കഴിഞ്ഞവർഷം​ പരസ്​പരം പോരടിച്ചു; ഇന്ന്​ ചൈന 'ഒാവർടൈം' ജോലിയിലാണ്​, ഇന്ത്യൻ ജനതക്ക്​ പ്രാണവായു ലഭിക്കാൻ

ബീജിംഗ്​​: ഒരു വർഷം മുമ്പ്​ ഇന്ത്യയു​ം ചൈനയും അതിർത്തിയിൽ പോരടിച്ചപ്പോൾ നിരവധി പട്ടാളക്കാരുടെ​ ജീവനാണ്​ പൊലിഞ്ഞത്​​​. എന്നാൽ, ഇപ്പോൾ സ്​ഥിതിയാകെ മാറി. ഇരു രാജ്യങ്ങളും ശത്രുതയെല്ലാം മാറ്റിവെച്ച്​ പരസ്​പര സഹകരണവുമായി രംഗത്തുവന്നിരിക്കുകയാണ്​.

ഇന്ത്യയിൽ കോവിഡ്​ ദുരന്തം ആഞ്ഞടിക്കു​േമ്പാൾ അയൽ രാജ്യം വെറുതെനിൽക്കുന്നില്ല. ഇന്ത്യയിൽനിന്ന്​ ലഭിച്ച 25,000 ഒാക്​സിജൻ കോൺസെൻട്രേറ്റർ ഒാർഡറുകൾ പെ​െട്ടന്ന്​ നൽകാനായി കമ്പനികൾ അധികസമയം ജോലിയെടുക്കുകയാണ്​.

'ചൈനീസ് മെഡിക്കൽ നിർമാണ കമ്പനികൾ ഇന്ത്യയിൽ നിന്നുള്ള ഓർഡറുൾ പെ​െട്ടന്ന്​ നൽകാനായി അധികസമയം ജോലി ചെയ്യുകയാണ്​. കുറഞ്ഞത് 25,000 ഓർഡറുകളെങ്കിലും അടുത്ത ദിവസങ്ങളിൽ ഓക്സിജൻ കോൺസെൻട്രേറ്ററുകൾക്കായി ലഭിച്ചിട്ടുണ്ട്​​. ഇവ അയക്കാനായി പ്രത്യേക ചരക്ക് വിമാനങ്ങളും ഏർപ്പെടുത്തും. ഇൗ മഹത്തായ പ്രവൃത്തിക്കായി ചൈനീസ് കസ്​റ്റംസി​െൻറ സഹായമുണ്ടാകും' ^ഇന്ത്യയിലെ ചൈനീസ് അംബാസഡർ​ സൺ വീഡോംഗ് ട്വീറ്റ് ചെയ്തു.

കോവിഡ്​ വ്യാപനത്തെ തുടർന്ന്​ കഴിഞ്ഞദിവസം ചൈനീസ്​ സർക്കാർ അധീനതയിലെ സിചുവാൻ എയർലൈൻസ് ഇന്ത്യയിലേക്കുള്ള എല്ലാ ചരക്ക് വിമാനങ്ങളും 15 ദിവസത്തേക്ക് നിർത്തി​െവച്ചതായി അറിയിച്ചിരുന്നു. ഇത്​, മെഡിക്കൽ ഉപകരണങ്ങൾ എത്തിക്കാൻ വലിയ തടസ്സമായിട്ടുണ്ട്​. ഇതേതുടർന്നാണ്​ പ്ര​േത്യക വിമാനങ്ങൾ ഏർപ്പെടുത്തുന്നത്​.

കോവിഡിനെതിരായ പോരാട്ടത്തിന് ഇന്ത്യക്ക്​ ആവശ്യമായ എല്ലാ സഹായങ്ങളും നൽകിയതായി അമേരിക്കൻ പ്രസിഡൻറ്​ ജോ ബൈഡൻ പറഞ്ഞതിന് തൊട്ടുപിന്നാലെയാണ് ചൈനീസ്​ അംബാസഡറുടെ ട്വീറ്റ് വന്നത്. ഇന്ത്യക്ക്​ സഹായം അയക്കുന്നതിൽ അമേരിക്ക കാലതാമസം വരുത്തിയെന്ന്​ ചൈനീസ്​ സർക്കാർ നിയന്ത്രണത്തിലുള്ള മാധ്യമങ്ങൾ കുറ്റപ്പെടുത്തിയിരുന്നു. പടിഞ്ഞാറുമായുള്ള ഇന്ത്യയുടെ അടുപ്പം ദുർബലവും​ പൊള്ളയുമാണെന്നും അവർ ചൂണ്ടിക്കാണിച്ചു. ഇതിന്​ പിന്നാലെയാണ്​ ബൈഡ​െൻറ പ്രഖ്യാപനം വന്നത്​.