ഈ വിധി ഒരിക്കലും പ്രതീക്ഷിച്ചില്ല; ഭരണത്തുടർച്ചക്ക് വേണ്ടതൊന്നും ഇടത് സർക്കാർ ചെയ്തിട്ടില്ല- ഉമ്മൻചാണ്ടി
text_fields
കോട്ടയം: ജനവിധി പൂര്‍ണമായും മാനിക്കുന്നുവെന്ന് മുതിർന്ന കോൺഗ്രസ് നേതാവ് ഉമ്മൻചാണ്ടി. പരാജയത്തിൽ പാർട്ടി നിരാശപ്പെടുന്നില്ല. പരാജയത്തിന്‍റെ കാരണങ്ങളെന്തെന്ന് വിലയിരുത്തുമെന്നും അദ്ദേഹം മാധ്യമപ്രവർത്തകരോട് പറഞ്ഞു. ഒരിക്കലും പ്രതീക്ഷിക്കാത്ത വിധിയാണ്. കഴിഞ്ഞ അഞ്ച് വര്‍ഷം ഭരണതുടര്‍ച്ചക്ക് വേണ്ട കാര്യങ്ങളൊന്നും ഇടത് സര്‍ക്കാര്‍ ചെയ്തിട്ടില്ലെന്നാണ് യു.ഡി.എഫ് വിശ്വസിക്കുന്നതെന്നും ഉമ്മന്‍ചാണ്ടി പറഞ്ഞു.
ജനാധിപത്യത്തില്‍ ജയവും തോല്‍വിയും സ്വാഭാവികമാണ്. ജയിക്കുമ്പോള്‍ അഹങ്കരിക്കുകയും തോല്‍ക്കുമ്പോള്‍ നിരാശപ്പെടുകയും ചെയ്യുമ്പേള്‍ രാഷ്ട്രീയ രംഗത്ത് സുഗമമായി മുന്നോട്ട് പോകാന്‍ സാധിക്കില്ല. പരാജയത്തെ വെല്ലുവിളിയോടെ ഏറ്റെടുക്കും. കാരണം പരിശോധിക്കും. സഹപ്രവര്‍ത്തകരുമായി ആലോചിച്ച് ഒരു ജനാധിപത്യ പാര്‍ട്ടിയില്‍ നടക്കുന്ന ചര്‍ച്ചകളും സാഹചര്യങ്ങളും കണക്കിലെടുത്ത് മുന്നോട്ട് പോകും.
പുതുപ്പള്ളിയിൽ തന്‍റെ ഭൂരിപക്ഷം 22 ആയിരത്തിൽ നിന്ന് രണ്ടായിരത്തിലെത്തിയത് പരിശോധിക്കും. ഞാന്‍ 50 വര്‍ഷം മുമ്പ് തുടങ്ങുമ്പോഴുള്ള ഭൂരിപക്ഷമല്ല ഇപ്പോള്‍. തദ്ദേശ തെരഞ്ഞെടുപ്പിൽ പുതുപ്പള്ളി മണ്ഡലത്തിലെ പല സ്ഥലങ്ങളിലും ഇടതുപക്ഷം മുന്നേറ്റം ഉണ്ടാക്കിയിരുന്നു. ഭൂരിപക്ഷം കൂടി. തദ്ദേശ തെരഞ്ഞെടുപ്പിലെ പരാജയം നിങ്ങള്‍ ചൂണ്ടികാണിച്ചതാണ്. അത് പരിശോധിക്കുമെന്നും ഉമ്മന്‍ചാണ്ടി പറഞ്ഞു.