കോവിഡ്​: പ്ലാസ്​മ തെറാപ്പിക്ക്​ അനുമതി നൽകി യു.എസ്​

വാഷിങ്​ടൺ: ലോകത്തിൽ ഏറ്റവും കൂടുതൽ കോവിഡ്​ രോഗികളും മരണം സംഭവിച്ച യു.എസിൽ പ്ലാസ്​മ തെറാപ്പിക്ക്​ അടിയന്തര അനുമതി നൽകിയതായി അധികൃതർ.

ലോകത്തെ ഏറ്റവും വലിയ സമ്പദ്‌വ്യവസ്ഥയെ സ്വാധീനിച്ച കോവിഡ്​ വ്യാപനം തടയാൻ പ്രസിഡൻറ്​ ഡൊണാൾഡ് ട്രംപ് കടുത്ത സമ്മർദ്ദം നേരിടുകയും നവംബറിൽ തെരഞ്ഞെടുപ്പ് നടക്കാനിരിക്കുയും ചെയ്യുന്ന സാഹചര്യത്തിലാണ്​ പ്ലാസ്​മ തെറാപ്പിക്ക്​ ഫുഡ് ആൻഡ് ഡ്രഗ് അഡ്മിനിസ്ട്രേഷ​െൻറ അംഗീകാരം ലഭിച്ചത്.

രോഗത്തെ പ്രതിരോധിക്കുന്നതിനും വൈറസ്​ ബാധിതരെ ഗുരുതരാവസ്ഥയി​ൽ നിന്ന്​ സംരക്ഷിക്കുകയും ചെയ്യുന്ന ആൻറിബോഡികൾ രക്ത പ്ലാസ്മയിൽ അടങ്ങിയിട്ടുണ്ടെന്നാണ്​ കണ്ടെത്തൽ. ഇന്ത്യ ഉൾപ്പെടെയുള്ള രാജ്യങ്ങളിൽ ഗുരുതരാവസ്ഥയിലുള്ള രോഗികളിൽ ചികിത്സയുടെ ഭാഗമായി പ്ലാസ്​മ തെറാപ്പി നടത്തുന്നുണ്ട്​.

പ്ലാസ്​മ തെറാപ്പി കോവിഡ്​ ചികിത്സക്ക്​ ഫലപ്രദമാകാം. ഇതിൻെറ അറിയപ്പെടുന്നതും സാധ്യതയുള്ളതുമായ നേട്ടങ്ങൾ‌ രോഗത്തി​െൻറ അപകടസാധ്യതകളെ മറികടക്കുന്നതാണ്​ - എഫ്.ഡി.‌എ പ്രസ്താവനയിൽ പറഞ്ഞു.

അമേരിക്കയിലെ ചിലയിടങ്ങളിലും ഇന്ത്യ ഉൾപ്പെടെയുള്ള രാജ്യങ്ങളിലും രോഗികളിൽ പ്ലാസ്​മ ചികിത്സ ഇതിനകം ഉപയോഗിച്ചുവെങ്കിലും, അതിൻെറ ഫലപ്രാപ്തിയെ കുറിച്ച്​ ചർച്ചകൾ നടക്കുന്നുണ്ട്​എ. മാത്രമല്ല ഇത് പാർശ്വഫലങ്ങൾ ഉണ്ടാക്കുമെന്ന് വിദഗ്​ധർ മുന്നറിയിപ്പ്​ നൽകുന്നു.

പ്ലാസ്​മ തെറാപ്പിക്ക്​ അടിയന്തര അംഗീകാരം നൽകുമെന്ന്​ ട്രംപ്​ നേരത്തെ പറഞ്ഞിരുന്നു. എന്നാൽ ഇത്​ സംബന്ധിച്ച്​ വൈറ്റ്​ ഹൗസ്​ ഇതുവരെ പ്രതികരിച്ചിട്ടില്ല.

ഗുരുതരമായ രോഗം ബാധിച്ചവരിൽ എഫ്​.ഡി.എ ഇതിനകം തന്നെ പ്ലാസ്മ തെറാപ്പി അനുവദിച്ചിട്ടുണ്ട്​. ഇത്തരത്തിൽ യു.എസിലെ 70,000 വൈറസ് ബാധിതർക്ക്​ പ്ലാസ്​മ തെറാപ്പി ലഭിച്ചതായാണ്​ റിപ്പോർട്ട്​.

യു.എസിൽ ഇതുവരെ 5,874,146 പേർക്ക്​ കോവിഡ്​ സ്ഥിരീകരിക്കുകയും 180,604 പേർ മരണത്തിന്​ കീഴടങ്ങുകയും ചെയ്​തു. നിലവിൽ 2,526,479 കോവിഡ്​ രോഗികളാണ്​ ചികിത്സയിലുള്ളത്​.