ഒരു മാസത്തിനിടെ രൂപപ്പെട്ടത്​ 100ലേറെ കൂറ്റൻ ഗർത്തങ്ങൾ; ഈ ഗ്രാമം ഭീതിയിലാണ്​...

ലണ്ടൻ: നിറയെ ചെടിയും മരവും അതിരിട്ട്​, പുല്ലും പൂക്കളും വളർന്ന്​ ദൃശ്യ മനോഹാരിത പകർന്ന ഈ ഗ്രാമം നാട്ടുകാരുടെ​ പേടിസ്വപ്​നമായി രൂപംമാറിയിട്ട്​ ഏറെയായിട്ടില്ല. പൊടുന്നനെ കൂൺ പോലെ മുളക്കുന്ന ഗർത്തങ്ങളാണിപ്പോൾ ഗ്രാമത്തി​െൻറ ആധി. ഒരു മാസത്തിനിടെ പുതുതായി ഉണ്ടായത്​ 100 ലേറെ കൂറ്റൻ കുഴികൾ​.

സംഭവം പക്ഷേ, അടുത്തെങ്ങുമല്ല, യൂറോപ്യൻ രാജ്യമായ ക്രൊയേഷ്യയിലാണ്​. വീടുകളും താമസക്കാരും വേണ്ടുവോളമുള്ള വടക്കു കിഴക്കൻ ക്രൊയേഷ്യയിലെ മെസൻചാനി ഗ്രാമത്തിൽ.

വിശാലമായ തോട്ടം സ്വന്തമായുള്ള നികൊളാ ബോറോജെവിച്ചി​െൻറ വീട്ടുപരിസരത്ത്​ രൂപപ്പെട്ടത്​ 15 മീറ്റർ താഴ്​ചയും 30 മീറ്റർ വീതിയുമുള്ള ഗർത്തമാണ്​. കണ്ടാൽ ഭയന്നുപോകുന്ന പാതാളം. മറ്റു പലർക്കും ദിവസങ്ങളുടെ വ്യത്യാസത്തിൽ​ സമാനമായ അനുഭവം തന്നെ സംഭവിച്ചു. ഇനി വീടുകൂടി ഗർത്തം വിഴുങ്ങുമോ എന്നാണ്​ നാട്ടുകാരെ കുഴക്കുന്ന ചോദ്യം.

പ്രദേശത്തോടു ചേർന്നുള്ള പെട്രിഞ്ചയിൽ അടുത്തിടെ വൻ ഭൂചലനം സംഭവിച്ചിരുന്നു. റിക്​ടർ സ്​കെയിലിൽ 6.4 രേഖപ്പെടുത്തിയ, നാലു പതിറ്റാണ്ടിനിടെ ക്രൊയേഷ്യയിലുണ്ടായ ഏറ്റവും വലിയ ഭൂചലനത്തിൽ മരിച്ചത്​ ഏഴു പേർ.

സംഭവത്തിന്​ ദിവസങ്ങളും ആഴ്​ചകളും കഴിഞ്ഞാണ്​ പലർക്കും ഇതുപോലൊരു ഭീതിയുടെ അനുഭവം. ബോറോജെവിച്ചി​​െൻറ വീട്ടുപറമ്പിലെ ഗർത്തം ആദ്യം 10 മീറ്ററിലായിരുന്നുവെങ്കിൽ ദിവസങ്ങൾ കഴിഞ്ഞപ്പോഴേക്ക്​ വളർന്ന്​ 30 മീറ്ററായി. വീതി കൂടുന്നതിനൊപ്പം ഓരോ ആഴ്​ചയിലും ഒന്ന്​ എന്ന തോതിൽ പുതിയത്​ ഉണ്ടാകുന്നുമുണ്ട്​. പലരുടെയും വീടിനോടു ചാരിയാണ്​ ഗർത്തങ്ങളെന്നത്​ ഇരട്ടി ഭീതി നൽകുന്നു.

സംഭവം ദേശീയ, അന്താരാഷ്​ട്ര ശ്രദ്ധയിലെത്തിയതോടെ പഠനം ലക്ഷ്യമിട്ട്​ ഭൂഗർഭ ശാസ്​ത്രജ്​ഞർ പ്ര​േദശത്ത്​ ക്യാമ്പ്​ ചെയ്​തു തുടങ്ങിയിട്ടുണ്ട്​.

ഭൂചലന സാധ്യത ഏറെയുള്ളതാണ്​ ക്രൊയേഷ്യയുടെ ഭൂമിശാസ്​ത്രം. കഴിഞ്ഞ വർഷാവസാനം ഇവിടെ നടന്ന ഭൂചലനത്തി​െൻറ പ്രഭവ കേന്ദ്രത്തിനരികെയായിരുന്നു 1909ലെ വൻ ഭൂകമ്പം നടന്നതും.

ഭൂചലനത്തി​െൻറ തുടർച്ചയായി പൊതുവെ പിന്നീട്​ ഗർത്തം രുപപ്പെടാറില്ലെങ്കിലും അതും സംഭവിക്കാമെന്ന്​ ശാസ്ത്രജ്​ഞർ പറയുന്നു. അതാകാം ഇവിടെ കാണുന്ന പ്രതിഭാസവും. ഒരു ഗ്രാമത്തിൽ തുടങ്ങിയ ഗർത്തങ്ങൾ ഇപ്പോൾ രണ്ടു ഗ്രാമങ്ങളെ ഒന്നാകെ ഭീതിയുടെ മുനയിൽ നിർത്തുന്നു.