ബംഗാളിൽ സംപൂജ്യരായി ഇടതും കോൺഗ്രസും; ഇരുളടഞ്ഞ്​ തിരിച്ചുവരവിന്‍റെ സാധ്യതകൾ

കൊൽക്കത്ത: പതിറ്റാണ്ടുകൾ ഭരണം കൈയാളിയ പാരമ്പര്യമുണ്ടായിട്ടും ഇത്തവണ പശ്​ചിമ ബംഗാളിൽ ഒരു സീറ്റ്​ പോലും പിടിക്കാനാവാതെ ഇടതുകക്ഷികളും കോൺഗ്രസും. സംസ്​ഥാനത്തിന്‍റെ ചരിത്രത്തിൽ ആദ്യമായാണ്​ ഇരുകക്ഷികളും ഇതുപോലൊരു മഹാ ദുരന്തത്തിന്​ ഇരകളാകുന്നത്​. അവർക്കൊപ്പം മത്സരിച്ച അബ്ബാസ്​ സിദ്ദീഖിയുടെ ഐ.എസ്​.എഫ്​ എന്ന രാഷ്​ട്രീയ സെക്കുലർ മജ്​ലിസ്​ പാർട്ടി പോലും ഒരു സീറ്റ്​ പിടിച്ചിടത്താണ്​ മാനംകെട്ട തോൽവി.

294 അംഗ സഭയിലേക്ക്​ തൃണമുൽ, ​ബി.ജെ.പി ​കക്ഷികൾക്കെതിരെ കോൺഗ്രസ്​- ഇടത്​- ഐ.എസ്​.എഫ്​ മൂവർ മുന്നണിയാണ്​ മത്സര രംഗത്തുണ്ടായിരുന്നത്​. യഥാർഥ പോരാട്ടം ബി.ജെ.പിയും തൃണമൂലും തമ്മിലായിരുന്നുവെങ്കിലും ഒറ്റക്ക്​ രണ്ടക്കം കടക്കാനാവുമെന്ന്​ കോൺഗ്രസ്​ ആത്​മവിശ്വാസം പ്രകടിപ്പിച്ചിരുന്നു. ചിലയിടങ്ങളിലെങ്കിലും ജയിക്കാനാകുമെന്ന്​ ഇടതുപക്ഷവും പ്രതീക്ഷിച്ചു. പക്ഷേ, അവരുടെ തീപ്പൊരി പ്രഭാഷക ഐഷ ഘോഷിന്​ ലഭിച്ചത്​ 14 ശതമാനം വോട്ടുകൾ മാത്രം. സി.പി.എം നേതാക്കളായ തന്മയ്​ ഭട്ടാചാര്യ, കാന്തി ഗാംഗുലി, സുചൻ ചക്രവർത്തി, ശ്രീജൻ ഭട്ടാചാര്യ, പോളിറ്റ്​ ബ്യൂറോ അംഗം മുഹമ്മദ്​ സാലിം എന്നിവരെല്ലാം ദയനീയമായി പരാജയപ്പെട്ടു.

മറുവശത്ത്​ കോൺഗ്രസ്​ ശക്​തികേന്ദ്രങ്ങളായി നിലനിർത്തിപ്പോന്ന മാൾഡയും മുർഷിദാബാദും ഇത്തവണ കോൺഗ്രസിനെവിട്ട്​ കൂട്ടമായി തൃണമൂലിന്​ വോട്ടുചെയ്​തു. മുസ്​ലിം ജനസംഖ്യ 66.28 ശതമാനമുള്ള മുർഷിദാബാദിൽ സംസ്​ഥാന കോൺഗ്രസ്​ പ്രസിഡന്‍റും ലോക്​സഭാംഗവുമായ അധീർ ചൗധരിയെ മുന്നിൽനിർത്തി അങ്കം നയിച്ചിട്ടും ദീദിയെ വിടാൻ നാട്ടുകാർ ഒരുക്കമായില്ല. 50 ശതമാനത്തിന്​ മുകളിലുള്ള മാൾഡയിൽ മുൻ കേന്ദ്രമന്ത്രി അബ്​ദുൽ ഗനി ഖാൻ ഉൾപെടെ ദയനീയമായി തോറ്റുമടങ്ങി. 90 ശതമാനത്തിലേറെ മുസ്​ലിംകളുള്ള സുജാപൂരിലും കോൺഗ്രസ്​ അപ്രസക്​തമായി, പകരം തൃണമൂൽ മതിയെന്നുവെച്ചു. ഹൂഗ്​ളിയിലെ ചംപ്​ദാനിയിൽ നാലു തവണ ജയിച്ച മുതിർന്ന കോൺഗ്രസ്​ നേതാവ്​ അബ്​ദുൽ മന്നാൻ ഇത്തവണ തോൽവിയറിഞ്ഞു. രണ്ടു ജില്ലകളിലും മുസ്​ലിം വോട്ട്​ ചിതറുന്നത്​ തൃണമൂലിനെ തോൽപിക്കുമെന്നും ബി.ജെ.പി അധികാരമേറാൻ ഇടയാക്കുമെന്നും ഭയന്ന്​ കൂട്ടമായി ജനം മമതക്കൊപ്പം നിന്നു.

ഇടതുപക്ഷം 32ഉം (വോട്ട്​ ശതമാനം 26) കോൺഗ്രസ്​ 44ഉം (വോട്ട്​ ശതമാനം 12.3) സീറ്റുകൾ നേടിയ 2016ലെ തെരഞ്ഞെടുപ്പ്​ കഴിഞ്ഞ്​ അഞ്ചു വർഷം പൂർത്തിയാകു​േമ്പാഴേക്ക്​ ഇല്ലാതായിപോകുന്നതെങ്ങനെയെന്നതാണ്​ ഇരു കക്ഷികളെയും അലട്ടുന്നത്​. അന്ന്​ ഒന്നിച്ചുനേടിയ 76 സീറ്റുകളാണ്​ കൈവിട്ടുപോയത്​.

മമത 2011ൽ ബംഗാൾ പിടിക്കും മുമ്പ് തുടർച്ചയായ 34 വർഷം സംസ്​ഥാനം ഭരിച്ച പാർട്ടിയാണ്​ ഇടതുപക്ഷം. 2019ലെ ലോക്​സഭ തെരഞ്ഞെടുപ്പിൽ വോട്ട്​ ശതമാനം എട്ടുശതമാനമായി കുറഞ്ഞെങ്കിൽ അതിനെക്കാൾ മോശം ഫലമാണ്​ ഇത്തവണ പാർട്ടിയെ പിടികൂടിയത്​- 5.7 ശതമാനം.

തൃണമൂലിനെ ഭയന്ന്​ ഇടതു വോട്ടുകൾ കൂട്ടമായി ബി.ജെ.പിയിൽ ചേക്കേറുന്നതായി മാധ്യമ റിപ്പോർട്ടുകൾ വന്നിരുന്നു. അതിനെ സാധൂകരിക്കുന്നതാണ്​ ഫലങ്ങൾ.

അന്ന്​ മൂന്നു സീറ്റ്​ മാത്രം വിജയിച്ച്​ ചിത്രത്തിനു പുറത്തായിരുന്ന ബി.ജെ.പി അത്​ 77 ആയി ഉയർത്തിയെന്നു മാത്രമല്ല, അധികാരം പിടിക്കുമെന്നുവരെ സംശയം സൃഷ്​ടിച്ചു. ഈ കുതിപ്പിൽ പഴയ ഇടതുവോട്ടുകൾ നിർണായകമായി. കഴിഞ്ഞ ലോക്​സഭ തെരഞ്ഞെടുപ്പ്​ കാലത്ത്​ പ്രചരിച്ച മുദ്രാവാക്യങ്ങളിൽ ചിലത്​ 'ആഗെ റാം, പോറെ ബാം' (രാമൻ ആദ്യം, ഇടത്​ പിന്നീട്​), 'ചുപ്​ ചാപ്​ കൊമോൽ ചാപ്​' (മൗനിയാകൂ, വോട്ട്​ ​ബി.ജെ.പിക്ക്​ ചെയ്യു) എന്നിങ്ങനെയായിരുന്നു. തൃണമൂലിനെതിരായ വികാരം ബി.ജെ.പിക്കൊപ്പം നിലയുറപ്പിക്കാനാണ്​ അവരെ പ്രേരിപ്പിച്ചത്​.

2019ൽ തങ്ങൾക്ക്​ നഷ്​ടമായ വോട്ടുകൾ തിരികെ പിടിക്കുന്നതിൽ ഇടതുപക്ഷം ദയനീയമായി പരാജയപ്പെട്ടു. പ്രചാരണ രംഗത്തുപോലും പഴയ ഭരണകക്ഷി വൻതോൽവിയായി. കോൺഗ്രസാക​ട്ടെ, കേന്ദ്ര നേതൃത്വത്തെ എത്തിക്കാൻ പോലും കഴിയാതെ തളർന്നു.

2019 ലെ പൊതുതെരഞ്ഞെടുപ്പിൽ സംഭവിച്ചുപോലും നടക്കാതെ ഇത്തവണ ബി.ജെ.പി വിരുദ്ധ വോട്ടുകൾ ഏകീകരിച്ചതാണ്​ ദീദിയുടെ ജൈത്രയാത്രക്ക്​ മാറ്റുകൂട്ടിയത്​. അതുവഴി സംഭവിച്ചതാക​ട്ടെ, സഭയിൽ ഒരു വാക്കു പറയാൻ പോലും ഇനി ഇടതുപക്ഷവും കോൺഗ്രസും ഇല്ലാതെ പോകുകയും ചെയ്​തു.