ജോർജ്​ ഫ്ലോയിഡിൻെറ കൊലയിൽ പ്രതിഷേധിച്ചവർ 'കൊള്ളക്കാർ', ഗാന്ധി പ്രതിമയെപ്പോലും വെറുതെവിട്ടില്ല -ട്രംപ്​

വാഷിങ്​ടൺ: യു.എസിൽ ആഫ്രോ അമേരിക്കൻ വംശജൻ ജോർജ്​ ഫ്ലോയിഡിൻെറ കൊലപാതകത്തിൽ​ പ്രതിഷേധിച്ചവരെ 'ഒരു കൂട്ടം കൊള്ളക്കാരെ'ന്ന്​ വിശേഷിപ്പിച്ച്​​ പ്രസിഡൻറ്​ ഡോണൾഡ്​ ട്രംപ്​. പ്രതിഷേധവുമായെത്തിയവർ വാഷിങ്​ടൺ ഡി.സിയിലെ മഹാത്മ ഗാന്ധിയുടെ പ്രതിമയെ പോലും വെറുതെ വിട്ടില്ലെന്നും അതിലൂടെ അവർ ഒരു കൂട്ടം കൊള്ളക്കാരാണെന്ന്​ തെളിയിച്ചതായും ട്രംപ്​ പറഞ്ഞു. മിനിസോട്ടയിലെ തെരഞ്ഞെടുപ്പ്​ റാലിയിൽ സംസാരിക്കുകയായിരുന്നു ട്രംപ്.

മേയ്​ 25നാണ്​ മി​നിയോപോളിസിലെ വെള്ളക്കാരായ​ പൊലീസുകാർ​ ​േഫ്ലായിഡിനെ മോഷ്​ടാവെന്ന്​ ആരോപിച്ച്​ കഴുത്തിൽ കാൽമുട്ട്​ അമർത്തി ശ്വാസം മുട്ടിച്ച്​ കൊലപ്പെടുത്തിയത്​. ഫ്ലോയിഡിനെ കൊലപ്പെടുത്തുന്ന ദൃശ്യങ്ങൾ സാമൂഹിക മാധ്യമങ്ങളിൽ വൻതോതിൽ പ്രചരിച്ചിരുന്നു. ഫ്ലോയിഡിൻെറ 'എനിക്ക്​ ശ്വാസം മുട്ടുന്നു' എന്ന അവസാന വാചകങ്ങൾ ഏറ്റെടുത്ത്​ യു.എസിൽ 'ബ്ലാക്ക്​​ ലൈവ്സ്​ മാറ്റർ' കാമ്പയിനിൻെറ ചുവടുപിടിച്ച്​ വൻ പ്രതിഷേധവും അര​േങ്ങറി.

'എബ്രഹാം ലിങ്കൻെറ പ്രതിമ തകർത്തായിരുന്നു തുടക്കം. പിന്നീട്​ ജോർജ്​ വാഷിങ്​ടണിനെയും തോമസ്​ ജെഫേഴ്​സണെയും ആക്രമിച്ചു. മഹാത്മഗാന്ധിയെപ്പോലും അവർ വെറുതെ വിട്ടില്ല. എല്ലാ ഗാന്ധിയുടെയും ആവശ്യം സമാധാനം മാത്രമാണ്​. അവർ എന്താണ്​ ചെയ്യുന്നതെന്ന്​ അവർക്ക്​ പോലും അറിയില്ല' -ട്രംപ്​ കൂട്ടിച്ചേർത്തു.

ഒരു കൂട്ടം കൊള്ളക്കാരാണ്​ അതു ചെയ്​തതെന്ന്​ ഞാൻ കരുതുന്നു. സത്യം നിങ്ങൾ അറിയണം. ഇത്തരം നാശനഷ്​ടങ്ങളുണ്ടാക്കുന്നവരെ 10 വർഷത്തേക്ക്​ ജയിലിൽ അടക്കുന്ന ഉത്തരവിൽ ഒപ്പുവെച്ചിട്ടുണ്ട്​. ഇപ്പോൾ പ്രതിമ തകർത്തവരെക്കുറിച്ച്​ ആരും സംസാരിക്കുന്നില്ലെന്നും ട്രംപ്​ പറഞ്ഞു.

'ചരിത്രത്തെ എടുത്തുകളയാനാകണ്​ അവരുടെ ശ്രമം. പശ്ചിമേഷ്യയിലും അങ്ങനെ തന്നെ. ഐ.എസ്​​ ചെയ്യുന്നതും അതുതന്നെ. അവർ മ്യൂസിയങ്ങൾ തകർക്കുന്നു. എല്ലാം തകർത്ത്​ ഇല്ലാതാക്കുന്നു. അങ്ങനെ ചരിത്രം ഇല്ലാതാക്കാൻ ശ്രമിക്കുന്നു.​ അവർക്കൊരിക്കലും യുനൈറ്റഡ്​ സ്​റ്റേറ്റ്​സ്​ ഓഫ്​ അമേരിക്കയുടെ ചരിത്രം ഇല്ലാതാക്കാൻ കഴിയില്ല. ഞാൻ ഇവിടെയുള്ളട​ത്തോളം കാലം' -ട്രംപ്​ കൂട്ടിച്ചേർത്തു.