കോവിഡ്​ നിയന്ത്രണങ്ങൾക്കെതിരെയും വാക്​സിൻ നിർബന്ധമാക്കുന്നതിനെതിരെയും ഓസ്​ട്രിയയിൽ വൻ പ്രതിഷേധം

വിയന്ന: കോവിഡ്​ നിയന്ത്രണങ്ങൾക്കെതിരെയും വാക്​സിൻ നിർബന്ധമാക്കുന്നതിനെതിരെയും ഓസ്​ട്രയയിൽ വൻ പ്രതിഷേധം. ശനിയാഴ്ചയാണ്​ വിയന്നയിൽ പ്രതിഷേധക്കാർ അണിനിരന്നത്​. പുതിയ ലോക്​ഡൗൺ നിയന്ത്രണങ്ങൾ ഓസ്​ട്രിയൻ സർക്കാർ കഴിഞ്ഞ ദിവസം പ്രഖ്യാപിച്ചിരുന്നു. ഇതിന്​ പുറമേ വാക്​സിൻ നിർബന്ധമാക്കുമെന്നും അറിയിച്ചിരുന്നു. ഇതിനെതിരെയാണ്​ പ്രതിഷേധങ്ങൾ അരങ്ങേറിയത്​.

വിസിലടിച്ചും ഹോണുകൾ മുഴക്കിയും പ്രതിഷേധക്കാർ ഹോഫ്​ബർഗിലെ ഹീറോ സ്വകയറിൽ അണിനിരന്നു. ഇതിന്​ പുറമേ നഗരത്തിന്‍റെ വിവിധ ഭാഗങ്ങളിലും പ്രതിഷേധമുണ്ടായിരുന്നു. ഫാസിസ്റ്റ്​ ഏകാധിപത്യ ഭരണം നിർത്തണമെന്ന്​ പ്രതിഷേധക്കാർ ആവശ്യപ്പെട്ടു.

ഏകദേശം 35,000 പേർ പ്രതിഷേധത്തിൽ പ​ങ്കെടുത്തിട്ടുണ്ടെന്നാണ്​ വിയന്ന പൊലീസ്​ കണക്കാക്കുന്നത്​. എന്നാൽ 10 പേരെ മാത്രമാണ്​ അറസ്റ്റ്​ ചെയ്​തതെന്നും പൊലീസ്​ അറിയിച്ചു. കോവിഡ്​ നിയന്ത്രണങ്ങൾ ലംഘിച്ചതിനും നാസി ചിഹ്​നങ്ങൾ പ്രദർശിപ്പിച്ചതിനുമാണ്​ അറസ്​റ്റെന്നും പൊലീസ്​ അറിയിച്ചു. ഒാസ്​ട്രിയയുടെ 66 ശതമാനം പേർക്ക്​ മാത്രമാണ്​ ഇതുവരെ വാക്​സിൻ നൽകിയിട്ടുള്ളത്​. അടുത്ത വർഷം ഫെബ്രുവരി ഒന്നിനകം എല്ലാവർക്കും വാക്​സിൻ നൽകാനാണ്​ ഓസ്​ട്രിയയുടെ പദ്ധതി.

അതേസമയം കോവിഡ്​ വാക്​സിനെതിരെ ആസ്​ട്രേലിയയിലും പ്രതിഷേധം ഉയർന്നു. രാ​ജ്യ​ത്തെ 16 വ​യ​സ്സി​നു മു​ക​ളി​ലു​ള്ള​വ​രി​ൽ 85 ശ​ത​മാ​ന​വും സ്വ​മേ​ധ​യാ ര​ണ്ടു ഡോ​സ്​ വാ​ക്​​സി​ൻ സ്വീ​ക​രി​ച്ച​വ​രാ​ണ്.

വാ​ക്​​സി​ൻ സ്വീ​ക​രി​ക്കാ​ത്ത​വ​രെ പൊ​തു ഇ​ട​ങ്ങ​ളി​ൽ​നി​ന്ന്​ വി​ല​ക്കി​യി​രു​ന്നു. സ്വാ​ത​​ന്ത്ര്യം ആ​വ​ശ്യ​​പ്പെ​ട്ടാ​ണ്​ ആ​ളു​ക​ൾ തെ​രു​വി​ലി​റ​ങ്ങി​യത്. സി​ഡ്​​നി, മെ​ൽ​ബ​ൺ, പെ​ർ​ത്ത്​ എ​ന്നീ ന​ഗ​ര​ങ്ങ​ളി​ലാ​ണ്​ പ്ര​ധാ​ന​മാ​യും പ്ര​തി​ഷേ​ധം ന​ട​ക്കു​ന്ന​ത്.