അമിത ലഹരി ഉപയോഗം; 'ദി വയർ' താരം മൈക്കൽ വില്ല്യംസിനെ മരിച്ച നിലയിൽ കണ്ടെത്തി

ന്യൂയോർക്ക്: ​അമേരിക്കയിലെ 'ദി വയർ' ടെലിവിഷൻ ത്രില്ലർ പരമ്പരയിൽ ശ്രദ്ധേയമായ കഥാപാത്രത്തെ അവതരിപ്പിച്ച്​ ആരാധക ഹൃദയത്തിൽ ഇടംനേടിയ മൈക്കൽ കെ വില്ല്യംസിനെ (56) മരിച്ച നിലയിൽ കണ്ടെത്തി. ന്യൂയോർക്ക്​ സിറ്റിയിലെ അപ്പാർട്​മെന്‍റിലാണ്​ താരത്തെ തിങ്കളാഴ്ച പുലർച്ചെ മരിച്ചനിലയിൽ കാണപ്പെട്ടത്​.

'ദി വയർ' ടെലിവിഷൻ പരമ്പരയിൽ മയക്കുമരുന്ന്​ ഡീലറായ ഓമർ ലിറ്റിലിനെയാണ്​ മൈക്കൽ വില്ല്യംസ്​ അവതരിപ്പിച്ചത്​. 2002 മുതൽ 2008 വരെ അമേരിക്കയിൽ ഏറ്റവും കൂടുതൽ ആളുകൾ കണ്ടിരുന്ന ടെലിവിഷൻ പരമ്പരയായിരുന്നു ' ദി വയർ'. എച്ച്​.ബി.ഒയിലെ 'ബോർഡ്​ വാക്ക്​ എംപയർ' പരമ്പരയിലെ 'ആൽബർട്ട്​ ചാൾക്ക്​'യെന്ന കഥാപാത്രത്തെ അവതരിപ്പിച്ചും മൈക്കൽ വില്ല്യംസ്​ ​​ശ്രദ്ധ നേടിയിരുന്നു.

മരണ കാരണം പുറത്തുവിട്ടിട്ടില്ലെങ്കിലും അമിത ലഹരി ഉ​പയോഗിച്ചതാവാം മരണത്തിലേക്ക്​ നയിച്ചതെന്ന്​ മാധ്യമങ്ങൾ റിപ്പോർട്ട്​ ചെയ്​തു. ലഹരിക്ക്​ അടിമയായിരുന്നുവെന്ന്​ വില്ല്യംസ്​ തന്നെ നേരത്തെ അഭിമുഖത്തിൽ വ്യക്​തമാക്കിയിരുന്നു.