തിരികെ ആശ്വാസത്തോടെ

ദോഹ: ആശങ്കകൾക്കും ആശ്വാസങ്ങൾക്കും മധ്യേ ​ഇന്ത്യയിൽനിന്നുൾപ്പെടെയുള്ള യാത്രക്കാർ ദോഹയിൽ എത്തിത്തുടങ്ങി. കോവിഡ്​ നിയന്ത്രണങ്ങളിൽ ഇളവു വരുത്തികൊണ്ടുള്ള പുതിയ നയം പ്രാബല്ല്യത്തിൽ വന്ന ആദ്യ ദിനം എന്ന നിലയിൽ ആശങ്കയിലായിരുന്ന പ്രവാസ സമൂഹം. നാട്ടിൽനിന്ന്​ ഖത്തറിലേക്ക്​ പുറപ്പെടാനായി കോഴിക്കോട്​, കണ്ണൂർ വിമാനത്താവളങ്ങളിലെത്തിയവരിൽ പലർക്കും ഇഹ്​തിറാസ്​ പ്രീ രജിസ്​ട്രേഷൻ ​കൃത്യമായി ചെയ്യാൻ കഴിയാത്തതിനാൽ പ്രയാസം നേരിട്ടു.

​ദോഹയിലെത്തുന്നതിന്​ 12 മണിക്കൂർ മു​െമ്പങ്കിലും ​രജിസ്​റ്റർ ചെയ്യണം എന്ന നിർദേശമുണ്ടായെങ്കിലും പല യാത്രക്കാരും ഇതൊന്നുമില്ലാതെയാണ്​ വിമാനത്താവളങ്ങളിലെത്തിയത്​. ക്വാറൻറീൻ വേണ്ടാത്തവർ രണ്ട്​ ഡോസ്​ കോവിഡ്​ വാക്​സിൻ സ്വീകരിച്ചതിൻെറ രേഖകൾ, ആർ.ടി.പി.സി.ആർ നെഗറ്റീവ്​ സർട്ടിഫിക്കറ്റ്​ എന്നിവ വെബ്​സൈറ്റിൽ അപ്​ലോഡ്​ ചെയ്യണമെന്നായിരുന്നു നിർദേശം. എന്നാൽ, ​ഇഹ്​തിറാസ്​ ആപ്പ്​ വഴി അപ്​ലോഡ്​ ചെയ്യാൻ ശ്രമിച്ചവർക്ക്​ ഇത്​ മുടങ്ങി. ​

കണ്ണൂരിൽനിന്ന്​ ദോഹയിലേക്ക്​ പുറപ്പെടാനിരുന്ന എയർ ഇന്ത്യ വിമാനത്തിലെ യാത്രക്കാർക്ക് യാത്ര മുടങ്ങുമെന്ന നിലയിലായിരുന്നു കാര്യങ്ങൾ. തുടർന്ന്​ ദോഹയിൽനിന്നുള്ള പ്രത്യേക നിർദേശ​ത്തെ തുടർന്ന്​ ഒരു ദിവസത്തേക്ക്​ മാത്രം ഇളവു നൽകിയതിൻെറ അടിസ്​ഥാനത്തിലാണ്​ പലരുടെ യാത്ര മുടങ്ങാതിരുന്നത്​.

അതിനിടെ, ക്യൂ.ഐഡി ഇല്ലാത്ത യാത്രക്കാർക്ക്​ ഇഹ്​തിറാസിൽ വിശദാംശങ്ങൾ രജിസ്​റ്റർ ചെയ്യാൻ കഴിയുന്നില്ലെന്നും പരാതിയുണ്ട്​. കോവിഡ്​ വാക്​സിനേറ്റഡ്​ അല്ലെങ്കിൽ പുതിയ വിസയിൽ വരുന്നവർക്ക്​ ഇഹ്​തിറാസിൽ യാത്രാനുമതി ലഭിക്കുന്നില്ല എന്നാണ്​ ബന്ധപ്പെട്ട കേന്ദ്രങ്ങളിൽനിന്ന്​ ഇവർക്കു നൽകുന്ന വിശദീകരണം. ഖത്തർ അംഗീകൃത വാക്​സിനുകൾ സ്വീകരിച്ച്​ 14 ദിവസത്തിനു ശേഷം യാത്രചെയ്യാമെന്നാണ്​ ഇവർക്കു ലഭിക്കുന്ന നിർദേശം.ടൂറിസ്​റ്റ്​, ബിസിനസ്​, ഫാമി വിസ നടപടി ക്രമങ്ങളും ഇന്നലെ മുതൽ നിലവിൽ വന്നിട്ടുണ്ട്​.

രജിസ്​ട്രേഷൻ വെബ്​സൈറ്റ്​ വഴി

വിമാനം ദോഹയിൽ ലാൻഡ്​ ചെയ്യുന്ന സമയത്തിന്​ 12 മണിക്കൂർ മുമ്പായി ഇഹ്​തിറാസ്​ വെബ്​സൈറ്റ്​ വഴി രജിസ്​റ്റർ ചെയ്യുന്ന യാത്രക്കാർക്ക്​ മാത്രമാണ്​ ഖത്തറിൽ പ്രവേശിക്കാൻ അനുമതി ലഭിക്കൂ (www.ehteraz.gov.qa).

തിങ്കളാഴ്​ച നിലവിൽ വന്ന പ്രീ രജിസ്​ട്രേഷൻ സംവിധാനം വഴി ലോഗ്​ ഇൻ ചെയ്​ത്​ യാത്രാ-ആരോഗ്യ വിവരങ്ങൾ നൽകിയാൽ, മിനിറ്റുകൾക്കകം അനുമതി ലഭിച്ചതായി സർട്ടിഫിക്കറ്റ്​ ലഭിക്കും. ഈ സർട്ടിഫിക്കറ്റിന്​ 24 മണിക്കൂർ മാത്രമാണ്​ കാലാവധി. എല്ലാതരം യാത്രക്കാർക്കും രജിസ്​ട്രേഷൻ നിർബന്ധമാണ്​.