31നു ശേഷവും ഒഴിപ്പിക്കൽ തുടരാമെന്ന്​ 100 രാഷ്​ട്രങ്ങൾക്ക്​ താലിബാൻ ഉറപ്പുനൽകിയതായി യു.എസ്​

വാഷിങ്​ടൺ: വിദേശികളെയും അഫ്​ഗാനികളെയും ആഗസ്റ്റ്​ 31നു ശേഷവും കാബൂൾ വിമാനത്താവളം വഴി ഒഴിപ്പിക്കൽ തുടരാമെന്ന്​ 100 രാജ്യങ്ങൾക്ക്​ താലിബാൻ ഉറപ്പുനൽകിയതായി യു.എസ്​. വിദേശയാത്രക്ക്​ വിവിധ രാജ്യങ്ങൾ അനുമതി നൽകിയ അഫ്​ഗാനികൾക്കാണ്​ അനുമതിയുണ്ടാകുക.

ചൊവ്വാഴ്ചക്കകം വിദേശ ശക്​തികൾ രാജ്യം വിട്ടുപോകണ​െമന്നാണ്​ നേരത്തെ താലിബാനുമായുണ്ടാക്കിയ കരാർ. ഇതുപ്രകാരം ഒരു ദിവസത്തിനകം സൈനികരെ എല്ലാ രാജ്യങ്ങളും പൂർണമായി പിൻവലിക്കണം. യു.എസ്​ ഒഴികെ രാജ്യങ്ങളുടെ സൈനികർ മടങ്ങിക്കഴിഞ്ഞതായാണ്​ റിപ്പോർട്ട്​. കാബൂൾ വിമാനത്താവളത്തിൽ കാവലുണ്ടായിരുന്ന യു.എസ്​ സൈനികരും മടക്കം ആരംഭിച്ചിട്ടുണ്ട്​. ഇത്​ അവസാനിക്കുന്നതോടെ അഫ്​ഗാനിസ്​താനിലെ വിദേശ സൈനിക പിന്മടക്കം പൂർത്തിയാകും.

എല്ലാ വിദേശ പൗരന്മാർക്കും അവർക്കൊപ്പമുണ്ടായിരുന്ന അഫ്​ഗാനികൾക്കും സുരക്ഷിത മടക്കം ഒരുക്കുമെന്ന്​ യൂറോപ്യൻ യൂനിയനും നാറ്റോയും ഒപ്പുവെച്ച കരാർ വ്യക്​തമാക്കുന്നു. ചൈനയും റഷ്യയും കരാറിന്‍റെ ഭാഗമല്ല.

വിദേശികൾ മടങ്ങിയാലും രക്ഷാ പ്രവർത്തനങ്ങൾക്കും മാനുഷിക സഹായങ്ങൾക്കും കാബൂൾ നഗരത്തിൽ 'സുരക്ഷിത മേഖല' ഒരുക്കാൻ ഫ്രാൻസും ബ്രിട്ടനും യു.എന്നിനോട്​ ആവശ്യപ്പെട്ടിട്ടുണ്ട്​. ഇതുൾപെടെ വിഷയങ്ങൾ ചർച്ച ചെയ്യാൻ ഇന്ന്​ യു.എസ്​, ബ്രിട്ടൻ, ചൈന, ഫ്രാൻസ്​, റഷ്യ എന്നീ യു.എൻ രക്ഷാ കൗൺസിൽ സ്​ഥിരാംഗങ്ങൾ യോഗം ചേരുന്നുണ്ട്​.