മോഷ്​ടിച്ച കാറിൽ നാലുവയസ്സുകാരൻ; തിരികെയേൽപ്പിച്ച്​, അമ്മയെ ഉപദേശിച്ച്​ കാറുമായി കടന്ന്​ കള്ളൻ

ന്യൂയോർക്ക്​: ഒരു ഗ്രോസറിക്ക്​ മുന്നിൽ നിർത്തിയിട്ടിരുന്ന കാറും തട്ടിയെടുത്ത്​​ അൽപദൂരം ഓടിച്ചപ്പോഴാണ്​ ആ മോഷ്​ടാവ്​ അത്​ ശ്രദ്ധിച്ചത്​. കാറിനുള്ളിൽ ഒരു നാല്​ വയസ്സുകാരനിരിക്കുന്നു. ഉടൻ തന്നെ 'യു-ടേൺ' അടിച്ച്​ അയാൾ ഗ്രോസറിയിലേക്ക്​ തിരിച്ച്​ കാറോടിച്ചു. മകനും കാറും നഷ്​ടമായതിൽ മനംതകർന്ന്​ നിൽക്കുന്ന അമ്മയുടെ അരികിൽ കാർ നിർത്തി മകനെ തിരികെയേൽപ്പിച്ചു. ഇനിയാണ്​ കഥയിലെ 'യു-ടേൺ'. മക്കളെ എങ്ങിനെ വളർത്തണം എന്നതിനെ കുറിച്ച്​ അമ്മക്ക്​ ഒരു ക്ലാസ്​ എടുത്തുകളഞ്ഞു അയാൾ. തുടർന്നായിരുന്നു പഞ്ച്​ ഡയലോഗ്​- 'മകനെ കാറിൽ ഒറ്റക്ക്​ ഇട്ടിട്ട്​ പോയതിനെ നിങ്ങളെ ഞാൻ പൊലീസിൽ എൽപ്പിക്കും'. ഇതും പറഞ്ഞ്​ അയാൾ കാറോടിച്ച്​ പോകുകയും ചെയ്​തു. ഇപ്പോൾ ആ 2013 മോഡൽ ​​ഹോണ്ട പൈലറ്റ്​ കാറിനെയും മോഷ്​ടാവിനെയും കണ്ടെത്താനുള്ള ഓട്ടത്തിലാണ്​ ഒറിഗോണിലെ ബ​വേർട്ടൻ പൊലീസ്​.

പോർട്ട്​ലാൻഡിന്‍റെ സബ്​ അർബൻ പ്രദേശമായ ബവേർട്ടനിൽ കഴിഞ്ഞ ദിവസമായിരുന്നു സംഭവം. ബേസിക്​ മീറ്റ്​ മാർക്കറ്റിലെ ഒരു ഗ്രോസറിയിൽ സാധനങ്ങൾ വാങ്ങാൻ കയറിയ ക്രിസ്റ്റൽ ലീറി എന്ന സ്​ത്രീയുടെ കാറാണ്​ മോഷ്​ടിക്കപ്പെട്ടത്​. കാർ ഓഫ്​ ചെയ്യാതെ, നാല്​ വയസ്സുള്ള മകനെ ഉള്ളിലിരുത്തി പാലും മറ്റ്​ സാധനങ്ങളും വാങ്ങാൻ​ ലീറി പോയ തക്കത്തിലാണ്​ കള്ളൻ കാറുമായി കടന്നത്​. കാറിൽ കുട്ടിയുണ്ടെന്ന്​ മനസ്സിലായപ്പോൾ തിരികെയെത്തി മകനെ ലീറിയെ ഏൽപ്പിച്ച ശേഷമാണ്​ കള്ളൻ ഉപദേശത്തിന്‍റെ കെട്ടഴിച്ചത്​. അതിനുശേഷം അയാൾ കാറുമായി കടക്കുകയും ചെയ്​തെന്ന്​ ബവേർട്ടൻ ​പൊലീസ്​ വക്​താവ്​ മാറ്റ്​ ഹെൻഡേഴ്​സൻ പറയുന്നു.

കുട്ടി സുരക്ഷിതനായിരിക്കുന്നെന്നും അദ്ദേഹം വ്യക്​തമാക്കി. 'അമ്മമാർ സാധാരണ എപ്പോളും തിരക്കിലായിരിക്കും. ഒറ്റ സെക്കൻഡിൽ ഏല്ലാം നടത്തി തിരികെ വരാമെന്ന ​വിശ്വാസത്തിലായിരിക്കും അവർ. പക്ഷേ, ആ ഒരു സെക്കൻഡിലെ അശ്രദ്ധ പോലും എത്ര ഭയാനകമാണെന്ന്​ തെളിയിക്കുകയാണ്​ ഈ സംഭവം'- ക്രിസ്റ്റൽ ലീറി പറയുന്നു.