കോവിഡ് വ്യാപനം: ചൈനയുടെ വീഴ്​ചകളും നുണകളും വെളിപ്പെടുത്തി 'വുഹാൻ ഫയൽസ്​'

ബെയ്ജിങ്: കോവിഡ് വ്യാപനം തടയുന്നതിൽ ചൈന മനഃപൂർവം വീഴ്​ച വരുത്തിയെന്നും ലോകത്തോട്​ നുണകൾ വിളിച്ചുപറഞ്ഞെന്നും തെളിയിക്കുന്ന രേഖകൾ പുറത്ത്​. കോവിഡ്​ നേരിടുന്നതിൽ ജാഗ്രതയും സുതാര്യതയും കാട്ടിയെന്ന ചൈനയുടെ വാദങ്ങൾ പൊളിക്കുന്ന രേഖകളടങ്ങിയ​ 'വുഹാൻ ഫയൽസ്​' ആണ്​ പുറത്തുവന്നിരിക്കുന്നത്​. നിരവധി തവണ പ്രതിദിന രോഗബാധിതര​ുടെ എണ്ണം സംബന്ധിച്ചും മരണസംഖ്യ സംബന്ധിച്ചും ചൈന ലോകത്തോട്​ നുണ പറഞ്ഞെന്ന്​ രേഖകളിലുണ്ട്​. കോവിഡ്​ രോഗത്തി​െൻറ യഥാർഥ പ്രത്യാഘാതങ്ങൾ സംബന്ധിച്ചും ചൈന ലോകത്തെ കബളിപ്പിച്ചെന്നും സി.എൻ.എൻ പുറത്തുവിട്ട 117 പേജുള്ള 'വുഹാൻ ഫയൽസി'ൽ പറയുന്നു.

ചൈനീസ്​ ആരോഗ്യപരിരക്ഷ മേഖലയുമായി അടുത്ത വൃത്തങ്ങളിൽ നിന്ന്​ ചോർന്ന രേഖകളുടെ ആധികാരികത ആറ്​ സ്വതന്ത്ര വിദഗ്​ധരെ കൊണ്ട്​ പരിശോധിപ്പിച്ച​ ശേഷമാണ് സി.എൻ.എൻ പുറത്തുവിട്ടത്​. ഈ 'വുഹാൻ ലീക്ക്​സ്​' സംബന്ധിച്ച്​ ചൈന ഔദ്യോഗികമായി പ്രതികരിച്ചിട്ടില്ല. വുഹാന്​ മുമ്പ്​ ഹ്യുബെ പ്രവിശ്യയിലെ യിചാങിലും ഷിയാന്നിങിലും ​ഫ്ലു പടർന്നു പിടിച്ചത്​ ചൈന മറച്ചുവെച്ചുവെന്നാണ്​ രേഖകളിലുള്ളത്​. വുഹാനിൽ നിന്ന്​ 198 മൈൽ പടിഞ്ഞാറുള്ള യിചാങിലാണ്​ ഏറ്റവും മോശമായി രോഗം പടർന്നത്​. ഫ്ലു ബാധിച്ച രോഗികളെ പരിശോധിച്ചപ്പോൾ നിരവധി പേരുടെ ഫലങ്ങളിൽ അവ്യക്​തത ഉണ്ടായിരുന്നു. ഇതെല്ലാം കോവിഡ്​ 19 കേസുകളായിരുന്നു എന്നാണ്​ രേഖകൾ പറയുന്നത്​.

കഴിഞ്ഞ ഡിസംബറിൽ 200 പേർ​ക്കെങ്കിലും കോവിഡ്​ ബാധിച്ചിരുന്നെന്നാണ്​ രേഖകളിലുള്ളത്​. എന്നാൽ, ചൈന 'കാരണമറിയാത്ത ന്യുമോണിയ' എന്ന പേരിൽ 44 കേസുകൾ മാത്രമാണ്​ അന്ന്​ റിപ്പോർട്ട്​ ചെയ്​തത്​. ഹ്യൂബെ പ്രവിശ്യയിൽ ഫെബ്രുവരി 10നകം 5918 കോവി‍ഡ് കേസുകളാണ് റിപ്പോർട്ട് ചെയ്തിരുന്നത്. എന്നാൽ ഔദ്യോഗിക കണക്കുപ്രകാരം ഇതി​െൻറ പകുതിയിൽ താഴെ മാത്രമാണ് ചൈന റിപ്പോർട്ട് ചെയ്തത്.

ആദ്യഘട്ടത്തിൽ പരിശോധനയുടെ കൃത്യത ഉറപ്പാക്കാൻ ചൈന ബുദ്ധിമുട്ടിയിരുന്നു. കോവിഡ്​ 19​െൻറ ലക്ഷണങ്ങൾ കണ്ടെത്തുന്നതിന്​ 23 ദിവസം വരെയെടുത്തു. ആദ്യം ഉപയോഗിച്ച പരിശോധന കിറ്റുകൾ അധികവും തെറ്റായ ഫലം നൽകുന്നവയായിരുന്നെന്ന്​ 'വുഹാൻ ഫയൽസി'ലുള്ള ജനുവരിയിലെ ഒരു രേഖയിൽ പറയുന്നു.

മാർച്ച് ഏഴ്​ ആയപ്പോൾ ചൈനയുടെ ഔദ്യോഗിക കണക്കുപ്രകാരം 2986 പേരാണ് കോവിഡ് ബാധിച്ചു മരിച്ചത്. എന്നാൽ യഥാർഥത്തിൽ ഇത് 3456 പേരായിരുന്നെന്ന് ഹ്യൂബെ പ്രൊവിൻഷ്യൽ സെൻറർ ഫോർ ഡിസീസ് കൺട്രോൾ ആൻഡ് പ്രിവൻഷനിൽ നിന്ന് ചോർന്ന രേഖയിൽ നിന്ന്​ വ്യക്​തമാണ്​. മാർച്ച്​ ഏഴിന്​ 83 കേസുകളാണ്​ ചൈന ഔദ്യോഗികമായി പ്രഖ്യാപിച്ചത്​. പക്ഷേ, അന്ന്​ 115 പേരിലാണ്​ രോഗം സ്​ഥിരീകരിച്ചത്​.

കൊറോണ വൈറസി​െൻറ ഉദ്ഭവത്തെക്കുറിച്ച് ചൈന നൽകിയ പല വിവരങ്ങളിലും പൊരുത്തകേടുള്ളതായി ആദ്യം മുതൽക്കേ വിമർശനമുണ്ട്. ചൈനയിലെ ഹ്യൂബെ പ്രവിശ്യയിൽ 2019 നവംബർ 17ന്​ ആദ്യത്തെ കേസ് കണ്ടെത്തിയെന്നാണ്​ വിവരം. എന്നാൽ, രോഗബാധയെക്കുറിച്ച് ലോകാരോഗ്യസംഘടനയിൽ ചൈന റിപ്പോർട്ട് ചെയ്യുന്നത് ഡിസംബർ 31നാണ്.