യു.എസ്​ സ്കൂളിലെ വെടിവെപ്പ്​; അക്രമി നിയമപരമായി സ്വന്തമാക്കിയത്​ ഏഴ്​ ആയുധങ്ങൾ; മൂന്നെണ്ണം ഉപയോഗിച്ചു

വാഷിംഗ്ടൺ: യു.എസ്​ നാഷ്​വില്ലെയിലെ കോൺവെൻറ്​ സ്കൂളിൽ വെടിവെപ്പിൽ ആറ്​ പേരെ കൊലപ്പെടുത്തിയ അക്രമി നിയമപരമായി ഏഴ്​ ആയുധങ്ങൾ സ്വന്തമാക്കിയിരുന്നതായി പൊലീസ്​ അറിയിച്ചു. ഇതിൽ മൂന്നെണ്ണം ഉപയോഗിച്ചാണ്​ സ്കൂളിൽ ആറുപേരെ കൊലപ്പെടുത്തിയത്​. പ്രതി ഓഡ്രി ഹെയ്ൽ (28) അഞ്ച് വ്യത്യസ്ത പ്രാദേശിക ആയുധ വിൽപന സ്​റ്റോറുകളിൽ നിന്നാണ് ആയുധങ്ങൾ വാങ്ങിയതെന്നും നിയമപരമായി വാങ്ങിയതാണെന്നും മെട്രോ നാഷ്‌വില്ലെ പൊലീസ് ഡിപ്പാർട്ട്‌മെന്റ് ചീഫ് ജോൺ ഡ്രേക്ക് വാർത്താസമ്മേളനത്തിൽ പറഞ്ഞു.

തിങ്കളാഴ്ച യു.എസിലെ സ്കൂളിൽ ഉണ്ടായ വെടിവെപ്പിൽ മൂന്ന്​ കുട്ടികൾ അടക്കം ആറുപേർ കൊല്ലപ്പെട്ടിരുന്നു. നാഷ്‌വില്ലെയിലെ ഒരു സ്വകാര്യ എലിമെന്ററി സ്‌കൂളിൽ കൃത്യമായി ആസൂത്രണം ചെയ്‌ത ആക്രമണത്തിൽ മൂന്ന് കൊച്ചുകുട്ടികളെയും മൂന്ന് ജീവനക്കാരെയുമാണ്​ അക്രമി കൊലപ്പെടുത്തിയത്​. ഇവർ പൊലീസ് വെടിയേറ്റ് മരിച്ചിരുന്നു. ഓഡ്രി ഹെയ്ൽ (28) ആണ്​ പ്രതിയെന്ന്​ പൊലീസ്​ അറിയിച്ചു. ഇവർ ട്രാൻസ്​ജെൻഡർ ആണ്​. സ്കൂളിന്‍റെ ഭൂപടവും വഴികളും ഒക്കെ രേഖപ്പെടുത്തുന്ന ചിത്രങ്ങളും ആയാണ്​ അക്രമി എത്തിയത്​. ഒന്നിലധികം സ്ഥലങ്ങളിൽ ആക്രമണത്തിന്​ പദ്ധതിയിട്ടാണ്​ ഓഡ്രി ഹെയ്ൽ എത്തിയതെന്ന്​ എൻ‌.ബി‌.സി ന്യൂസിന് നൽകിയ അഭിമുഖത്തിൽ ഉന്നത പൊലീസ്​ ഉദ്യോഗസ്ഥൻ പറഞ്ഞു.

കൊല്ലപ്പെട്ട ആറ് പേരെ പൊലീസ് തിരിച്ചറിഞ്ഞു. മൂന്ന് കുട്ടികളിൽ ഒരാൾക്ക് എട്ട് വയസ്സും രണ്ട് പേർക്ക് ഒമ്പത് വയസ്സുമുണ്ടെന്നും കൊല്ലപ്പെട്ട മുതിർന്നവർ 60 നും 61 നും ഇടയിൽ പ്രായമുള്ളവരാണെന്നും അധികൃതർ പറഞ്ഞു.