിലുണ്ടായിരുന്നു. സംരക്ഷണ പട്ടികയിലുള്ള മൃഗങ്ങളെ കടത്തുന്നതും സൂക്ഷിക്കുന്നതുമായി ബന്ധപ്പെട്ട്​ സംശകരമായ പ്രവൃത്തികൾ ശ്രദ്ധയിൽ​പ്പെട്ടാൽ ഉടൻ റിപോർട്ട്​ ചെയ്യണമെന്നും പൊലീസ്​ ജനങ്ങളോട്​ അഭ്യർഥിച്ചു.

വംശനാശ ഭീഷണി നേരിടുന്ന മൃഗങ്ങളെ കടത്തുന്നതും വിൽപന നടത്തുന്നതുമായി കേസുകളിൽ യു.എ.ഇ അതോറിറ്റികൾ ശക്​തമായ നടപടിയാണ്​ സ്വീകരിച്ചുവരുന്നത്​. കഴിഞ്ഞ ഒക്​ടോബറിൽ ഫാൽക്കണെ വേട്ടയാടിയ കേസിൽ അബൂബദിയിൽ അഞ്ച്​ പേർ അറസ്റ്റിലായിരുന്നു. വടക്കൻ ഖത്തമിലെ മരുഭൂമിയിൽവെച്ചാണ്​ ഇവരെ കയ്യോടെ പിടികൂടിയത്​.

മെയിൽ ഫുജൈറയിലും റസിഡൻഷ്യൽ മേഖലയിൽ ഉപേക്ഷിക്കപ്പെട്ട കാട്ടുപൂച്ചയെ പിടികൂടിയിരുന്നു. യു.എ.ഇ നിയമപ്രകാരം രജിസ്​ട്രേഷനില്ലാതെ വംശനാശ ഭീഷണ നേരിടുന്ന മൃഗങ്ങളെ കൈവശം വെക്കുന്നതും വിൽപന നടത്തുന്നതും 10,000 മുതൽ അഞ്ച്​ ലക്ഷം ദിർഹം വരെ പിഴ ലഭിക്കാവുന്ന കുറ്റമാണ്​.