കർഷക പ്രക്ഷോഭത്തിന്​ ഐക്യദാർഢ്യവുമായി ലണ്ടൻ തെരുവിൽ ആയിരങ്ങൾ; അറസ്​റ്റ്​ ചെയ്​ത്​ പൊലീസ്​

ലണ്ടൻ: കേന്ദ്ര സർക്കാറിൻെറ വിവാദ കാർഷിക നിയമത്തിനെതിരെ പ്രതിഷേധിക്കുന്ന ഇന്ത്യൻ കർഷകർക്ക്​ ഐക്യദാർഢ്യവുമായി നിരവധി പേർ ലണ്ടൻ തെരുവിലിറങ്ങി.

ആയിരങ്ങളാണ്​ ഞായറാഴ്​ച പ്രതിഷേധവുമായി മധ്യ ലണ്ടനിലെ തെരുവുക​ളെ വേദിയാക്കിയതെന്നും കോവിഡ്​ മാർഗ നിർദേശങ്ങൾ ലംഘിച്ചെന്ന്​ കാണിച്ച്​​ നിരവധി പേരെ പൊലീസ്​ അറസ്​റ്റ്​ ചെയ്​തതായും വാർത്താ ഏജൻസിയായ​ പി.ടി.ഐ റിപ്പോർട്ട്​ ചെയ്​തു.

'ഞങ്ങൾ കർഷകർക്കൊപ്പം', 'കർഷകരോട്​ നീതി പാലിക്കുക' എന്നീ പ്ലക്കാർഡുകൾ​ ഉയർത്തിക്കൊണ്ട്​ ഓൾഡ്വിച്ചിലെ ഇന്ത്യൻ എംബസിക്ക്​ സമീപത്തു നിന്ന്​ ആരംഭിച്ച് ട്രാഫൽഗർ സ്​ക്വയറിലേക്കായിരുന്നു​ പ്രതിഷേധ പ്രകടനം. സിഖ്​ ജനവിഭാഗക്കാരായിരുന്നു​ പ്രതിഷേധത്തിൽ അണിനിരന്നവരിൽ ഏറെയും​.

കോവിഡ്​ പ്രോ​ട്ടോകോൾ നിലനിൽക്കുന്നതിനാൽ കൂട്ടം കൂടരുതെന്നും 30 പേരിൽ കൂടുതൽ പേർ ഒത്തു​ചേർന്നാൽ അറസ്​റ്റ്​ ചെയ്യുമെന്നുമുള്ള പൊലീസ്​ മുന്നറിയിപ്പ്​ വക വെക്കാതെയായിരുന്നു പ്രകടനം.

അതേസമയം, ഇന്ത്യാവിരുദ്ധ വിഘടനവാദികളാണ്​ പ്രതിഷേധത്തിന്​ നേതൃത്വം നൽകിയതെന്നും ​ഇന്ത്യയിലെ കര്‍ഷകരെ പ്രത്യക്ഷത്തില്‍ പിന്തുണച്ചുകൊണ്ട് അവര്‍ ഇന്ത്യാ വിരുദ്ധ അജണ്ട പിന്തുടരാനുള്ള അവസരമായി അതിനെ ഉപയോഗിച്ചുവെന്നും ഇന്ത്യൻ ഹൈകമീഷൻ വക്താവ്​ ആരോപിച്ചു. അനുമതിയില്ലാതെ ആയിരങ്ങൾ ഒത്തുചേർന്നത്​ എങ്ങനെയെന്ന്​ അന്വേഷിക്കുമെന്നും അദ്ദേഹം കൂട്ടിച്ചേർത്തു.