Begin typing your search above and press return to search.
exit_to_app
exit_to_app
Homechevron_rightNewschevron_rightWorldchevron_rightഗസ്സയിലെ ഇസ്രയേൽ...

ഗസ്സയിലെ ഇസ്രയേൽ കൂട്ടക്കുരുതി: അൽജസീറ ചാനലിന്​ നിയന്ത്രണമേർപ്പെടുത്തി യൂടൂബ്​

text_fields
bookmark_border
ഗസ്സയിലെ ഇസ്രയേൽ കൂട്ടക്കുരുതി: അൽജസീറ ചാനലിന്​ നിയന്ത്രണമേർപ്പെടുത്തി യൂടൂബ്​
cancel

ജറൂസലം: ഗസ്സയിലെ ഇസ്രാ​േയൽ മനുഷ്യക്കുരുതിയെ കുറിച്ച്​ യഥാർഥ വിവരങ്ങൾ ഉടനടി ലോകത്തെ അറിയിക്കുന്ന അൽ ജസീറ ചാനലിന്​ നിയന്ത്രണമേർപ്പെടുത്തി യൂടൂബ്​. അൽജസീറ ചാനലിന്‍റെ അറബിക്​ ലൈവ്​ സ്​ട്രീം കാണുന്നതിനാണ്​ ബുധനാഴ്ച പുലർച്ചെ മുതൽ​ പ്രായപരിധി നിയന്ത്രണം​ ഏർപ്പെടുത്തിയത്​. എന്നാൽ, വ്യാപക വിമർശനങ്ങളുയർന്നതോ​െട ഇത്​ പിന്നീട്​ പിൻവലിച്ചു. ഗൂഗ്​ളിന്‍റെ ഉടമസ്​ഥതയിലുള്ളതാണ്​ യൂടൂബ്​.

ചാനലിന്‍റെ ഉള്ളടക്കം അനുചിതമായിരിക്കാമെന്നും തത്സമയ സ്ട്രീം കാണുന്നതിന് ഉപയോക്താവിന്‍റെ പ്രായം പരിശോധിക്കേണ്ടതുണ്ടെന്നും സൂചിപ്പിക്കുന്ന സന്ദേശമാണ്​ അൽ ജസീറ അറബിക് യൂടൂബ്​ പേജിൽ പ്രത്യക്ഷപ്പെട്ടത്​. ''അൽജസീറയിലെ അക്രമദൃശ്യങ്ങൾ അടങ്ങിയ ഉള്ളടക്കം എല്ലാ പ്രേക്ഷകർക്കും അനുയോജ്യമാകില്ല. കാണണമെന്നുള്ളവർ സൈൻ ഇൻ ചെയ്​ത്​ തങ്ങൾക്ക് 18 വയസോ അതിൽ കൂടുതലോ പ്രായമുണ്ടെന്ന് സ്ഥിരീകരിക്കണം" എന്നായിരുന്നു ഇതേക്കുറിച്ച്​ അൽജസീറ അധികൃതർ യൂടൂബ്​ അധികൃതരുമായി ബന്ധപ്പെട്ട​േ​പ്പാൾ ലഭിച്ച മറുപടി.

എന്നാൽ, വൈകീ​ട്ടോടെ നിയന്ത്രണം നീക്കിയതായി അറിയിപ്പ്​ ലഭിച്ചു. "അക്രമ ദൃശ്യങ്ങൾ സംപ്രേഷണം ചെയ്​തതിനാൽ അൽ ജസീറ അറബിക്​ ലൈവിന്​ പ്രായപരിധി നിയന്ത്രണം ഏർപ്പെടുത്തിയിരുന്നു. എന്നാൽ, നിലവിൽ അത്തരം ഉള്ളടക്കം ഇല്ലാത്തതിനാൽ പ്രസ്​തുത പ്രായപരിധി നിയന്ത്രണം നീക്കി" -പ്രസ്താവനയിൽ പറഞ്ഞു. സൗജന്യവും വിശ്വസനീയവുമായ വിവരങ്ങൾ തേടുന്ന പ്രേക്ഷകർക്കുള്ള ശക്തമായ ഒരു പ്ലാറ്റ്ഫോമായി യൂടൂബ്​ തുടരുമെന്നും അറിയിപ്പിൽ വ്യക്​തമാക്കി.

ഫലസ്​തീനിൽ ഇസ്രായേൽ നടത്തുന്ന മനുഷ്യാവകാശലഘനങ്ങൾ പുറംലോകം അറിയാതിരിക്കാൻ സോഷ്യൽ മീഡിയ പ്ലാറ്റ്‌ഫോമുകൾ മൊത്തത്തിൽ നടത്തുന്ന ഗൂഡാലോചനയുടെ ഭാഗമാണ്​ യൂടൂബിന്‍റെ ഈ നിയന്ത്രണമെന്ന്​ ആക്​ടിവിസ്റ്റുകളും പ്രമുഖ മാധ്യമ പ്രവർത്തകരും ആരോപിച്ചിരുന്നു. ഈ മാസമാദ്യം ഫേസ്ബുക്കും അനുബന്ധ സ്ഥാപനമായ ഇൻസ്റ്റാഗ്രാമും അധിനിവേശ കിഴക്കൻ ജറുസലേമിലെ ഷെയ്ഖ് ജർറാഹിലെ അതിക്രമങ്ങളെക്കുറിച്ചുള്ള റിപ്പോർട്ടുകളും അത്തരം അക്കൗണ്ടുകളും വ്യാപകമായി നീക്കം ചെയ്തതായി സോഷ്യൽ മീഡിയ ഉപയോക്താക്കൾ ആരോപിച്ചിരുന്നു.

ഖത്തർ സർക്കാറിന്‍റെ സഹായത്തോടെ പ്രവൃത്തിക്കുന്ന സ്വതന്ത്ര അന്താരാഷ്​ട്ര മാധ്യമ സ്​ഥാപനമാണ്​ അൽ ജസീറ. 1996ൽ സ്​ഥാപിതമായ ചാനലിന്​ ഇംഗ്ലീഷ്​, അറബിക്​ പതിപ്പുകളുണ്ട്​. ഹമദ് ബിൻ ഖലീഫ അൽ ഥാനിയാണ്​ ഇതിന്‍റെ സ്​ഥാപകൻ.

ഫലസ്​തീനിലെ ഗസ്സയിൽ പ്രവർത്തിക്കുന്ന അൽജസീറയുടേതടക്കമുള്ള മാധ്യമസ്​ഥാപനങ്ങളു​െട ഓഫിസുകൾ പ്രവൃത്തിക്കുന്ന 13 നില കെട്ടിടം കഴിഞ്ഞ ശനിയാഴ്ച ഇസ്രായേൽ ബോംബിട്ട്​ തകർത്തിരുന്നു. അൽജസീറ, അസോസിയേറ്റഡ്​ പ്രസ്​ (എ.പി), മിഡിൽ ഈസ്​റ്റ്​ ഐ എന്നീ മാധ്യമസ്​ഥാപനങ്ങളുടെ ഓഫിസുകൾ ​പ്രവർത്തിക്കുന്ന ഗസ്സയിലെ അൽ ജല കെട്ടിടമാണ് തകർത്തത്​. ബോംബ്​ വർഷിക്കുന്നതിന്​ ഒരു മണിക്കൂർ മുമ്പ്​ മാത്രമാണ്​ കെട്ടിടം ഒഴിയണമെന്ന അറിയിപ്പ്​ ഇസ്രായേൽ പട്ടാളം ഫോണിലൂടെ നൽകുന്നത്​.

അതിനിടെ, ഫലസ്​തീനിലെ ഇസ്രായേൽ സൈനിക നടപടികളെ അപലപിച്ചും ഗസ്സക്ക്​ പിന്തുണ അറിയിച്ചും ഗൂഗ്​ളിലെ ജീവനക്കാരുടെ സംഘടനയായ ജൂഗ്​ൾ രംഗത്ത് വന്നിരുന്നു​. ഇസ്രായേൽ ആക്രമണത്തെ പരസ്യമായി അപലപിക്കാൻ ഇവർ ഗൂഗ്​ൾ സി.ഇ.ഒ സുന്ദർ പിച്ചൈയോട് കത്തിൽ ആവശ്യപ്പെടുകയും ചെയ്​തു.

ഗൂഗ്​ളിലെ ജൂത ജീവനക്കാരുടെ സംഘടനയായ ജൂഗ്​ളേഴ്​സ്​ ഫലസ്​തീൻ ആക്രമണത്തെ അപലപിക്കാത്തതിൽ പ്രതിഷേധിച്ച്​ രൂപവത്​കരിച്ച സംഘടനയാണ്​​ ജൂഗ്​ൾ. ഫലസ്​തീന്​ പിന്തുണ നൽകുന്നതിൽ ജീവനക്കാരെ ഏകോപിപ്പിക്കണമെന്നും ഗസ്സക്ക്​ സാമ്പത്തിക സഹായം നൽകണമെന്നും ഇവർ കത്തിൽ ആവശ്യപ്പെട്ടു. കത്തിൽ ഇതിനകം 250ലധികം ജീവനക്കാർ ഒപ്പിട്ടിട്ടുണ്ട്​.

Show Full Article
TAGS:YouTube Al Jazeera gaza under attack israel gaza 
News Summary - YouTube age restriction on Al Jazeera Arabic live stream
Next Story