യു.കെയിൽ കോവിഡിന്‍റെ മൂന്നാം തരംഗം തുടങ്ങിയെന്ന്​ മുന്നറിയിപ്പ്​

ലണ്ടൻ: കോവിഡ്​ നിയന്ത്രണങ്ങളിൽ ഇളവ്​ വരുത്താനുള്ള തീരുമാനം പുറത്ത്​ വന്നതിന്​ ​ പിന്നാലെ യു.കെയിൽ കോവിഡിന്‍റെ മൂന്നാം തരംഗം തുടങ്ങിയെന്ന്​ മുന്നറിയിപ്പ്​. പ്രധാനമന്ത്രി ബോറിസ്​ ജോൺസന്‍റെ ശാസ്​ത്ര ഉപദേഷ്​ടാവാണ്​ ഇതുസംബന്ധിച്ച മുന്നറിയിപ്പ്​ നൽകിയത്​. ​ഇന്ത്യയിൽ കണ്ടെത്തിയ കൊറോണ വൈറസ്​ വകേഭദം യു.കെയിൽ മൂന്നാം തരംഗത്തിന്​ കാരണമാവുമെന്നാണ്​ ആശങ്ക.

ജൂൺ 21 മുതൽ കോവിഡ്​ നിയന്ത്രണങ്ങളിൽ ഇളവ്​ വരുത്താൻ യു.കെ സർക്കാർ തീരുമാനിച്ചിരുന്നു. എന്നാൽ, പുതിയ സാഹചര്യത്തിൽ ഇത്​ നീട്ടിവെക്കണമെന്നാണ്​ ശാസ്​ത്രജ്ഞർ ആവശ്യപ്പെടുന്നത്​. കഴിഞ്ഞ അഞ്ച്​ ദിവസമായി 3000ത്തിലധികം കോവിഡ്​ കേസുകളാണ്​ യു.കെയിൽ റിപ്പോർട്ട്​ ചെയ്യുന്നത്​. ഏപ്രിൽ 12ന്​ ശേഷം ഇതാദ്യമായാണ്​ ഇത്രത്തോളം പേർക്ക്​ കോവിഡ്​ ബാധിക്കുന്നത്​.

കുറഞ്ഞ എണ്ണം രോഗികളുമായാണ്​ കോവിഡിന്‍റെ എല്ലാ തരംഗവും ആരംഭിക്കുക. പിന്നീട്​ രോഗികളുടെ എണ്ണം ക്രമാതീതമായി വർധിക്കുകയാണ്​ ചെയ്യുക. മൂന്നാം തരംഗത്തിന്‍റെ സൂചനകളാണ്​ പ്രകടമാവുന്നതെന്ന്​ യു.കെയിലെ ശാസ്​ത്രജ്ഞർ മുന്നറിയിപ്പ്​ നൽകുന്നു.