ആൾ ദൈവത്തിന്‍റെ കോവിഡ്​ മരുന്ന്​ കുടിച്ച മന്ത്രിയും പോസിറ്റീവ്​, ആശുപത്രിയിൽ

ശ്രീലങ്കയിൽ ആൾ ദൈവം നൽകിയ അദ്​ഭുത​ മരുന്ന്​ കുടിച്ച മന്ത്രി കോവിഡ് ടെസ്റ്റിൽ പോസിറ്റീവായി. കോവിഡ് തടയുന്നതിന്​ ശ്രീലങ്കൻ ആൾ ദൈവം തയ്യാറാക്കിയ മരുന്ന്​ പരസ്യമായി കുടിച്ച മന്ത്രിയാണ്​ രോഗം ബാധിച്ച്​ ആശുപത്രിയിലായത്​. സ്വയം പ്രഖ്യാപിത വിശുദ്ധനായ ധമ്മിക ബന്ദാരയാണ്​ കഴിഞ്ഞ മാസം കോവിഡിന്​ മരുന്ന്​ കണ്ടെത്തിയെന്ന വാദവുമായി രംഗത്തുവന്നത്​. തുടർന്ന്​ ഇദ്ദേഹം താമസിക്കുന്ന മധ്യ ശ്രീലങ്കയിലെ ഗ്രാമത്തിലേക്ക്​ ആയിരങ്ങൾ ഒഴുകിയെത്തിയിരുന്നു.

ഇതോടൊപ്പമാണ്​ ശ്രീലങ്കയിലെ വനിതാ-ശിശു വികസന മന്ത്രി പിയാൽ നിഷന്ത ഡി സിൽവ വിശുദ്ധന്‍റെ മരുന്ന്​ പരസ്യമായി കുടിക്കുകയും മറ്റുള്ളവരെ ഉപയോഗിക്കാൻ പ്രേരിപ്പിക്കുകയും ചെയ്​തത്​. ഇദ്ദേഹത്തോടൊപ്പം ശ്രീലങ്കയിലെ പല രാഷ്ട്രീയക്കാരും മരുന്നിനെപറ്റി പുകഴ്​ത്തി പറഞ്ഞിരുന്നു. ബന്ദാരയുടെ ഗ്രാമത്തിൽ നിന്നുള്ള മറ്റൊരു രാഷ്ട്രീയക്കാരന്‍റെ കുടുംബാംഗങ്ങളും മരുന്നുകഴിക്കുകയും പിന്നീട്​ കോവിഡ്​ പോസിറ്റീവാകുകയും ചെയ്​തിട്ടുണ്ട്​. ഹിന്ദു ദേവതയായ കാളിയാണ് മരുന്നിന്‍റെ സൂത്രവാക്യം തനിക്ക് വെളിപ്പെടുത്തിയതെന്നാണ്​ ധമ്മിക ബന്ദാര പറയുന്നത്​.

സർക്കാർ അനുകൂല മാധ്യമങ്ങൾ ബന്ദാരയ്ക്ക് വ്യാപകമായ പ്രചരണം നൽകി. തേനും ജാതിക്കയും ചേർത്താണ്​ മരുന്ന്​ നിർമിച്ചിരിക്കുന്നത്​. സംഭവം വിവാദമായതോടെ ഇതിൽനിന്ന്​ ഔദ്യോഗികമായി തലയൂരി സർക്കാർ അധികൃതർ രംഗത്ത്​ എത്തിയിട്ടുണ്ട്​. 'ചില പാർലമെന്‍റ്​ അംഗങ്ങൾ മരുന്ന്​ സ്വീകരിച്ചെങ്കിലും സർക്കാർ അത് അംഗീകരിക്കുന്നില്ല' -മാസ് മീഡിയ മന്ത്രി കെഹെലിയ റംബുക്വെല്ല പറഞ്ഞു. ശ്രീലങ്കയിൽ ഇതുവരെ 53,750 അണുബാധകളുണ്ടാവുകയും 270 പേർ മരിക്കുകയും ചെയ്​തിട്ടുണ്ട്​.