സ്​കൂളിൽ നിന്ന്​ വിളിച്ചിറക്കിയ മകനെ 28 വർഷം പൂട്ടിയിട്ടു; 70 കാരിക്കെതിരെ കേസ്​

സ്​റ്റോക്ക്​ഹോം (സ്വീഡൻ): മകനെ 28 വർഷം അപാർട്ട്​മെൻറിൽ പൂട്ടിയിട്ടതിന്​ 70 കാരി അറസ്​റ്റിൽ. സ്വീഡനിലാണ്​ സംഭവം. രോഗബാധിതയായ സ്​ത്രീയെ ആശുപ​ത്രി​യിലേക്ക്​ മാറ്റിയപ്പോഴാണ്​ മകനെ അപാർട്ട്​മെൻറിൽ നിന്ന്​ ഒരു ബന്ധു കണ്ടെത്തിയത്​. 41 വയസായ മകന്​ പല്ലുകളുണ്ടായിരുന്നില്ല. അതിഗുരുതരമായ പോഷകാഹാരക്കുറവും ഉണ്ടായിരുന്നു.

മകന്​ 12 വയസുള്ളപ്പോൾ സ്​കൂളിൽ നിന്ന്​ ഇറക്കി കൊണ്ടുവന്നതായിരുന്നു. അതിന്​ ശേഷം ആ കുട്ടിയെ ആരും കണ്ടിരുന്നില്ല. 28 വർഷങ്ങൾക്ക്​ ശേഷം അവനെ അവരുടെ അപാർട്ട്​മെൻറിൽ കണ്ടെത്തു​േമ്പാൾ സംസാരിക്കാൻ പോലും കഴിയുന്ന അവസ്​ഥയിലായിരുന്നില്ല.

ഇപ്പോൾ 70 വയസായ സ്​ത്രീയെ ആശുപ​ത്രി​യിലേക്ക്​ മാറ്റിയപ്പോൾ അവരുടെ ഒരു ബന്ധു അപാർട്ട്​മെൻറിൽ മകനായി തിരച്ചിൽ നടത്തുകയായിരുന്നു. വൃത്തിഹീനമായ നിലയിലായിരുന്നു അപാർട്ട്​മെൻറ്​. വർഷങ്ങളായി ജനവാതിലുകൾ പോലും തുറക്കാറുണ്ടായിരുന്നില്ലെന്ന്​ അയൽവാസികൾ പറഞ്ഞു. ആരുമായും അടുത്ത ബന്ധം സ്​ത്രീ സൂക്ഷിച്ചിരുന്നില്ലെന്നും അയൽവാസികൾ പറഞ്ഞു.

ആശുപത്രിയിൽ കഴിയുന്ന വൃദ്ധക്കെതിരെ പൊലീസ്​ കേസെടുത്തിട്ടുണ്ട്​. അപാർട്ട്​മെൻറ്​ പൊലീസ്​ സീൽ ചെയ്​തു​. അതേസമയം, സംഭവത്തിൽ വിശദീകരണമൊന്നും വൃദ്ധ നൽകിയിട്ടില്ല. സംഭവത്തിന്​ പിറകിലെ ദുരൂഹത പൊലീസ്​ അന്വേഷണത്തിലൂടെ പുറത്തുവരുമെന്ന പ്രതീക്ഷയിലാണ്​ അയൽവാസികളും ബന്ധുക്കളും.