കോവിഡിന്‍റെ ഉത്ഭവം കണ്ടെത്താൻ ലോകാരോഗ്യ സംഘടനയുമായി സഹകരിക്കും-​ ചൈനീസ്​ പ്രധാനമന്ത്രി

ചൈന കോവിഡ്​ വൈറസിന്‍റെ കാര്യത്തിൽ സുതാര്യവും സഹകരണപരവുമാണെന്നും വൈറസിന്‍റെ ഉത്ഭവം കണ്ടെത്താൻ ലോകാരോഗ്യ സംഘടനയുമായി (ഡബ്ല്യൂ.എച്ച്​.ഒ) തുടർന്നും ചേർന്ന്​ പ്രവർത്തിക്കുമെന്നും ചൈനീസ്​ പ്രധാനമന്ത്രി ലി കെഖിയാങ്​​ വ്യക്​തമാക്കി. കോവിഡ് -19 ഒരു ആഗോള ആരോഗ്യ അനിശ്ചിതത്വമാണെന്നും മറ്റ് രാജ്യങ്ങളെപ്പോലെ ചൈനയും അതിന്‍റെ ഉത്ഭവത്തെക്കുറിച്ച് എത്രയും വേഗം അറിയാൻ ആഗ്രഹിക്കുന്നുവെന്നും അദ്ദേഹം പറഞ്ഞു.

"ചൈന വസ്തുത അടിസ്ഥാനമാക്കിയുള്ള രീതിയിലും തുറന്നതും സുതാര്യവും സഹകരണപരവുമായ സമീപനത്തോടെയാണ് ഈ സാഹചര്യത്തിൽ പ്രവർത്തിച്ചത്. ചൈന സജീവമായി ലോകാരോഗ്യ സംഘടനയുമായി ആശയവിനിമയം കാത്തുസൂക്ഷിക്കുന്നുണ്ട്​. കൂടാതെ വൈറസിന്‍റെ ഉത്ഭവത്തെക്കുറിച്ച് പഠിക്കാനായി ചൈനയിൽ അവർ നടത്തുന്ന പ്രവർത്തനങ്ങൾക്കും ശക്​തമായ പിന്തുണനൽകുന്നുണ്ടെന്നും ചൈനീസ് പ്രധാനമന്ത്രിയെ ഉദ്ധരിച്ച്​ സിജിടിഎൻ റിപ്പോർട്ട്​ ചെയ്​തു​.

വൈറസ് ഉത്ഭവം കണ്ടെത്തുന്നത് സങ്കീർണ്ണമായ ഒരു ശാസ്ത്രീയ കാര്യമാണെന്നും രാജ്യങ്ങൾ തമ്മിലുള്ള സഹകരണവും നിരന്തരമായ ഗവേഷണവും ആവശ്യമാണെന്നും ലി പറഞ്ഞു. "കോവിഡ് -19 മനുഷ്യരാശിയുടെ പൊതു ശത്രുവാണ്, ഇത് ആഗോള സമൂഹത്തിലെ നിരവധി പേരെ ബാധിച്ചിട്ടുണ്ട്​. വൈറസിനെതിരെ നേരത്തെയുള്ള വിജയം നേടാൻ എല്ലാ രാജ്യങ്ങളും കൈകോർക്കുമെന്ന് ഞങ്ങൾ പ്രതീക്ഷിക്കുന്നു," അദ്ദേഹം പറഞ്ഞു.

അതേസമയം. വൈറസ്​ എങ്ങനെയാണ്​ പൊട്ടിപ്പുറപ്പെട്ടതെന്ന്​ എത്രയും പെട്ടന്ന്​ തന്നെ കണ്ടെത്തിയേക്കുമെന്ന്​ വൈറസിന്‍റെ ഉത്ഭവം കണ്ടെത്താൻ ചൈന സന്ദർശിച്ച ലോകാരോഗ്യ സംഘടനയുടെ സ്വതന്ത്ര സംഘത്തിലെ ഒരു പ്രമുഖ അംഗം വ്യക്​തമാക്കി. മൃഗങ്ങളിൽ നിന്ന്​ എങ്ങനെയാണ് വുഹാനിലെ ആളുകളിലേക്ക്​ മാരക വൈറസ്​ പടർന്നതെന്ന്​ കൂട്ടായ ശാസ്ത്ര ഗവേഷണത്തിലൂടെ കണ്ടെത്താനാകുമെന്ന് ന്യൂയോർക്ക് ആസ്ഥാനമായുള്ള ഇക്കോ ഹെൽത്ത് അലയൻസ് പ്രസിഡന്റ് പീറ്റർ ദാസ്സാക്ക് പറഞ്ഞു. കോവിഡ്​ വുഹാനിലെത്തിയതിന് ഏറ്റവും വലിയ വിശദീകരണമായി ചൂണ്ടിക്കാട്ടാൻ കഴിയുന്നത്​ അവിടുത്തെ വന്യജീവി വ്യാപാരമാണെന്നും അദ്ദേഹം കൂട്ടിച്ചേർത്തു.