നൊബേൽ ജേതാവും കവയിത്രിയുമായ ലൂയിസ് ഗ്ലക്ക് അന്തരിച്ചു

വാഷിങ്ടൺ: സാഹിത്യ നൊബേൽ പുരസ്കാര ജേതാവായ അമേരിക്കൻ കവയിത്രി ലൂയിസ് ഗ്ലക്ക് അന്തരിച്ചു. 80 വയസായിരുന്നു. വെള്ളിയാഴ്ച കേംബ്രിഡ്ജിലെ വസതിയിൽ വെച്ചായിരുന്നു അന്ത്യം. അർബുദബാധിതയായിരുന്നു. ​2020ലാണ് ലൂയിസ് ഗ്ലക്കിന് സാഹിത്യ നൊബേൽ ലഭിച്ചത്. യേൽ സർവകലാശലാ പ്രഫസറായിരിക്കെ 1968ലാണ് ഇവരുടെ ആദ്യകവിത സമാഹാരമായ ഫസ്റ്റ്ബോൺ പുറത്തിറങ്ങിയത്. ഇത് ഏറെ ചർച്ച ചെയ്യപ്പെട്ടു.

1993ൽ ദ വൈൽഡ് ഐറിസ് എന്ന കവിത സമാഹാരത്തിന് ഗ്ലക്കിന് പുലിറ്റ്സർ പുരസ്കാരം ലഭിച്ചിട്ടുണ്ട്. 2016ൽ അന്നത്തെ യു.എസ് പ്രസിഡന്റായിരുന്ന ബറാക് ഒബാമ നാഷനൽ ഹ്യുമാനിറ്റീസ് മെഡൽ നൽകി ആദരിച്ചിരുന്നു.

12 കവിത സമാഹാരങ്ങളും രണ്ട് പ്രബന്ധങ്ങളും രചിച്ചിട്ടുണ്ട്. ന്യൂയോർക്കിൽ ജനിച്ച ​ഗ്ലക്ക് സാഹിത്യ നൊബേൽ നേടുന്ന 16ാമത്തെ വനിതയാണ്. ബാല്യകാലത്തിൽ തന്നെ എഴുതിത്തുടങ്ങി. രണ്ടുതവണ വിവാഹിതയായെങ്കിലും ബന്ധങ്ങൾ അധികകാലം നീണ്ടുനിന്നില്ല.