ഇസ്രായേൽ എന്ന ഭീകര രാഷ്ട്രത്തെക്കുറിച്ച് ലോകം അറിയണം -ഉർദുഗാൻ

ഇസ്​താംബൂൾ: ഇസ്രായേൽ എന്ന ഭീകര രാഷ്ട്രം എന്താണ്​ എന്നും എന്താണ്​ ചെയ്​തുകൊണ്ടിരിക്കുന്നത്​ എന്നും ലോകം അറിയണമെന്ന്​ തുർക്കി പ്രസിഡന്‍റ്​ റജബ്​ ത്വയ്യിബ്​ ഉർദുഗാൻ. ഇസ്രായേൽ അധിനിവേശം ആരംഭിച്ചശേഷം ഫലസ്തീന്‍റെ ഭൂപടം എങ്ങനെ മാറിയെന്ന് ലോകത്തെ കാണിക്കുന്നത് തങ്ങൾ തുടരുമെന്നും അദ്ദേഹം പറഞ്ഞു. ഇസ്താംബൂളി​െന്‍റ ഏഷ്യൻ, യൂറോപ്യൻ ഭാഗങ്ങളെ ബന്ധിപ്പിക്കുന്ന പ്രധാന ഹൈവേയായ നോർത്ത് മർമറ മോട്ടോർവേയു​ടെ ഉദ്ഘാടനച്ചടങ്ങിൽ സംസാരിക്കുകയായിരുന്നു അദ്ദേഹം.

ഗസ്സ വിഷയത്തിൽ വ്യാഴാഴ്ച നടന്ന യു.എൻ പൊതുസഭാ യോഗം വിജയകരമായിരുന്നുവെന്ന്​ ഉർദുഗാൻ വിശേഷിപ്പിച്ചു. ''തുർക്കി നയതന്ത്രജ്ഞനായ വോൾക്കൻ ബോസ്‌കീർ അധ്യക്ഷത വഹിച്ച സെഷനിൽ തുർക്കി വിദേശകാര്യ മന്ത്രി മെവ്‌ലത്​ കാവുസോഗ്ലുവും മറ്റ് വിദേശകാര്യ മന്ത്രിമാരും സംബന്ധിച്ചിരുന്നു. ഇസ്രായേൽ എന്ന ഭീകര രാഷ്ട്രം 1947 മുതൽ ഫലസ്തീൻ പിടിച്ചടക്കുന്നതിനെക്കുറിച്ചും ഇന്ന് ഒരു ചെറിയ പ്രദേശമായി ഫലസ്​തീൻ ചുരുങ്ങിയതിനെക്കുറിച്ചും അവർ സംസാരിച്ചു" -ഉർദുഗാൻ പറഞ്ഞു.

ഗസ്സയിൽ 11 ദിവസം നീണ്ടുനിന്ന ഇസ്രായേൽ അതിക്രമത്തിൽ 66 കുട്ടികളടക്കം 243 ഫലസ്തീനികളാണ്​ കൊല്ലപ്പെട്ടത്​. നിരവധി കെട്ടിടങ്ങളും വീടുകള​ും വിദ്യാലയങ്ങളും റോഡുകളും തകർന്ന്​ തരിപ്പണമായി. ഹമാസിന്‍റെ പ്രത്യാക്രമണത്തിൽ ഇസ്രയേലിൽ 12 പേരാണ്​ കൊല്ലപ്പെട്ടത്​.

വെള്ളിയാഴ്ച രാവിലെ​ ഇസ്രായേലും ഫലസ്തീൻ ചെറുത്ത്​ നിൽപ്​ പ്രസ്​ഥാനങ്ങളും തമ്മിൽ വെടിനിർത്തൽ കരാർ നിലവിൽ വന്നു. ഇതിനുപിന്നാലെ വിജയം ആഘോഷിക്കാൻ ഗസ്സ മുനമ്പിലും അധിനിവേശ വെസ്റ്റ് ബാങ്കിലുമുള്ള ആയിരക്കണക്കിന് ഫലസ്തീനികൾ തെരുവുകളിലേക്ക് ഒഴുകിയിരുന്നു.