എ​.ഐ.സി.സി വക്താവ്​ ഷമ മുഹമ്മദിന് ഇരട്ടവോട്ട്​

തിരുവനന്തപുരം: എ​.ഐ.സി.സി മാധ്യമ വക്താവ് ഷമ മുഹമ്മദിന്​​ കണ്ണൂർ നിയമസഭ മണ്ഡലത്തിൽ ഇരട്ടവോട്ട്​. കണ്ണൂർ നിയമസഭ മണ്ഡലത്തിലെ 89ാം ബൂത്തിലാണ്​ രണ്ടുവോട്ടുകളും.

ഒന്നിൽ പിതാവിന്‍റെ പേരും മറ്റൊന്നിൽ ഭർത്താവിന്‍റെ പേരുമാണ്​ വിലാസത്തോടൊപ്പം നൽകിയിരിക്കുന്നത്​. 89ാം ബൂത്ത​ിലെ 532ാം നമ്പർ വോട്ടറായ ഷമ മുഹമ്മദിന്‍റെ​ വി​ലാസത്തോടൊപ്പം പിതാവ്​ മുഹമ്മദ്​ കുഞ്ഞി​യുടെ പേരാണ്​ നൽകിയിരിക്കുന്നത്​. ഇതേ ബൂത്തിലെ 125ാം നമ്പർ വോട്ടർ കൂടിയായ ഷമ വിലാസത്തോടൊപ്പം ഭർത്താവ്​ കെ.പി. സോയ മുഹമ്മദിന്‍റെ പേരാണ്​ നൽകിയിരിക്കുന്നത്​.

ഇരട്ടവോട്ട്​ ആരോപണം ഉന്നയിച്ച്​ രംഗത്തെത്തിയ പ്രതിപക്ഷ നേതാവ്​ രമേശ്​ ചെന്നിത്തല ഷമ മുഹമ്മദിനെതിരെ നടപടിയെടു​ക്കുമോയെന്ന്​ സി.പി.എം കണ്ണൂർ ജില്ല സെക്രട്ടറി എം.വി. ജയരാജൻ ചോദിച്ചു.

സംസ്​ഥാനത്ത്​ മുഴുവൻ ഇരട്ടവോട്ടുകൾ വ്യാപകമാണെന്ന ആരോപണവുമായി ചെന്നിത്തല രംഗ​ത്തെത്തിയിരുന്നു. ഇതിനുപിന്നാലെ തെരഞ്ഞെടുപ്പ്​ കമീഷൻ ഇത്​ ശരിവെക്കുകയും ചെയ്​തു. എന്നാൽ ആരോപണമുന്നയിച്ചതിന്​ തൊട്ടുപിന്നാലെ കോൺഗ്രസ്​ എം.എൽ.എ എൽദോസ്​ കുന്നപ്പള്ളിക്കും ഭാര്യക്കും പെരുമ്പാവൂരിലും മുവാറ്റുപുഴയിലും ഇരട്ടവോട്ടുണ്ടെന്ന്​ സ്​ഥിരീകരിച്ചിരുന്നു. കൂാതെ ചെന്നിത്തലയുടെ മാതാവ്​ ദേവകിയമ്മക്കും കഴക്കൂട്ടത്തെ യു.ഡി.എഫ്​ സ്​ഥാനാർഥി ഡോ. എസ്​.എസ്​ ലാലിനും ഇരട്ടവോട്ടുകളുണ്ടെന്ന്​ കണ്ടെത്തിയതും പ്രതിപക്ഷ നേതാവിന്​ തന്നെ തിരിച്ചടിയായിരുന്നു.