തായ്​ലൻഡ്​ മാളിലെ വെടിവയ്​പ്പ്​; ഷൂട്ട്​ ചെയ്യാൻ തന്നോട്​ ആരോ ആവശ്യപ്പെടുകയായിരുന്നെന്ന് 14 കാരൻ​​

ബാങ്കോക്ക്: തായ്‌ലാന്‍ഡ് തലസ്ഥാനമായ ബാങ്കോക്കിലെ ഷോപ്പിങ് മാളില്‍ നടന്ന വെടിവെപ്പിൽ കൂടുതൽ ​വെളിപ്പെടുത്തലുമായി പൊലീസ്​. നഗരഹൃദയത്തില്‍ സ്ഥിതിചെയ്യുന്ന സിയാം പാരഗണ്‍ മാളിലാണ് ചൊവ്വാഴ്ച വൈകിട്ടോടെ വെടിവെപ്പുണ്ടായത്. സംഭവത്തില്‍ രണ്ടുപേര്‍ കൊല്ലപ്പെട്ടിരുന്നു. ആക്രമണം നടത്തിയ 14-കാരനെ സംഭവം നടന്ന ഉടനെ പൊലീസ് അറസ്റ്റ് ചെയ്തിരുന്നു. ഇയാൾ മാനസികമായി വെല്ലുവിളി നേരിടുന്നയാളാണെന്നാണ്​ പൊലീസ് പറയുന്നത്​.

പ്രതിയുടെമേൽ മുൻകൂട്ടി ആസൂത്രണം ചെയ്ത കൊലപാതകം, കൊലപാതകശ്രമം, അനധികൃതമായി തോക്ക് കൈവശം വയ്ക്കൽ, പൊതുസ്ഥലത്ത് ആയുധം ഉപയോഗിക്കൽ തുടങ്ങിയ കുറ്റങ്ങൾ ചുമത്തി കേസെടുത്തതായി പോലീസ് പറഞ്ഞു. ‘പ്രതി മാനസിക വെല്ലുവിളി നേരിടുന്നയാളാണെന്ന്​ ഡോക്ടർമാർ പറഞ്ഞതിനാൽ ഞങ്ങൾക്ക് ഇനിയും മൊഴി എടുക്കാൻ കഴിഞ്ഞിട്ടില്ല’- മേജർ ജനറൽ നകറിൻ സുഖോന്താവിറ്റ് വാർത്താ ഏജൻസിയായ റോയിട്ടേഴ്‌സിനോട് പറഞ്ഞു.

അന്വേഷണ ഉദ്യോഗസ്ഥർ കൗമാരക്കാരനായ കൊലയാളിയുടെ പശ്ചാത്തലം പരിശോധിക്കുകയാണ്​. ഇയാളുടെ ഓൺലൈൻ ഗെയിമർമാരായ സുഹൃത്തുക്കളോട് സംസാരിക്കുമെന്നും പൊലീസ്​ പറഞ്ഞു. താൻ ആദ്യ ഘട്ടത്തിൽ പ്രതിയോട്​ സംസാരിച്ചെന്നും ‘ഷൂട്ട്​ ചെയ്യാൻ തന്നോട്​ ആരോ ആവശ്യപ്പെടുകയായിരുന്നെന്ന് 14 കാരൻ’ പറഞ്ഞതായും ഉ​ദ്യോഗസ്ഥൻ മാധ്യമങ്ങളോട് പറഞ്ഞു. പ്രതിക്ക്​ മാനസിക പ്രശ്നങ്ങൾ ഉണ്ടെന്ന നിഗമനത്തിൽ പൊലീസ്​ എത്താൻ കാരണം ഇത്തരം വിശദീകരണങ്ങളാണ്​.

കൈത്തോക്ക് ഉപയോഗിച്ചാണ് 14-കാരന്‍ ഷോപ്പിങ് മാളില്‍ വെടിയുതിര്‍ത്തത്​. സംഭവത്തെ തുടര്‍ന്ന് സമീപത്തെ മെട്രോ സ്‌റ്റേഷന്‍ ഉള്‍പ്പെടെ അടച്ചിട്ടിരുന്നു. സംഭവത്തിന് പിന്നാലെ മാളില്‍നിന്നുള്ള ഒട്ടേറെ ദൃശ്യങ്ങള്‍ സാമൂഹികമാധ്യമങ്ങളിലൂടെ പുറത്തുവന്നിരുന്നു. മാളില്‍നിന്ന് ജനങ്ങള്‍ പരിഭ്രാന്തരായി പുറത്തേക്ക് ഓടുന്നതിന്റെയും മറ്റും ദൃശ്യങ്ങളാണ് സാമൂഹികമാധ്യമങ്ങളില്‍ പ്രചരിക്കുന്നത്.