പ്രതികാര ഭീഷണിയുമായി വീണ്ടും ഇറാൻ; തിരിച്ചുവിളിച്ച യുദ്ധക്കപ്പൽ ഗൾഫിൽ നിലനിർത്തി അമേരിക്ക

ഇറാനുമായി സംഘർഷം ഉടൻ അവസാനിപ്പിക്കില്ലെന്ന സുചനയുമായി യുദ്ധക്കപ്പൽ ഗൾഫ്​ കടലിൽ നിലനിർത്തി​​ യു.എസ്​. 'ഇറാൻ ഭീഷണി' അവസാനിച്ചില്ലെന്ന വാദമുയർത്തിയാണ്​ നിരവധി യുദ്ധവിമാനങ്ങളുമായി ഗൾഫിലെത്തിയ യു.എസ്​.എസ്​ നിമിറ്റ്​സ്​ യുദ്ധസജ്ജമായി ഹുർമുസ്​ കടലിനോട്​ ചേർന്ന്​ നങ്കൂരമിട്ടുനിൽക്കുന്നത്​. കഴിഞ്ഞ നവംബർ മുതൽ ഗൾഫ്​ കടലിൽ സ്​ഥിര സാന്നിധ്യമായ യു.എസ്​.എസ്​ നിമിറ്റ്​സ്​ അടിയന്തരമായി തിരിച്ചുവിളിച്ച്​ നേരത്തെ പെൻറഗൺ ഉത്തരവിട്ടിരുന്നു.

ഇറാൻ സൈനിക മേധാവി ഖാസിം സുലൈമാനിയെ ബോംബ്​ വർഷിച്ച്​ വധിച്ചതി​െൻറ ഒന്നാം വാർഷികത്തിൽ പ്രതികാരമുണ്ടാകുമെന്ന്​ ഭയന്ന്​ മേഖലയിൽ അമേരിക്ക നേരത്തെ സൈനിക സാന്നിധ്യം ശക്​തമാക്കിയിരുന്നു. കര, നാവിക, വ്യോമ ​സേനയും യുദ്ധവിമാനങ്ങളും മിസൈലുകളും കൂട്ടമായി അണിനിരത്തിയെങ്കിലും ഇറാൻ വാക്കുകളിൽ പ്രതികാരം അവസാനിപ്പിച്ച​ത്​ മേഖലയെ താത്​കാലികമായി സമാധാനത്തിലാക്കിയിരുന്നു. എന്നാൽ, ഖാസിം സുലൈമാനി വധത്തിന്​ പ്രതികാരം ഉറപ്പാണെന്ന്​ ഇറാൻ കഴിഞ്ഞ ദിവസവും നയം വ്യക്​തമാക്കിയതോടെയാണ്​ യു.എസ്​.എസ്​ നിമിറ്റ്​സിനെ പിൻവലിക്കാനുള്ള തീരുമാനം പിൻവലിക്കാൻ യു.എസ്​.എസിന്​ പ്രേരകമായത്​.

ഇറാഖ്​ തലസ്​ഥാനമായ ബഗ്​ദാദിൽ ഡ്രോണുകൾ ഉപയോഗിച്ചുള്ള ആക്രമണത്തിലായിരുന്നു കഴിഞ്ഞ വർഷം ജനുവരി മൂന്നിന്​ ഖാസിം സുലൈമാനി കൊല്ലപ്പെട്ടത്​. ഇറാഖി സൈനിക പ്രമുഖൻ അബൂ മഹ്​ദി അൽമുഹൻദിസും സംഭവത്തിൽ കൊല്ലപ്പെട്ടു.

വാർഷിക ദിനമായ ഞായറാഴ്​ച ഇറാഖിലുടനീളം അമേരിക്കൻ സേന ഉടൻ പിൻമാറണമെന്നാവശ്യപ്പെട്ട്​ ജനം തെരുവിലിറങ്ങിയിരുന്നു. ഇറാൻ, സിറിയ, ലബനാൻ, യെമൻ എന്നിവിടങ്ങളിലും പ്രതിഷേധം കനത്തു.