'ലോകമാകെ ഇസ​്​ലാമികവത്കരണം നടക്കുന്നു, കേരളത്തിൽ ഹിന്ദുവിന്‍റെയും ക്രിസ്ത്യാനിയുടെയും അവകാശങ്ങൾ കവർന്ന് അവർ വളരുകയാണ്'; വർഗീയത പറഞ്ഞ് ബി. ഗോപാലകൃഷ്ണന്‍

ഒല്ലൂര്‍: നിയമസഭ തെരഞ്ഞെടുപ്പ് പ്രചാരണത്തിനിടെ വർഗീയത ആളിക്കത്തിച്ച് ഒല്ലൂർ മണ്ഡലത്തിലെ എൻ.ഡി.എ സ്ഥാനാർഥി ബി. ഗോപാലകൃഷ്ണൻ. ലോകമാകെ ഇസ​്​ലാമികവത്കരണം നടക്കുകയാണ്. കേരളത്തിൽ മുസ​്​ലിംകൾക്ക് ആനുപാതികമായ പ്രാതിനിധ്യം ക്രൈസ്തവർക്ക് ലഭിക്കുന്നില്ല. ഹിന്ദുവിന്‍റെയും ക്രിസ്ത്യാനിയുടെയും അവകാശങ്ങൾ കവർന്ന് അവർ വളരുകയാണ്. ക്രൈസ്തവ സഭക്ക് വേണ്ടി സംസാരിക്കുന്നത് ബി.ജെ.പി മാത്രമാണ് എന്ന് തിരിച്ചറിയണം -ബി. ഗോപാലകൃഷ്ണൻ പറയുന്നു. ഒല്ലൂര്‍ പള്ളി സന്ദര്‍ശിച്ച് വികാരിയുമായി സംസാരിക്കുമ്പോഴാണ് വിവാദ പ്രസ്താവന നടത്തിയത്.

ഇന്ന് സി.പി.എമ്മിനെയും കോണ്‍ഗ്രസിനെയും നിയന്ത്രിക്കുന്നത് മുസ​്​ലിം ലീഗാണ്. ഇത് മൂലം ഇവരെ പിണക്കാത്ത നയം മാത്രമേ ഇടത്-വലത് മുന്നണികള്‍ സ്വീകരിക്കുകയുള്ളൂ.

ജനസംഖ്യാനുപാതത്തിൽ 23 ശതമാനമാണ് ക്രൈസ്തവർ. 29 ശതമാനമാണ് മുസ​്​ലിംകൾ. ക്രൈസ്തവര്‍ക്ക് ന്യൂനപക്ഷ അവകാശങ്ങളുടെ 40-44 ശതമാനം കിട്ടണം. മുസ​്​ലിംകൾക്ക് 50-55 ശതമാനം കിട്ടണം. എന്നാൽ ന്യൂനപക്ഷ അവകാശം 20 ശതമാനം മാത്രമാണ് ക്രൈസ്തവർക്ക് ലഭിക്കുന്നത്. അവശേഷിക്കുന്ന 80 ശതമാനം മുസ​്​ലിംകൾക്കാണ്.

ഇതിനെതിരെ താനാണ് പ്രശ്നം ഉന്നയിച്ചതും ഇതിനെ തുടര്‍ന്നത് ബിഷപ്പ്മാരുടെ സംഘടന കോടതിയെ സമീപിച്ചതും. ലൗ ജിഹാദിന്‍റെ കാര്യത്തിലും ഇതേ നിലപാടാണ് ഇടത്-വലത് പക്ഷങ്ങൾക്ക് ഉള്ളത്.

ബി.ജെ.പിയുമായി ക്രൈസ്തവര്‍ അടുക്കരുത് എന്ന നയമാണ് മറ്റുരാഷ്ട്രീയ പാര്‍ട്ടികള്‍ക്ക് ഉള്ളത്. ഭാവിയില്‍ ഇസ​്​ലാം മതം ഭുരിപക്ഷമതമായി മാറുന്ന സാഹചര്യമാണ്.

ലോകമാകെ ഇസ​്​ലാമികവത്കരണം നടക്കുകയാണ്. ക്രൈസ്തവ രാഷ്ട്രങ്ങൾ ഇസ​്​ലാം രാജ്യങ്ങളായി മാറിക്കൊണ്ടിരിക്കുകയാണ്. തുർക്കിയിൽ കത്തീഡ്രൽ മുസ​്​ലിം പള്ളിയാക്കിയപ്പോൾ കേരളത്തിൽ ഒരു പ്രതിഷേധവും ഉയർന്നില്ലെന്നും ബി. ഗോപാലകൃഷ്ണൻ പറഞ്ഞു.

വിഡിയോ കാണാം...