ട്രഷറി, കൊമേഴ്​സ്​ വകുപ്പുകൾക്ക്​ പിന്നാലെ ഊർജ്ജ വകുപ്പും ഹാക്ക്​ ചെയ്യപ്പെട്ടു; യു.എസിൽ സൈബർ ആക്രമണം തുടരുന്നു

വാഷിങ്​ടൺ: അമേരിക്കയിൽ സൈബർ ആക്രമണങ്ങളുടെ ഭീതി തുടരുന്നു. ട്രഷറി, കൊമേഴ്‌സ്, ഹോംലാൻഡ്​ സെക്യൂരിറ്റി (ഡി.എച്ച്​.എസ്​) അടക്കമുള്ള വിവിധ വകുപ്പുകൾ ശക്​തമായ സൈബർ ആക്രമണത്തിന്​ ഇരയായിരുന്നു. എന്നാൽ, രാജ്യത്തെ ഉൗർജ്ജ വകുപ്പും ഹാക്ക്​ ചെയ്യപ്പെട്ടതായുള്ള ഞെട്ടിക്കുന്ന റിപ്പോർട്ടുകളാണ്​ ഇപ്പോൾ പുറത്തുവരുന്നത്​. അമേരിക്കയിലെ ആണവായുധങ്ങളെ നിയന്ത്രിക്കുന്നത്​ ഇൗ വിഭാഗമാണ്​.

സൈബർ ആക്രണമങ്ങൾക്ക്​ പിന്നിൽ റഷ്യൻ ഗവൺമെൻറാണെന്ന്​ സംശയമുന്നയിച്ച്​​ നിരവധിയാളുകൾ മുന്നോട്ടുവന്നെങ്കിലും അത്തരം ആരോപണങ്ങൾ ബന്ധപ്പെട്ടവർ തള്ളിക്കളയുകയായിരുന്നു. എന്നാൽ, വിവിധ യുഎസ്​ വകുപ്പുകളെ ലക്ഷ്യമിട്ട്​ ഒരു വിദേശ രാജ്യമാണ്​ സൈബർ ആക്രമണം നടത്തുന്നതെന്ന്​ അധികൃതർ വ്യക്​തമാക്കിയിരുന്നു. പ്രസിഡൻറ്​ ഡോണൾഡ്​ ട്രംപ്​ ഇതുവരെ സംഭവത്തിൽ പ്രതികരണം അറിയിച്ചിട്ടില്ല. അതേസമയം, ത​െൻറ ഭരണത്തിൽ സൈബർ സുരക്ഷയ്​ക്ക്​ മുൻഗണന നൽകുമെന്ന്​ നിയുക്​ത അമേരിക്കൻ പ്രസിഡൻറ്​ ജോ ബൈഡൻ ഉറപ്പുനൽകിയിട്ടുണ്ട്​.

ഹാക്കിങ്​ നടത്തി സുപ്രധാന വിവരങ്ങൾ ചോർത്തിയേക്കാവുന്ന ചില അപകടകാരികളായ സോഫ്​റ്റ്​വെയറുകൾ കണ്ടെത്തിയതായി മൈക്രോസോഫ്​റ്റ്​ മുന്നറിയിപ്പ്​ നൽകിയിട്ടുണ്ട്​. സോഫ്റ്റ്‍വെയർ നിർമ്മാതാക്കളായ സോളര്‍വിന്‍ഡ്‌സ് ഓറിയോണ്‍ ഐടി ഉൽപന്നങ്ങള്‍ ഉപയോഗിക്കുന്നത് ഉടൻ നിര്‍ത്തണമെന്ന് എല്ലാ വകുപ്പുകളോടും സൈബര്‍ സെക്യൂരിറ്റി ആന്‍ഡ് ഇന്‍ഫ്രാസ്ട്രക്ചര്‍ സെക്യൂരിറ്റി ഏജൻസി നിർദേശിച്ചിട്ടുണ്ട്​. അടുത്തിടെ പുറത്തുവിട്ട ചില സോഫ്​റ്റ്​വെയറുകൾ ഹാക്കർമാർ ദുരുപയോഗപ്പെടുത്തുന്നുണ്ടെന്ന്​ സോളർവിൻഡ്​സ്​ മുമ്പ്​ സൂചിപ്പിച്ചിരുന്നു.