റോഹിങ്ക്യൻ വംശഹത്യക്ക്​ മൂന്നാണ്ട്​; പത്തു​ലക്ഷം പേരുടെ അഭയാർഥി ജീവിതത്തിനും

ധാക്ക: രാഖൈൻ പ്രവിശ്യയിൽ മ്യാന്മർ സൈന്യം നടത്തിയ റോഹിങ്ക്യൻ വംശഹത്യക്ക്​ മൂന്നു​ വർഷം. കൂട്ടക്കൊലകളും ബലാത്സംഗങ്ങളും കൊള്ളിവെപ്പും ഭയന്ന്​ ബംഗ്ലാദേശിലെത്തിയ പത്തു ലക്ഷം പേരുടെ അഭയാർഥി ജീവിതവും മൂന്നാണ്ട്​ പിന്നിട്ടു. വംശഹത്യയുടെ മൂന്നാം വർഷം പ്രാർഥനകളും നിശ്ശബ്​ദ പ്രതിഷേധവുമായി തെക്കൻ ബംഗ്ലാദേശിലെ ഇടുങ്ങിയ ക്യാമ്പുകളിൽ കഴിച്ചുകൂട്ടി.

അന്താരാഷ്​ട്ര സമൂഹവും വൻശക്​തി രാജ്യങ്ങളും മറ​ന്നതോടെ ജന്മനാട്ടിലേക്കുള്ള മടക്കം അനിശ്ചിതത്തിലാണ്​. പതിനായിരത്തിലധികം പേർ കൂട്ടക്കൊലക്കും​ നിരവധി പേർ ബലാത്സംഗത്തിനും ഇരയായതോടെയാണ്​ ഏഴര ലക്ഷം റോഹിങ്ക്യകൾ 2017 ആഗസ്​റ്റ്​ 25ഒാടെ ബംഗ്ലാ​േദശിലെത്തിയത്​. രണ്ടുലക്ഷം പേർ നേരത്തേ എത്തിയിരുന്നു. മ്യാന്മറി​േൻറത്​ വംശഹത്യയാണെന്നു​ കാണിച്ച്​ അന്താരാഷ്​ട്ര നീതിന്യായ കോടതി നടപടികൾ ആരംഭിച്ചിട്ടും ഇവരു​െട ദുരിതം പരിഹരിക്കാൻ നടപടിയില്ല.

അത്യന്തം ദുരിതാവസ്ഥയിലാണ്​ ജീവിതമെന്നും കുട്ടികൾക്ക്​ വിദ്യാഭ്യാസം ​േപാലും ഇല്ലെന്നും ക്യാമ്പിലെ റോഹിങ്ക്യൻ നേതാവ്​ മുഹിബ്ബുല്ല പറഞ്ഞു. 'കൊലപാതകികൾ ശിക്ഷിക്കപ്പെടണം. നീതി വേണം. നാട്ടിലേക്ക്​ മടങ്ങണം. ഇതൊന്നും അടുത്തകാല​ത്തൊന്നും സംഭവിക്കുമെന്ന പ്രതീക്ഷയില്ല' ^അദ്ദേഹം പറഞ്ഞു. ബംഗ്ലാദേശിൽനിന്ന്​ ക്യാമ്പുകളെ വേർതിരിച്ചുനിർത്താൻ സൈന്യം മുള്ള​ുവേലികൾ സ്ഥാപിച്ചിട്ടുണ്ട്​. കഴിഞ്ഞ വർഷം ക്യാമ്പിലേക്കുള്ള ഇൻറർനെറ്റ്​ സേവനവും അവസാനിപ്പിച്ചിരുന്നു.

അഭയാർഥികളെ തിരിച്ചയക്കാൻ ബംഗ്ലാദേശും മ്യാന്മറും കരാറിലെത്തിയിരുന്നു. എന്നാൽ, സുരക്ഷയും അവകാശങ്ങളും ഉറപ്പുനൽകാനാക​ാതെ മടങ്ങാനാകില്ലെന്ന നിലപാടിലാണ്​ ഇവർ. ഇപ്പോൾ രാഖൈനിൽ കഴിയുന്ന ആറു ലക്ഷത്തിലധികം റോഹിങ്ക്യൻ വംശജരെ പൗരന്മാരായി കാണുന്നില്ല.