ലോകത്തെ ഏറ്റവും വലിയ ആയുധം പ്രദർശിപ്പിച്ച്​ ഉത്തര കൊറിയ

പ്യോങ്​യാങ്​: സമുദ്രാന്തർവാഹിനികൾ ഉപയോഗിച്ച്​ തൊടുക്കാൻ​ ശേഷിയുള്ള അത്യാധുനിക ബാലിസ്​റ്റിക്​ മിസൈലുകൾ പ്രദർശിപ്പിച്ച്​ ഉത്തര കൊറിയ. ലോകത്തെ ഏറ്റവും ശക്തിയുള്ള ആയുധമെന്നാണ്​ ഉത്തര കൊറിയ മിസൈലിനെ വിശേഷിപ്പിച്ചത്​.

വ്യാഴാഴ്​ച രാത്രി തലസ്​ഥാന നഗരമായ പ്യോങ്​യാങ്ങിൽ നടന്ന പരേഡിലായിരുന്നു ആയുധപ്രദർശനം. പരേഡിൽ ഭരണാധികാരി കിം ജോങ്​ ഉൻ പ​ങ്കെടുത്തതായി ദേശീയമാധ്യമം റിപ്പോർട്ട്​ ചെയ്​തു. ഇതി​െൻറ ചിത്രങ്ങളും പുറത്തുവിട്ടിട്ടുണ്ട്​.

ജോ ബൈഡൻ പുതിയ യു.എസ്​ പ്രസിഡൻറായി അധികാരമേൽക്കുന്നതി​െൻറ തൊട്ടുമുമ്പാണ്​ ഉത്തര കൊറിയയുടെ ആയുധപ്രദർശനം. ആരു തന്നെ അധികാരത്തിൽ വന്നാലും യു.എസ്​ ശത്രുരാജ്യമാണെന്ന്​ ദിവസങ്ങൾക്കു മുമ്പ്​ കിം ജോങ്​ ഉൻ പ്രഖ്യാപിച്ചിരുന്നു. പുക്​ഗുക്​സോങ്​ -5 എന്നാണ്​ പുതിയ ബാലിസ്​റ്റിക്​ മിസൈലിന്​ പേരിട്ടത്​. കഴിഞ്ഞ ഒക്​ടോബറിൽ പ്രദർശിപ്പിച്ച പുക്​ഗുക്​സോങ്​ -4െൻറ നവീകരിച്ച രൂപമാണിത്​.

പഴയതിനെക്കാൾ വലുതാണ്​ പുക്​ഗുക്​സോങ്​ -5 മിസൈലെന്ന്​ കാലിഫോർണിയ ആസ്​ഥാനമായുള്ള ജെയിംസ്​ മാർട്ടിൻ സെൻറർ ഫോർ നോൺപ്രോലിഫറേഷൻ സ്​റ്റഡീസിലെ മൈക്കൽ ഡ്യൂട്സ്​മാൻ പറഞ്ഞു.

കൂടുതൽ മികവുള്ള റോക്കറ്റുകളും പ്രദർശനത്തിനുണ്ടായിരുന്നു. ദക്ഷിണ കൊറിയയിൽ മാത്രമല്ല, ജപ്പാനിലും ആക്രമണം നടത്താൻ ശേഷിയുള്ളതാണ്​ ആയുധശേഖരമെന്നാണ്​ നിഗമനം. ഭൂഖണ്ഡാന്തര ബാലി​സ്​റ്റിക്​ മിസൈലുകൾ പ്രദർശനത്തിൽ അണിനിരന്നില്ല.