യു.എസ്​ സൈനിക പിന്മാറ്റം ആഘോഷിച്ച്​ താലിബാൻ

കാബൂൾ: തിങ്കളാഴ്ച കാബൂൾ സമയം അർധരാത്രിക്ക്​ ഒരു മിനിറ്റ്​ മുമ്പ്​​ ഹാമിദ്​ കർസായി രാജ്യാന്തര വിമാനത്താവളത്തിൽനിന്ന്​ യു.എസ്​ വ്യോമസേനയുടെ സി-17 വിമാനം അവസാന സൈനികനെയും വഹിച്ച്​ മടങ്ങിയെന്ന പ്രഖ്യാപനം യു.എസ്​ സെൻട്രൽ കമാൻഡ്​ മേധാവി ജനറൽ ഫ്രാങ്ക്​ മക്കിൻസി നടത്തു​േമ്പാൾ അഫ്​ഗാനിൽ ആഘോഷം കൊഴുപ്പിച്ച്​ താലിബാൻ. നഗരത്തിൽ വെടിപൊട്ടിച്ചായിരുന്നു അർധരാത്രിക്കു ശേഷം പുലർച്ചെ വരെ നീണ്ട ആഘോഷം. ആഗസ്റ്റ്​ 31നകം എല്ലാ സൈനികരെയും പിൻവലിക്കുമെന്ന്​ പ്രസിഡന്‍റ്​ ​ജോ ബൈഡൻ നടത്തിയ പ്രഖ്യാപനമാണ്​ ഇതോടെ പൂർത്തീകരിച്ചത്​.

കടുത്ത സുരക്ഷാ ഭീഷണിക്കിടെ അതിവേഗത്തിലായിരുന്നു ഒഴുപ്പിക്കൽ. കാബൂൾ വിമാനത്താവളത്തിലും പരിസരങ്ങളിലും രണ്ടു തവണ ആക്രമണം നടന്നു. നിരവധി പേർക്ക്​ ജീവൻ നഷ്​ടമായി. എന്നിട്ടും പിന്മാറ്റം പൂർത്തിയാക്കാനായത്​ സന്തോഷകരമാണെന്ന്​ യു.എസ്​ പറയുന്നു.

അമേരിക്ക കാബൂൾ വിട്ടുമടങ്ങിയതോടെ കാബൂൾ വിമാനത്താവളത്തിന്‍റെ നിയന്ത്രണം ഏറ്റെടുക്കാൻ താലിബാൻ ശ്രമം ആരംഭിച്ചിട്ടുണ്ട്​. താലിബാൻ സർക്കാർ വക്​താവ്​ സബീഹുല്ല മുജാഹിദും പട്ടാളവും വിമാനത്താവളത്തിൽ പ്രവേശിക്കുന്ന ചിത്രങ്ങൾ സമൂഹ മാധ്യമങ്ങൾ വഴി പുറത്തുവന്നിട്ടുണ്ട്​. ഇവിടെ വെച്ച്​ കൂടുതൽ പ്രഖ്യാപനങ്ങൾ താലിബാൻ നടത്തുമെന്ന സൂചനയുമുണ്ട്​.

എല്ലാ വിഭാഗങ്ങൾക്കും പ്രാതിനിധ്യമുള്ള ഇടക്കാല സർക്കാർ രൂപവത്​കരിക്കുമെന്നാണ്​ താലിബാൻ പ്രഖ്യാപനം.