തിങ്കളാഴ്​ച സത്യപ്രതിജ്ഞ ചടങ്ങ്​​ ഒരുക്കാൻ ഉദ്യോഗസ്​ഥർക്ക്​​ നിർദേശം; പിണറായി വൻ ആത്മവിശ്വാസത്തിൽ തന്നെ

തിരുവനന്തപുരം: ഫലം വരുന്നതിന്​ മു​േമ്പ എൽ.ഡി.എഫ്​ സർക്കാറിന്​ തുടർഭരണം ലഭിക്കുമെന്ന ആത്മവിശ്വാസത്തിൽ തിങ്കളാഴ്ച തന്നെ സത്യപ്രതിജ്ഞ ചടങ്ങ്​ ഒരുക്കാൻ മുഖ്യമന്ത്രി പിണറായി വിജയൻ നിർദേശം നൽകിയതായി റിപ്പോർട്ട്​.

കോവിഡ്​ ബാധ രൂക്ഷമായ സാഹചര്യത്തെ തുടർന്നാണ്​ ഫല പ്രഖ്യാപനം വരുന്നതിന്‍റെ പിറ്റേ ദിവസം തന്നെ അധികാരത്തിലേറാൻ പിണറായി തയാറെടുക്കുന്നതെന്ന്​ 'ദ ന്യൂ ഇന്ത്യൻ എക്​സ്​പ്രസ്​' റിപ്പോർട്ട്​ ചെയ്​തു. രാജ്​ഭവനിൽ വളരെ ചെറിയ രീതിയിലാണ്​ ചടങ്ങുകൾ നടത്താൻ ഉദ്ദേശിക്കുന്നത്​.

ഭരണം ലഭിച്ചാൽ ഒറ്റക്കോ അല്ലെങ്കിൽ പാർട്ടിയിൽ നിന്നും ഘടകകക്ഷികളിൽ നിന്നുമുള്ള മുതിർന്ന മൂന്നോ നാലോ മന്ത്രിമാടെ ഒപ്പമോ ആയിരിക്കും പിണറായി സത്യപ്രതിജ്ഞ ചെയ്യുക.

പൊതു ഭരണ വകുപ്പിലെ ഉന്നത ഉദ്യോഗസ്​ഥർക്ക്​ ഈ ആഴ്ചയാണ്​ ഇത്​ സംബന്ധിച്ച നിർദേശം ലഭിച്ചതെന്ന്​ സർക്കാർ കേന്ദ്രങ്ങളെ ഉദ്ധരിച്ച്​ പത്രം റിപ്പോർട്ട്​ ചെയ്​തു. 2016ൽ ​മേയ്​ 19നായിരുന്നു കഴിഞ്ഞ നിയമസഭ തെരഞ്ഞെടുപ്പിന്‍റെ​ ഫലം വന്നത്​. ആറ്​ ദിവസത്തിന്​ ശേഷമാണ്​ പിണറായി മുഖ്യമന്ത്രിയായി അധികാരമേറ്റത്​.

'സാധാരണയായി ഫല പ്രഖ്യാപനവും സത്യപ്രതിജ്ഞാ ചടങ്ങും തമ്മിൽ ഒരു ഹ്രസ്വ ഇടവേളയുണ്ടാവാറുണ്ട്​. എന്നിരുന്നാലും ആ ഇടവേള ഇല്ലാതാക്കുന്നത്​ ഉദ്യോഗസ്ഥരെ സംബന്ധിച്ചിടത്തോളം അപഹാസ്യമായ നീക്കമാവും. കോവിഡ് സാഹചര്യം അതിഭീകരമായതിനാലാകാം അത്തരമൊരു നിർദേശം നൽകാൻ അദ്ദേഹത്തെ പ്രേരിപ്പിച്ചത്​' -സർക്കാർ ഉദ്യോഗസ്​ഥൻ പറഞ്ഞു.

വോ​ട്ടെടുപ്പിന്​ പിന്നാലെ തുടർ ഭരണം ഉറപ്പാ​ണെന്ന തരത്തിലാണ്​ പിണറായിയും എൽ.ഡി.എഫും പ്രതികരിച്ച്​ പോരുന്നത്​. കഴിഞ്ഞ ദിവസങ്ങളിലായി ദേശീയ മാധമങ്ങളുടെയടക്കം എക്​സിറ്റ്​ പോൾ ഫലങ്ങൾ കൂടി ജയം പ്രവചിച്ചതോടെ ഇടതുപക്ഷത്തിന്‍റെ ആത്മവിശ്വാസം ഇരട്ടിയായിരുന്നു. ഇതും മുഖ്യമന്ത്രിയുടെ നീക്കത്തിന്​ ശക്​തി പകർന്നിരിക്കാം.

നിലവിലുള്ള മുഖ്യമന്ത്രി രാജിവെച്ച ശേഷം ഭരണത്തിലേറുന്ന കക്ഷി പാർലമെന്‍ററി പാർട്ടി യോഗം ചേർന്ന്​ അടുത്ത മുഖ്യമന്ത്രിയെ തീരുമാനിക്കണമെന്നാണ്​ ചട്ടം. പിന്നീട്​ ഇദ്ദേഹം ഗവർണറെ കണ്ട്​ സർക്കാർ രൂപീകരിക്കാനുള്ള അവകാശവാദം ഉന്നയിക്കുകയാണ്​ വേണ്ടത്​.

തുടർഭരണം ലഭിക്കുകയാണെങ്കിൽ പിണറായി ഈ നടപടിക്രമങ്ങൾ ഒരുദിവസം കൊണ്ട്​ പൂർത്തീകരിക്കേണ്ടി വരും. സാഹചര്യം അനുകൂലമായാൽ​ ഞായറാഴ്ച തന്നെ ഇടതുമുന്നണി പാർലമെന്‍ററി പാർട്ടി യോഗം ഓൺലൈനായി ചേർന്നേക്കുമെന്നാണ് ​സൂചന.