കലങ്ങിമറിഞ്ഞ്​ തുണീഷ്യ; ജുഡീഷ്യൽ അധികാരങ്ങളും ഇനി പ്രസിഡൻറിന്​ സ്വന്തം; മുതിർന്ന ഉദ്യോഗസ്​ഥരെ​ പുറത്താക്കി

തൂനിസ്​: പ്രധാനമന്ത്രിയെ പുറത്താക്കിയും പാർലമെൻറ്​ പിരിച്ചുവിട്ടും രാജ്യത്തെ രാഷ്​ട്രീയ പ്രതിസന്ധിയിലാക്കിയ തുനീഷ്യൻ പ്രസിഡൻറ്​ ഖൈസ്​ സഈദ്​ ജുഡീഷ്യൽ അധികാരങ്ങളും കൈപ്പിടിയിലാക്കി. രാജ്യത്ത്​ അടിയന്തരാവസ്ഥ പ്രഖ്യാപിച്ച ഖൈസ്​ തന്നെ എതിർക്കാൻ സാധ്യതയുള്ള മുതിർന്ന ഉദ്യോഗസ്ഥരെയും കൂട്ടമായി പുറത്താക്കി.

മേഖലയിൽ വ്യാപകമായ ഭരണമാറ്റത്തിന്​ തുടക്കമിട്ട അറബ്​ വസന്തത്തിന്​ തുടക്കം കുറിച്ച നാടാണ്​ അതി​െൻറ ഓർമകൾ​ ഒരു പതിറ്റാണ്ട്​ പൂർത്തിയാക്കുന്ന ഘട്ടത്തിൽ കടുത്ത രാഷ്​ട്രീയ പ്രതിസന്ധിയിലേക്ക്​ കൂപ്പുകുത്തിയത്​. ജനാധിപത്യം അട്ടിമറിച്ച്​ ഏകാധിപത്യം നടപ്പാക്കാനുള്ള പ്രസിഡൻറി​െൻറ ശ്രമങ്ങൾക്കെതിരെ ഭരണകക്ഷിയായ അന്നഹ്​ദ ശക്തമായ മുന്നറിയിപ്പ്​ നൽകിയിട്ടുണ്ടെങ്കിലും പ്രതിഷേധത്തി​െൻറ എല്ലാ വഴികളും അടച്ചാണ്​ പുതിയ നീക്കം.

ഒരു മാസത്തേക്ക്​ പാർലമെൻറ്​ പിരിച്ചുവി​ട്ടെന്ന്​ ഉത്തരവിറക്കിയ ഖൈസ്​ സഈദി​െൻറ നടപടിക്ക്​ ഭരണഘടനയുടെ അംഗീകാരം നേടിയെടുക്കാനാവില്ല.

2010 അവസാനത്തിൽ പ്രക്ഷോഭം ആരംഭിച്ച തുനീഷ്യ മാസങ്ങൾക്കിടെ സൈനുൽ ആബിദീൻ ബിൻ അലിയുടെ പതിറ്റാണ്ടുകളുടെ ഏകാധിപത്യം അവസാനിപ്പിച്ച്​ ജനാധിപത്യത്തി​െൻറ പാതയി​െലത്തിയിരുന്നു​. കടുത്ത സാമ്പത്തിക തകർച്ചയും രാഷ്​ട്രീയ അനിശ്ചിതത്വവും ഇല്ലാതാക്കിയ രാഷ്​ട്രീയ മാറ്റം രാജ്യത്ത്​ പരിവർത്തനം സൃഷ്​ടിച്ചെങ്കിലും കോവിഡ്​ മഹാമാരിയിൽ എല്ലാം തകർന്നു.

പുതിയ സാഹചര്യം കൈകാര്യം ചെയ്യുന്നതിൽ രാഷ്​ട്രീയ നേതൃത്വം പരാജയമാകുന്നതിനെതിരെ ജനം തെരുവിലിറങ്ങിയത്​ അവസരമായി കണ്ട​ പ്രസിഡൻറ്​ ഖൈസ്​ പ്രധാനമന്ത്രിയെ പുറത്താക്കി അടിയന്തരാവസ്ഥ പ്രഖ്യാപിച്ചതിനെതിരെയും അനുകൂലിച്ചും രാജ്യത്ത്​ വാദമുഖങ്ങൾ ശക്തമാണ്​.