വൈ ഇന്റർനാഷനലിന് ജി.ബി.സി.സി ബിസിനസ് അവാർഡ്
text_fieldsദോഹ: ലുലു ഗ്രൂപ്പിന്റെ ബ്രിട്ടൻ ആസ്ഥാനമായ ബിർമിങ്ഹാമിലെ വൈ ഇന്റർനാഷനൽ (യു.കെ) കയറ്റുമതി കേന്ദ്രത്തിന് അന്താരാഷ്ട്ര അംഗീകാരം. ഗ്രേറ്റർ ബിർമിങ്ഹാം ചേംബർ ഓഫ് കോമേഴ്സിന്റെ ഇന്റർനാഷനൽ ബിസിനസ് എക്സലൻസ് അവാർഡാണ് രണ്ടാം തവണയും തേടിയെത്തിയത്. ബിർമിങ്ഹാമിൽ നടന്ന ചടങ്ങിൽ ലുലു ഗ്രൂപ് ഡയറക്ടർ ഡോ. മുഹമ്മദ് അൽതാഫ്, വൈ ഇന്റർനാഷനൽ യു.കെ-ഇറ്റലി ജനറൽ മാനേജർ ഫഹീം, മുതിർന്ന ഉദ്യോഗസ്ഥർ എന്നിവർ ഏറ്റുവാങ്ങി.
സ്മാർട്ട് മാനുഫാക്ചറിങ്, ഡിസ്ട്രിബ്യൂഷൻ മേഖലയിൽ വർഷങ്ങളായി പ്രവർത്തിക്കുന്ന വൈ ഇന്റർനാഷനലിനുള്ള അംഗീകാരമായാണ് മുൻനിര പുരസ്കാരം തേടിയെത്തിയത്. നവീന സാങ്കേതിക വിദ്യകളുടെ ഉപയോഗം, ഗവേഷണം, ഗുണനിലവാരം, ഉപഭോക്തൃ സേവനം തുടങ്ങിയവയിൽ മികച്ചുനിൽക്കുന്ന വൈ ഇന്റർനാഷനൽ നിരവധി പുരസ്കാരങ്ങൾ സ്വന്തമാക്കിയിരുന്നു.
2017ൽ ഇന്റർനാഷനൽ ട്രേഡ് ക്വീൻസ് അവാർഡ് നേടിയിരുന്നു. അന്താരാഷ്ട്ര തലത്തിലെ വ്യാപാര മികവിനുള്ള ബ്രിട്ടന്റെ ഏറ്റവും സമുന്നത അംഗീകാരം കൂടിയാണ് ക്വീൻസ് അവാർഡ്. ഗ്രേറ്റർ ബിർമിങ്ഹാം ചേംബേഴ്സ് ഓഫ് കോമേഴ്സ് രണ്ടാം തവണയും പുരസ്കാരത്തിന് തിരഞ്ഞെടുത്തത് അഭിമാനകരമാണെന്ന് ഡോ. മുഹമ്മദ് അൽതാഫ് പറഞ്ഞു.
‘‘വിവിധ മേഖലകളിലെ നവീകരണം മുതൽ ഉപഭോക്തൃ സേവനം വരെയുള്ള എല്ലാ മേഖലകളിലെയും മികവാർന്ന പ്രകടനം ഞങ്ങളുടെ വിജയത്തിൽ നിർണായകമായിട്ടുണ്ട്. ഈ അംഗീകാരത്തിനും അവരുടെ നിരന്തരമായ പിന്തുണക്കും ചേംബറിനോട് നന്ദി പറയുന്നു’’ -ഡോ. മുഹമ്മദ് അൽതാഫ് പറഞ്ഞു.
വൈ ഇന്റർനാഷനൽ, ലുലു ഗ്രൂപ് എന്നിവയിലെ ടീമിന്റെ പ്രതിബദ്ധതക്കും പ്രവർത്തനമികവിനുമുള്ള അംഗീകാരമാണ് ഈ അവാർഡെന്ന് ഫഹീം പറഞ്ഞു. അന്താരാഷ്ട്ര വ്യാപാര രംഗത്ത് കൂടുതൽ നേട്ടങ്ങളിലേക്ക് ഉയരാൻ കരുത്തേകുമെന്നും അദ്ദേഹം പറഞ്ഞു.
ബ്രിട്ടന്റെ വിവിധ ഭാഗങ്ങളിൽനിന്ന് മികച്ച ഗുണനിലവാരമുള്ള ഉൽപന്നങ്ങൾ മിഡിൽ ഈസ്റ്റിലെ ഹൈപ്പർമാർക്കറ്റുകളിൽ എത്തിക്കുക എന്ന ലക്ഷ്യവുമായി 2013ലാണ് വൈ ഇന്റർനാഷനൽ പ്രവർത്തനം ബ്രിട്ടനിൽ ആരംഭിച്ചത്.
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.