ശതകോടികൾ നഷ്​ടമുണ്ടാക്കി ആ യു.എസ്​ യുദ്ധക്കപ്പൽ കത്തിയമർന്നത്​ നാവികൻ തീകൊടുത്തായിരുന്നു

വാഷിങ്​ടൺ: കടലിലും കരയിലും യുദ്ധങ്ങൾ നയിച്ച്​ അമേരിക്കൻ നാവിക സേനയുടെ അവിഭാജ്യ ഘടകമായിരുന്ന യു.എസ്​.എസ്​ ബോൻഹോം റിച്ചാഡ്​ കത്തിയമർന്ന കേസിൽ നാവികനെതിരെ കേസെടുത്ത്​ യു.എസ് നാവിക സേന​. സാൻ ഡീഗോ തുറമുഖത്ത്​ നിർത്തിയിട്ട യുദ്ധക്കപ്പലിൽ ആളിപ്പടർന്ന തീ നാലു നാളിലേറെ എടുത്ത്​ അണച്ചെങ്കിലും നന്നാക്കാനാവാത്ത വിധം നാശം പറ്റിയതോടെ ഉപേക്ഷിക്കേണ്ടിവന്നിരുന്നു.

കഴിഞ്ഞ വർഷം ജൂലൈ 12നാണ്​ കപ്പലിനുള്ളിൽ തീ പടർന്നത്​. 25 കോടി ഡോളർ​ ചെലവിട്ട്​ അറ്റകുറ്റപ്പണികളും ആധുനികീകരണവും പൂർത്തിയാകുന്നതിനിടെയായിരുന്നു സംഭവം. അമേരിക്കൻ നാവിക സേനയുടെ ചരിത്രത്തിലെ ഏറ്റവും വലിയ അഗ്​നിബാധയാണിത്​. നാവിക സേനാംഗമാണ്​ തീ കൊളുത്തിയത്​. ഇദ്ദേഹത്തിനെതിരെ കേസ്​ എടുത്തിട്ടുണ്ടെങ്കിലും പേരു വിവരങ്ങൾ പുറത്തുവിട്ടിട്ടില്ല. പുനരുപയോഗത്തിന്​ സാധ്യമല്ലാത്ത വിധം നശിച്ച കപ്പൽ പിന്നീട്​ ആക്രിയാക്കി ഉപേക്ഷിക്കുകയായിരുന്നു.

14 തട്ടുകളുള്ള, 40,000 ടൺ ഭാരമുള്ളതാണ്​ യുദ്ധക്കപ്പൽ. തുറന്ന ഭാഗങ്ങളിലൂടെ പുക പുറത്തുവന്നപ്പോഴാണ്​ അഗ്​നിബാധ പുറത്തറിഞ്ഞത്​. അനേക കിലോമീറ്ററുകൾ ദൂരം പുക പടർന്നത് രക്ഷാദൗത്യം ദുഷ്​കരമാക്കി. കപ്പലിനുള്ളിൽ 1,000 ഡിഗ്രി വരെയായി മർദം ഉയർന്നു. ശക്​തമായ കാറ്റ്​​ തീ പടരാനിടയാക്കി. വെള്ളത്തിനുമുകളിലായുണ്ടായിരുന്ന കപ്പലിന്‍റെ എല്ലാ നിലുകളും തകർന്നു.

സംഭവം നടക്കു​േമ്പാൾ കുറച്ചു ജീവനക്കാർ മത്രമേ അകത്തുണ്ടായിരുന്നുള്ളൂ. അവർ​ കാര്യമായ പരിക്കേൽക്കാതെ രക്ഷപ്പെട്ടു. 16 കപ്പലുകളിലായി 400 നാവികർ ചേർന്നാണ്​ തീയണക്കാൻ ശ്രമം നടത്തിയത്​. ഹെലികോപ്​റ്ററുകളും പങ്കാളികളായി.

കപ്പൽ അറ്റകുറ്റപ്പണി നടത്തുന്നത്​ സംബന്ധിച്ച്​ തുടക്കത്തിൽ ആലോചനയുണ്ടായിരുന്നുവെങ്കിലും ചെലവ്​ 250 കോടി ഡോളറിലേറെ വരുമെന്ന്​ കണ്ടതോടെ ഒഴിവാക്കാമെന്നായി. കഴിഞ്ഞ നവംബറിലാണ്​ കപ്പൽ ആക്രിയാക്കാൻ അന്തിമ തീരുമാനമുണ്ടായത്​. അതിനും മൂന്നു കോടി ഡോളർ നാവിക സേനക്ക്​ ചെലവ്​ വരും.

കഴിഞ്ഞ ഏപ്രിലിൽ ഡികമീഷൻ ചെയ്​ത കപ്പൽ പാനമ കനാൽ വഴി ടെക്​സസിലെത്തിച്ചിട്ടുണ്ട്​. കരയിലെയും കടലിലെയും സൈനിക ദൗത്യങ്ങൾക്ക്​ ഉപയോഗിക്കാൻ ശേഷിയുള്ള ​10 യു.എസ്​ യുദ്ധക്കപ്പലുകളിലൊന്നാണ്​ യു.എസ്​.എസ്​ ബോൻഹോം റിച്ചാഡ്​. അതിന്‍റെ നഷ്​ടം രാജ്യത്തിന്​ ആഘാതമാകും.