ഡ്രോൺ ആക്രമണം: കൊല്ലപ്പെട്ട അഫ്​ഗാനികളുടെ കുടുംബത്തിന്​ നഷ്​ടപരിഹാരം –യു.എസ്​

വാഷിങ്​ടൺ: ഇക്കഴിഞ്ഞ ആഗസ്​റ്റിൽ അഫ്​ഗാനിസ്​താനിൽ യു.എസ്​ നടത്തിയ ഡ്രോൺ ആക്രമണത്തിൽ കൊല്ലപ്പെട്ടവരുടെ കുടുംബത്തിന്​ നഷ്​ടപരിഹാരം നൽകുമെന്ന്​ പെൻറഗൺ. ഏഴുകുട്ടികളടക്കം 10 നിരപരാധികളാണ്​ ആക്രമണത്തിൽ കൊല്ലപ്പെട്ടത്​.

ആക്രമണത്തിൽ സാധാരണക്കാർ കൊല്ലപ്പെട്ടതിൽ യു.എസ്​ മാപ്പുപറഞ്ഞിരുന്നു. കൊല്ലപ്പെട്ടവരുടെ ബന്ധുക്കൾ അഫ്​ഗാൻ വിടാൻ ആഗ്രഹിക്കുന്നുണ്ടെങ്കിൽ സഹായം സ്​റ്റേറ്റ്​ ഡിപ്പാർട്ടുമെൻറുമായി സഹകരിച്ച്​ നൽകുമെന്നും പെൻറഗൺ അറിയിച്ചു. കാബൂളിലെ വിമാനത്താവളത്തിൽ ആക്രമണം നടത്തിയ ഐ.എസ്​ ഭീകരനെന്ന്​ തെറ്റിദ്ധരിച്ചാണ്​ എസ്​മറായ്​ അഹ്​മദിയെയും കുടുംബത്തെയും യു.എസ്​ ഇൻറലിജൻസ്​ സംഘം ഡ്രോൺ ആ​ക്രമണത്തിലൂടെ കൊലപ്പെടുത്തിയത്​.ഇതിനെതിരെ വ്യാപക പ്രതിഷേധമുയർന്നിരുന്നു.

പിന്നാലെ ഡ്രോൺ ആക്രമണം അബദ്ധമാണെന്ന്​ യു.എസ്​ സമ്മതിക്കുകയും ചെയ്​തിരുന്നു. മതിയായ നഷ്​ടപരിഹാരം നൽകണമെന്നും നിരപരാധികളെ കൊലപ്പെടുത്തിയതിന്​ യു.എസ്​ മാപ്പുപറയ​ണമെന്നും ആവശ്യപ്പെട്ട്​ കൊല്ലപ്പെട്ടവരുടെ കുടുംബം രംഗത്തുവരുകയും ചെയ്​തു.