ബംഗ്ലദേശിലെ മ്യാന്മർ അഭയാർഥി ക്യാമ്പിലെ വൻ അഗ്​നിബാധ; എല്ലാം നഷ്​ടപ്പെട്ട്​ പതിനായിരങ്ങൾ

ധാക്ക: മ്യാന്മർ സേനയുടെ വംശഹത്യയിൽനിന്ന്​ ഓടിരക്ഷപ്പെട്ട്​ ബംഗ്ലദേശിൽ അഭയം തേടിയവർക്കു പിന്നാലെ വീണ്ടും പരീക്ഷണത്തിന്‍റെ നാളുകൾ. കോക്​സ്​ ബസാറിൽ അഭയാർഥികൾ തിങ്ങിത്താമസിച്ച ക്യാമ്പുകളിൽ കഴിഞ്ഞ ദിവസമുണ്ടായ വൻ അഗ്​നിബാധയാണ്​ ഏറ്റവുമൊടുവിൽ അവരുടെ ജീവിതത്തിൽ കരിനിഴൽ വീഴ്​ത്തിയത്​. ഏഴു ലക്ഷം പേരാണ്​ കോക്​സ്​ ബസാറിലെ ക്യാമ്പുകളിലുള്ളത്​. പലഘട്ടങ്ങളിലായി അഗ്​നിയെടുത്ത ഇവിടെ അവശേഷിച്ച ക്യാമ്പുകൾ കൂടി വെണ്ണീറായതോടെ ഇനിയെന്തു ചെയ്യുമെന്നതാണ്​ അഭയാർഥികൾ നേരിടുന്ന വലിയ ചോദ്യം.

ലോകത്തെ ഏറ്റവും വലിയ അഭയാർഥി ക്യാമ്പിലുണ്ടായ അവസാനത്തെ അഗ്​നിബാധയിൽ മാത്രം 15 പേർ വെന്തുമരിച്ചിട്ടുണ്ട്​. നൂറുകണക്കിന്​ പേർക്ക്​ പൊള്ളലേൽക്കുകയും ചെയ്​തു.

വീടു നഷ്​ടമായ പതിനായിരങ്ങൾ ഇനിയെന്തു ചെയ്യുമെന്നറിയാതെ കാത്തിരിക്കുന്നതാണ്​ ഏറ്റവും വലിയ പ്രതിസന്ധി. ഉള്ളതെല്ലാം അഗ്​നിയെടുത്തതോടെ അന്തിയുറങ്ങാൻ പോലും വഴിയടഞ്ഞ ദാരുണ അവസ്​ഥ അവരെ തുറിച്ചുനോക്കുന്നു. ശക്​തമായ കാറ്റും ചൂടുപിടിച്ച്​ പൊട്ടിത്തെറിച്ച ഗാസ്​ സിലിണ്ടറുകളും കൂടിയായതോടെ ക്യാമ്പുകളിലേറെയും അതിവേഗം നശിച്ചു. പകരം ബംഗ്ലദേശ്​ റെഡ്​ ക്രസന്‍റ്​ സൊസൈറ്റിയുടെ സഹായത്തോടെ സ്​ഥാപിച്ച 800 തമ്പുകളിൽ കുറെ പേർ അഭയം തേടിയിട്ടുണ്ട്​.

വെള്ളിയാഴ്ചയോടെ കുറെ പേർ മുളയും ടാർപോളിനും സ്വന്തമാക്കി പഴയ താത്​കാലിക വീടുകൾ വീണ്ടും നിർമാണം തുടങ്ങിയിട്ടുണ്ട്​. സഹായവുമായി രാജ്യാന്തര സംഘടനകളും രംഗത്തുണ്ട്​.

സുരക്ഷ സംവിധാനങ്ങൾ തീരെയില്ലാത്ത ക്യാമ്പുകളിൽ അഗ്​നി പടരുക അതിവേഗമാണ്​. സുരക്ഷാസേനക്ക്​ അവശ്യ സേവനങ്ങളുമായി എത്തുക പ്രയാസം.