സമ്പാദ്യത്തിൽനിന്ന്​ ചില്ലിക്കാശ്​ മകന്​ നൽകില്ലെന്ന്​ ജാക്കീ ചാൻ; ഇതാണ്​ കാരണം

തന്‍റെ സമ്പാദ്യത്തിൽ നിന്ന്​ ചില്ലിക്കാശ്​ മകന്​ നൽകില്ലെന്ന്​ ഹോളിവുഡ്​ ആക്ഷൻ ഹീറോ ജാക്കീചാൻ. 67 കാരനായ ജാക്കീ ചാൻ ലോകത്തിലെതന്നെ ഏറ്റവും പണക്കാരനായ നടന്മാരിൽ ഒരാളാണ്​. ഫോബ്​സിന്‍റെ കണക്കുപ്രകാരം 2019-20 കാലത്ത്​ ജാക്കീചാൻ സമ്പാദിച്ചത്​ 40 മില്യൺ ഡോളറാണ്​. കുങ്​ഫൂ മാസ്റ്റർകൂടിയായ ജാക്കിയുടെ ആകെ സമ്പാദ്യം ഏകദേശം 350 മില്യൺ ഡോളറെന്നാണ്​ കണക്കാക്കിയിരിക്കുന്നത്​.

ജാക്കിയുടെ ഒരേയൊരു മകനാണ്​ ജയ്​സീ ചാൻ. 1982ൽ ജോവാൻ ലിന്നുമായി നടത്തിയ വിവാഹബന്ധത്തിലാണ്​ ജയ്​സീ ജനിക്കുന്നത്​.നടനും സംഗീതജ്ഞനുമാണ് ഈ യുവാവ്​. ജയ്​സീയുടെ വഴിവിട്ട പോക്കിൽ ഏ​െറക്കാലമായി ജാക്കീ ചാൻ അസ്വസ്​ഥനാണ്​. കുറേ നാളുകൾക്കുമുമ്പ്​ ജയ്​സീയെ മയക്കുമരുന്ന്​ കൈവശം വച്ചതിന്​ പൊലീസ്​ പിടികൂടിയിരുന്നു.'അയാൾക്ക് കഴിവുണ്ടെങ്കിൽ സ്വന്തമായി പണം സമ്പാദിക്കാൻ കഴിയും. ഇല്ലെങ്കിൽ അയാൾ എന്‍റെ പണം പാഴാക്കുകയേയുള്ളൂ' എന്നാണ്​ അന്ന്​ ജാക്കീചാൻ പ്രതികരിച്ചത്​. അന്ന്​ ജാക്കി തന്‍റെ മകനുവേണ്ടി മാപ്പ് പറഞ്ഞിരുന്നു.

'ചെറുപ്പക്കാർ ജെയ്‌സിയെ മാതൃകയാക്കരു​െതന്നും മയക്കുമരുന്നിൽ നിന്ന് അവൻ വിട്ടുനിൽക്കുമെന്ന്​ ഞാൻ പ്രതീക്ഷിക്കുന്നതയും' അദ്ദേഹം പറഞ്ഞു. 'എന്‍റെ മകനെ നല്ലകാര്യങ്ങൾ പഠിപ്പിക്കുന്നതിൽ ഞാൻ പരാജയപ്പെട്ടു. അതിന്‍റെ ഉത്തരവാദിത്വം എനിക്കാണ്​. ജയ്‌സിയും ഞാനും സമൂഹത്തോട് ക്ഷമ ചോദിക്കുന്നു'-ജാക്കീചാൻ പറഞ്ഞു.

ഇത്തരം അസ്വാരസ്യങ്ങൾ വർധിച്ചതായാണ്​ ജാക്കീചാന്‍റെ പുതിയ പ്രസ്​താവന സൂചിപ്പിക്കുന്നത്​. തന്‍റെ സമ്പാദ്യം ജീവകാരുണ്യപ്രവർത്തനത്തിന്​ നൽകിയാലും മകന്​ നൽകില്ലെന്നാണ്​ ജാക്കീചാൻ പറയുന്നത്​.