കോൺഗ്രസിൽ ചേർന്നിട്ടില്ല; തെരഞ്ഞെടുപ്പ്​ സമയത്തെ വ്യാജവാർത്തകൾ വിശ്വസിക്കരുതെന്ന്​ കലാഭവൻ ഷാജോൺ

തിരുവനന്തപുരം: ഇക്കുറിയും കേരള നിയമസഭ തെരഞ്ഞെടുപ്പിന്​ താരപ്പകിട്ടിന്​​ കുറവൊന്നുമുണ്ടായിട്ടില്ല. സുരേഷ്​ ഗോപി, മുകേഷ്​, ഗണേഷ്​ കുമാർ, ധർമജൻ ബോൾഗാട്ടി, കൃഷ്​ണകുമാർ തുടങ്ങി ഒരുപിടി സിനിമ-സീരിയൽ താരങ്ങൾ മത്സരരംഗത്തുണ്ട്​.

സംവിധായകനും നടനുമായ രമേഷ്​ പിഷാരടിയടക്കം ചിലർ പരസ്യമായി രാഷ്​ട്രീയ ആഭിമുഖ്യം പ്രഖ്യാപിച്ചു കഴിഞ്ഞു. ബാലുശ്ശേരിയിൽ കോൺഗ്രസ്​ സ്​ഥാനാർഥിയായി മത്സരിക്ക​ുന്ന ധര്‍മജന്‍റെ പ്രചാരണത്തിന് കലാഭവന്‍ ഷാജോണ്‍, രമേശ് പിഷാരടി, ഹരീഷ് കണാരന്‍, തെസ്‌നി ഖാന്‍ എന്നിവരെത്തിയിരുന്നു. ഇതിന്​ പിന്നാലെയാണ്​ ഷാജോണും കുടുംബവും കോൺഗ്രസിൽ ചേർന്നുവെന്ന് വ്യാപക​ പ്രചാരണമുണ്ടായത്​.

എന്നാൽ ഇപ്പോൾ വിഷയത്തിൽ വിശദീകരണവുമായി രംഗത്തെത്തിയിരിക്കുകയാണ്​ ഷാജോൺ. താൻ ഒരു പാർട്ടിയിലും ചേർന്നിട്ടില്ല. തെരഞ്ഞെടുപ്പ്​ സമയത്ത്​ കണ്ടുവരുന്ന വ്യാജ വാർത്തകൾ ആരും വിശ്വസിക്കരുതെന്ന്​ ഷാജോൺ ഫേസ്​ബുക്കിൽ കുറിച്ചു.

തൃശൂരിൽ ബി.ജെ.പി ടിക്കറ്റിലാണ്​ രാജ്യസഭ എം.പി കൂടിയായ സുരഷ്​ ഗോപി മത്സരിക്കുന്നത്​. കൊല്ലം മണ്ഡലത്തിലെ സിറ്റിങ്​ എം.എൽ.എ കൂടിയായ മുകേഷ്​ സി.പി.എം സ്​ഥാനാർഥിയാണ്​. മുൻ മന്ത്രി ആർ. ബാലകൃഷ്​ണപിള്ളയുടെ മകനും സിറ്റിങ്​ എം.എൽ.എയുമായ കെ.ബി. ഗണേഷ്​കുമാർ പത്തനാപുരത്ത്​ നിന്നാണ്​ എൽ.ഡി.എഫ്​ സ്​ഥാനാർഥിയായി മത്സരിക്കുന്നത്​. നടൻ കൃഷ്​ണകുമാർ തിരുവനന്തപരം മണ്ഡലത്തിലെ ബി.ജെ.പി സ്​ഥാനാർഥിയാണ്​.

അരൂരിൽ നിന്നും ഡെമോക്രാറ്റിക്​ സോഷ്യൽ ജസ്റ്റിസ്​ പാർട്ടി സ്​ഥാനാർഥിയായി നടി പ്രിയങ്ക അനൂപും ജനവിധി തേടുന്നുണ്ട്​. സീരിയൽ നടനായ വിവേക്​ ഗോപൻ ചവറയിൽ ബി.ജെ.പി സ്​ഥാനാർഥിയാണ്​.