Top
Begin typing your search above and press return to search.
keyboard_arrow_down
Login
exit_to_app
exit_to_app
corona virus mutation
cancel
Homechevron_rightNewschevron_rightWorldchevron_rightബ്രിട്ടനിൽ കണ്ടെത്തിയ...

ബ്രിട്ടനിൽ കണ്ടെത്തിയ കോവിഡ്​ വകഭേദം 50 രാജ്യങ്ങളിൽ, ദക്ഷിണാഫ്രിക്കയിൽ ക​ണ്ടെത്തിയത്​ 20 രാജ്യങ്ങളിലും -ലോകാരോഗ്യ സംഘടന

text_fields
bookmark_border

ലണ്ടന്‍: ബ്രിട്ടനിൽ കണ്ടെത്തിയ ജനിതകമാറ്റം സംഭവിച്ച കോവിഡ് വകഭേദം 50 രാജ്യങ്ങളിലേക്ക് വ്യാപിച്ചിട്ടുണ്ടെന്ന്​ ലോകാരോഗ്യ സംഘടനയുടെ (ഡബ്ല്യൂ.എച്ച്.ഒ) വെളിപ്പെടുത്തൽ. ദക്ഷിണാഫ്രിക്കയില്‍ കണ്ടെത്തിയ മറ്റൊരു കോവിഡ്​ വകഭേദം 20 രാജ്യങ്ങളില്‍ കണ്ടെത്തിയതായി റിപ്പോര്‍ട്ടു ചെയ്യപ്പെട്ടിട്ടുണ്ട്. കൊറോണ വൈറസിന്‍റെ മൂന്നാമതൊരു വകഭേദം ജപ്പാനില്‍ കണ്ടെത്തിയതായും സംശയമുണ്ട്​. എന്നാല്‍ ഇക്കാര്യത്തില്‍ കൂടുതല്‍ അന്വേഷണങ്ങള്‍ ആവശ്യമുണ്ടെന്നാണ്​ ഡബ്ല്യൂ.എച്ച്.ഒയുടെ നിലപാട്​.

പുതിയ കോവിഡ് വകഭേദങ്ങള്‍ സംബന്ധിച്ച വെളിപ്പെടുത്തല്‍ ആശങ്ക ഉയര്‍ത്തുന്നതിനിടെ, ഇനിയും വകഭേദങ്ങൾ ഉണ്ടാകാനിടയുണ്ടെന്ന സൂചനയും ലോകാരോഗ്യ സംഘടന നൽകുന്നു. ബ്രിട്ടനില്‍ കണ്ടെത്തിയ VOC 202012/01 വകഭേദത്തെപ്പറ്റി 2020 ഡിസംബര്‍ 14 നാണ് ആദ്യം റിപ്പോര്‍ട്ടു ചെയ്യപ്പെട്ടത്. അത്​ ഇതിനകം 50 രാജ്യങ്ങളിലേക്ക് വ്യാപിച്ചു കഴിഞ്ഞു. വൈറസ് ബാധിക്കുന്നവരുടെ പ്രായവും ലിംഗവും മറ്റ് വകഭേദങ്ങളിലേതിന് സമാനമാണ്. എന്നാല്‍ വ്യാപനശേഷിയും മുമ്പ്​ രോഗബാധിതരായവർക്ക്​ വീണ്ടും ​വൈറസ്​ ബാധയേൽക്കാനുള്ള സാധ്യതയും കൂടുതലാണെന്നാണ് സമ്പര്‍ക്കം കണ്ടെത്തിയതുമായി ബന്ധപ്പെട്ട വിവരങ്ങള്‍ വ്യക്തമാക്കുന്നതെന്ന്​ ലോകാരോഗ്യ സംഘടന പറയുന്നു.

ദക്ഷിണാഫ്രിക്കയില്‍ 2020 ഡിസംബര്‍ 18 ന് കണ്ടെത്തിയ 501Y.V2 വകഭേദം 20 രാജ്യങ്ങളിലേക്ക് വ്യാപിച്ചതായാണ്​ കണ്ടെത്തിയിരിക്കുന്നത്​. ദക്ഷിണാഫ്രിക്കയില്‍ നടത്തിയ പഠനങ്ങളില്‍ പുതിയ വകഭേദം മുമ്പുള്ളതിനെക്കാള്‍ അതിവേഗം പടര്‍ന്നു പിടിക്കാന്‍ സാധ്യതയുള്ളതാണെന്ന് കണ്ടെത്തിയിട്ടുണ്ട്. എന്നാല്‍ അത് തീവ്രരോഗാവസ്ഥയ്ക്ക് കാരണമാകുമെന്ന സൂചനകൾ ലഭിച്ചിട്ടില്ല. അതേസമയം, രോഗബാധിതരുടെ എണ്ണം വന്‍തോതില്‍ വര്‍ധിക്കാൻ ഇടയുണ്ട്​. ആരോഗ്യ പരിപാലന സംവിധാനങ്ങളെ സമ്മര്‍ദ്ദത്തിലാക്കാനും കഴിയും.

2021 ജനുവരി ഒമ്പതിന് ബ്രസീലില്‍നിന്ന് ജപ്പാനിലെത്തിയ നാല് യാത്രക്കാരില്‍ പുതിയൊരു വകഭേദം കണ്ടെത്തിയെന്ന റിപ്പോര്‍ട്ടും ലോകാരോഗ്യ സംഘടനയ്ക്ക് ലഭിച്ചിട്ടുണ്ട്​. രണ്ട് മുതിര്‍ന്നവരിലും രണ്ട് കുട്ടികളിലുമാണ്​ പുതിയ വകഭേദം കണ്ടെത്തിയതെന്ന്​ സൂചനയുണ്ട്​.

പുതിയ കോവിഡ്​ വക​ഭേദങ്ങൾ സംബന്ധിച്ച ഗവേഷണവുമായി ബന്ധപ്പെട്ട്​ വിവിധ രാജ്യങ്ങളിൽ നിന്നുള്ള 1750 ശാസ്​ത്രജ്​ഞരുടെ സമ്മേളനം കഴിഞ്ഞ ദിവസം ലോകാരോഗ്യ സംഘടന നടത്തിയിരുന്നു. 'പുതിയ കോവിഡ്​ വകഭേദങ്ങൾ പെട്ടന്ന്​ കണ്ടുപിടിക്കുന്നതും അതിന്‍റെ വ്യാപനം തടയുന്നതിനുള്ള മാർഗങ്ങൾ ആവിഷ്​കരിക്കുന്നതിനും ആഗോളതലത്തിലുള്ള സംവിധാനം ഏർപ്പെടുത്തുന്നത്​ സംബന്ധിച്ചായിരുന്നു ചർച്ച. രോഗനിർണയ ​ശേഷി വർധിപ്പിക്കുന്നതിന്‍റെയും ആരോഗ്യ പരിപാലന സംവിധാനങ്ങൾ ശക്​തമാക്കുന്നതിന്‍റെയും ആവശ്യകതയാണ്​ പുതിയ കോവിഡ്​ വകഭേദങ്ങളുടെ കണ്ടെത്തൽ നൽകുന്നത്​'- ലോകാരോഗ്യ സംഘടനയുടെ റിസർച്ച്​ ആൻഡ്​ ഡവലപ്​മെന്‍റ്​ മേധാവി അന മരിയ ഹെനാവോ റെസ്​ട്രെപോ പറഞ്ഞു.

Show Full Article
TAGS:UK Covid covid 19 covid mutation who 
Web Title - UK Covid strain now in 50 countries, South African variant in 20: WHO
Next Story