'അവ​ർ ഞങ്ങളെ കൊല്ലും'- അഫ്​ഗാൻ യുദ്ധവിമാനങ്ങളുമായി നാടുവിട്ട്​ ഉസ്​ബെക്​ ക്യാമ്പിൽ കഴിയുന്ന പൈലറ്റുമാർ ഭീതിയിൽ

താഷ്​കെന്‍റ്​: താലിബാനു മുന്നിൽ കാബൂൾ അതിവേഗം വീഴുന്നത്​ കണ്ട്​ അഫ്​ഗാനിസ്​താനിലുണ്ടായിരുന്ന 22 യുദ്ധവിമാനങ്ങളും 24 സൈനിക ഹെലികോപ്​റ്ററുകളുമായി രാജ്യംവിട്ടതായിരുന്നു അവർ. അഭയം തേടിയത്​ അയൽ രാജ്യമായ ഉസ്​ബെകിസ്​താനിലും. എന്നാൽ, എല്ലാം കീഴ്​മേൽ മറിയുന്ന പുതിയ സാഹചര്യത്തിൽ​ ജീവൻ നഷ്​ടപ്പെടുമെന്ന ആധി അവരെ പിടികൂടിയിരിക്കുന്നു.

അമേരിക്ക പരിശീലിപ്പിച്ച 585 അഫ്​ഗാൻ വ്യോമസേനാംഗങ്ങളാണ്​ യുദ്ധവിമാനങ്ങൾ താലിബാൻ നിയന്ത്രണത്തിലാകരുതെന്ന്​ കരുതി അവയുമായി അതിവേഗം നാടുവിട്ടത്​. എല്ലാം തിർമിസ്​ വിമാനത്താവളത്തിൽ ഇറക്കുകയായിരുന്നു.

എന്നാൽ, ഇവരെ എത്രയും പെ​​ട്ടെന്ന്​ അമേരിക്കയിലേക്ക്​ കൊണ്ടുപോകുമെന്ന കണക്കുകൂട്ടൽ​ മൂന്നാഴ്ച കഴിഞ്ഞും നടപ്പായില്ലെന്ന്​ മാത്രമല്ല, അഫ്​ഗാനിസ്​താനിലേക്ക്​ തിരികെ പോകേണ്ടിവരുമെന്ന ഭീതി നിലനിൽക്കുകയാണ്​. 'അഫ്​ഗാനിലെത്തിയാൽ അവർ വധിച്ചുകളയും. 100 ശതമാനം ഉറപ്പാണ്​''- ഒരു പൈലറ്റ്​ പറയുന്നു.

ഉസ്​ബെകിസ്​താനിലെ ക്യാമ്പിൽ കഴിയുന്ന ഇവർക്ക്​ കടുത്ത യാത്ര നിയന്ത്രണം നിലനിൽക്കുന്നതായി റി​േപ്പാർട്ടുകൾ സൂചിപ്പിക്കുന്നു. ആവശ്യത്തിന്​ ഭക്ഷണവും മരുന്നും കിട്ടുന്നില്ലെന്ന പരാതിയുമുണ്ട്​. ജയിലിലടക്കപ്പെട്ട പോലെയാണ്​ ക്യാമ്പ്​ ജീവിതമെന്ന്​ വൈമാനികർ കുറ്റപ്പെടുത്തി.

അഫ്​ഗാൻ യുദ്ധ വിമാനങ്ങളും ഈ വൈമാനികരെയും എന്തു ചെയ്യുമെന്ന്​ ബൈഡൻ ഇനിയും വ്യക്​തമാക്കിയിട്ടില്ല. വിമാനങ്ങൾ അഫ്​ഗാനിസ്​ഥാന്‍റെത്​ ആയതിനാൽ ആരുടെ നിയന്ത്രണത്തിൽ സൂക്ഷിക്കുമെന്ന ചോദ്യം നിലനിൽക്കുകയാണ്​. വൈമാനികരെ തിരികെയെത്തിക്കാൻ ഉസ്​ബെകിസ്​താനു മേൽ താലിബാൻ സമ്മർദം ശക്​തമാക്കിയതായി റി​പ്പോർട്ടുകളുണ്ട്​.

സൈനിക വിമാനങ്ങളും ഹെലികോപ്​റ്ററുകളുമായി അഫ്​ഗാനിസ്​താനിലുണ്ടായിരുന്ന മൊത്തം 160 എണ്ണത്തിൽ 46 എണ്ണമാണ്​ ഉസ്​ബെകിസ്​താനിലുള്ളത്​. അധികവും കാബൂൾ വിമാനത്താവളത്തിൽനിന്ന്​ പറന്നുയർന്നവയാണ്​. ചിലത്​ മസാറെ ശരീഫി​െല ക്യാമ്പിൽനിന്നും. ഇതിലൊരു വിമാനം ഉസ്​ബെക്​ വിമാനവുമായി കൂട്ടിയിടിച്ച്​ ദുരന്തമുഖത്തായതും റിപ്പോർട്ട്​ ചെയ്യപ്പെട്ടു. എ-29 സൂപർ ടുകാനോ വിമാനം, യു.എച്ച്​-60 ബ്ലാക്​ ഹോക്​ ഹെലികോപ്​റ്റർ, എം.ഡി- 530 ഹെലികോപ്​റ്റർ, എം.ഐ-10 ഹെലികോപ്​റ്റർ എന്നിവ പറത്തിയ വൈമാനികരാണ്​ ക്യാമ്പിൽ കഴിയുന്നത്​. എല്ലാം യുദ്ധാവശ്യങ്ങൾക്കുള്ള ചെറിയ വിഭാഗത്തിൽപെട്ടവയാണ്​. ഈ വിമാനങ്ങൾ കൂടി രാജ്യത്തിന്​ മടക്കി നൽകണമെന്ന്​ താലിബാൻ ആവശ്യമുന്നയിച്ചിട്ടുണ്ട്​.

നാടുവിട്ടതിന്​ ആർക്കെതിരെയും ശിക്ഷാനടപടി സ്വീകരിക്കില്ലെന്നും ഇവർ കൂടി പുതിയ സർക്കാറിനു കീഴിൽ വൈമാനികരായി ചേരണമെന്നുമാണ്​ താലിബാൻ ആവശ്യം. ഇത്​ വൈമാനികർ സ്വീകരിക്കുമോയെന്നറിയില്ല.