സംസ്ഥാന ചലച്ചിത്ര അവാര്‍ഡ്: സയ്യിദ് മിര്‍സ ജൂറി ചെയര്‍മാന്‍

തിരുവനന്തപുരം: 2021ലെ കേരള സംസ്ഥാന ചലച്ചിത്ര അവാര്‍ഡുകള്‍ നിര്‍ണയിക്കാൻ ജൂറിയെ നിയമിച്ചു. ഹിന്ദി സംവിധായകനും തിരക്കഥാകൃത്തുമായ സയ്യിദ് അഖ്തര്‍ മിര്‍സയാണ് ജൂറി ചെയര്‍മാന്‍.

സംവിധായകനും ചലച്ചിത്ര നിരൂപകനുമായ കെ. ഗോപിനാഥന്‍, സംവിധായകന്‍ സുന്ദര്‍ദാസ് എന്നിവര്‍ പ്രാഥമിക വിധിനിര്‍ണയ സമിതിയിലെ രണ്ട് സബ് കമ്മിറ്റി ചെയര്‍മാന്‍മാരാണ്. ഇരുവരും അന്തിമ വിധിനിര്‍ണയ സമിതിയിലെ അംഗങ്ങളുമാണ്. ബൈജു ചന്ദ്രന്‍, വി.ആര്‍. സുധീഷ്, സുസ്മേഷ് ചന്ത്രോത്ത്, ജിസി മൈക്കിള്‍, സംഗീത പത്മനാഭന്‍, വേണുഗോപാല്‍ എന്നിവരാണ് പ്രാഥമിക വിധിനിര്‍ണയ സമിതിയിലെ മറ്റ് അംഗങ്ങള്‍.

സയ്യിദ് മിര്‍സ, സുന്ദര്‍ദാസ്, കെ. ഗോപിനാഥന്‍ എന്നിവര്‍ക്കു പുറമെ അന്തിമവിധിനിര്‍ണയ സമിതിയില്‍ സുരേഷ് ത്രിവേണി, ബോംബെ ജയശ്രീ, ഫൗസിയ ഫാത്തിമ, ഹരീന്ദ്രനാഥ് ദ്വാരക് വാര്യര്‍ എന്നിവരും അംഗങ്ങളാണ്. ചലച്ചിത്ര അക്കാദമി സെക്രട്ടറി സി. അജോയ് പ്രാഥമിക, അന്തിമ വിധിനിര്‍ണയ സമിതികളില്‍ മെംബര്‍ സെക്രട്ടറിയാണ്. പ്രാഥമിക ജൂറിയില്‍ എട്ട് അംഗങ്ങളും അന്തിമ ജൂറിയില്‍ ഏഴ് അംഗങ്ങളുമാണുള്ളത്.

ചലച്ചിത്രനിരൂപകന്‍ വി.കെ ജോസഫ് ആണ് രചന വിഭാഗം ജൂറി ചെയര്‍മാന്‍. മനില സി. മോഹന്‍, ഡോ. അജു കെ. നാരായണന്‍, സി. അജോയ് (മെംബര്‍ സെക്രട്ടറി) എന്നിവരാണ് മറ്റ് അംഗങ്ങള്‍. 142 സിനിമകളാണ് അവാര്‍ഡിന് സമര്‍പ്പിക്കപ്പെട്ടത്. ഏഴെണ്ണം കുട്ടികളുടെ ചിത്രങ്ങളാണ്. ഏപ്രില്‍ 28ന് ജൂറി സ്ക്രീനിങ് ആരംഭിക്കും.