വാക്​സിനെടുക്കാത്ത ജീവനക്കാരെ പുറത്താക്കുമെന്ന്​ വിമാനകമ്പനികൾ

വാഷിങ്​ടൺ: വാക്​സിനെടുക്കാത്ത ജീവനക്കാർക്ക്​ മുന്നറിയിപ്പുമായി രണ്ട്​ വിമാനകമ്പനികൾ. ജീവനക്കാരെ പിരിച്ചുവിടുകയോ നിർബന്ധിത വേതനമില്ലാത്ത അവധിയിൽ പ്രവേശിപ്പിക്കുകയോ ചെയ്യുമെന്നാണ്​ കമ്പനികൾ വ്യക്​തമാക്കുന്നത്​. കാനഡ കേന്ദ്രമാക്കി പ്രവർത്തിക്കുന്ന വെസ്റ്റ്​ജെറ്റും യു.എസിലെ യുണൈറ്റഡ്​ എയർലൈൻസുമാണ്​ ജീവനക്കാർക്ക്​ മുന്നറിയിപ്പുമായി രംഗത്തെത്തിയിരിക്കുന്നത്​.

സെപ്​റ്റംബർ 24നകം വാക്​സിൻ സ്റ്റാറ്റസ്​ അറിയിക്കാൻ ജീവനക്കാരോട്​ വെസ്റ്റ്​ജെറ്റ്​ നിർദേശിക്കുന്നുണ്ട്​. ഒക്​ടോബർ 30നകം എല്ലാ ജീവനക്കാരോടും വാക്​സിനെടുക്കാനും കമ്പനി ആവശ്യപ്പെട്ടു. സെപ്​റ്റംബർ 27നകം വാക്​സിനെടുക്കണമെന്നാണ്​ യുണൈറ്റഡ്​ എയർലൈൻസിന്‍റെ നിർദേശം. ആരോഗ്യപ്രശ്​നങ്ങൾ മതപരമായ വിശ്വാസങ്ങൾ എന്നിവ മൂലം വാക്​സിനെടുക്കാത്തവർക്ക്​ ഇതിനായി അഞ്ചാഴ്ച കൂടി അനുവദിക്കും. വാക്​സിനെടുക്കാത്ത ജീവനക്കാർക്കെതിരെ നടപടിയുണ്ടാകുമെന്നും എയർലൈൻ വ്യക്​തമാക്കുന്നു.

വാക്​സിനെടുക്കാത്ത ജീവനക്കാരിൽ നിന്നും 200 ഡോളർ സർചാർജ്​ ഈടാക്കുമെന്ന്​ ഡെൽറ്റ എയറും പറഞ്ഞു. കോവിഡ്​ ഡെൽറ്റ വകഭേദത്തെ തുടർന്ന്​ നിരവധി പേരാണ്​ യു.എസിൽ രോഗബാധിതരാവുന്നത്​. ഇതിനിടെയാണ്​ വാക്​സിനെടുക്കാത്ത ജീവനക്കാർക്ക്​ ശക്​തമായ മുന്നറിയിപ്പുമായി വിമാന കമ്പനികൾ രംഗത്തെത്തുന്നത്​.