പന്നികളെ ബാധിക്കുന്ന പുതിയ കൊറോണ വൈറസ്​​ മനുഷ്യരിലേക്കും പടരുമെന്ന്​ പഠനം

വാഷിങ്​ടൺ: പന്നികളെ ബാധിക്കുന്ന പുതിയ കൊറോണ വൈറസ്​​ മനുഷ്യരിലേക്ക്​ പടരാൻ സാധ്യതയുണ്ടെന്ന്​ പഠനം. പന്നിക്കുഞ്ഞുകളിൽ വയറിളക്കത്തിനും പിന്നീട്​ മരണത്തിന്​ വരെ​ കാരണമാകുന്ന സ്വൈൻ കൊറോണ വൈറസുമായി ബന്ധപ്പെട്ട ഞെട്ടിക്കുന്ന വിവരം പുറത്തുവിട്ടത്​​ നോർത്ത്​ കരലിന​ സർവകലാശാലയിലെ ഗവേഷകരാണ്​.

സ്വൈൻ അക്യൂട്ട്‌ ഡയേറിയ സിൻഡ്രം കൊറോണവൈറസ്​ അഥവാ​ സാഡ്‌സ്‌-കോവ്‌ എന്ന്​ അറിയപ്പെടുന്ന വൈറസിന്​ കോവിഡിന്​ കാരണമാകുന്ന സാർസ്-​കോവ്​ 2ന്​ ഒപ്പമോ അതിൽ കൂടുതലോ പ്രഹരശേഷിയുണ്ടെന്നും ഗവേഷകർ​ മുന്നറിയിപ്പ്​ നൽകുന്നു. ആഗോള സമ്പദ്​വ്യവസ്ഥയെയും മനുഷ്യരുടെ ആരോഗ്യത്തെയും വൈറസ്​ ഏറെ പ്രതികൂലമായി ബാധിച്ചേക്കുമെന്നും വാർത്ത ഏജൻസിയായ പി.ടി.​െഎയുടെ റിപ്പോർട്ടിൽ ചൂണ്ടിക്കാട്ടുന്നു.

2016ൽ വവ്വാലുകളിലാണ്​ വൈറസിനെ ആദ്യം കണ്ടെത്തിയത്​. ചൈനയിലെ വിവിധ ഭാഗങ്ങളിൽ ഇത്‌ പന്നികളെയും ബാധിച്ചതായി സ്ഥിരീകരിച്ചു. സാഡ്‌സ്‌-കോവ്‌ അന്നനാളത്തെയും ദഹനവ്യവസ്ഥയെയുമാണ്​ ബാധിക്കുന്നത്​. ചെറിയ പന്നികളിൽ ഇത്​ മരണകാരണമാകാമെന്നും പഠനമുണ്ട്​. അതേസമയം, വൈറസ്​ ഇതുവരെ മനുഷ്യരിലേക്ക്‌ പകർന്നതായി റിപ്പോർട്ട്​ ചെയ്യപ്പെട്ടിട്ടില്ല.

സാഡ്​സ്​-കോവ്​ മനുഷ്യരിലേക്ക്​ പടരാൻ സാധ്യതയുണ്ടോ എന്ന്​ അറിയാനായി ഗവേഷകർ പരീക്ഷണങ്ങൾ നടത്തിയിരുന്നു. മനുഷ്യരുടെ കുടലിലെയും ശ്വാസനാളിയിലെയും കോശങ്ങളിലും കരളിലും വേഗത്തിൽ ഇൗ വൈറസിന്​ പെരുകാനാകുമെന്നാണ്​ അവർ കണ്ടെത്തിയത്​. വൈറസിനെതിരെ റെംഡെസിവിർ മരുന്ന്‌ ഫലപ്രദമെന്ന്‌ പ്രാഥമിക പഠനത്തിൽ തെളിഞ്ഞിരുന്നെങ്കിലും വാക്സിൻ കണ്ടെത്തുന്നത്​ വരെ നാം പൂർണ്ണമായും സുരക്ഷിതരാണെന്ന്​ പറയാനാകില്ലെന്നും ഗവേഷകർ ചൂണ്ടിക്കാട്ടുന്നു.