Begin typing your search above and press return to search.
exit_to_app
exit_to_app
ശൈഖ്​ ജർറാഹ്​: ​ഇസ്രായേലി അധിനിവേശം കണ്ണുവെച്ച ഭൂമി; താമസക്കാർ അൽനഖ്​ബ ഇരകളായ ഫലസ്​തീനികൾ
cancel
Homechevron_rightNewschevron_rightWorldchevron_rightശൈഖ്​ ജർറാഹ്​:...

ശൈഖ്​ ജർറാഹ്​: ​ഇസ്രായേലി അധിനിവേശം കണ്ണുവെച്ച ഭൂമി; താമസക്കാർ 'അൽനഖ്​ബ' ഇരകളായ ഫലസ്​തീനികൾ

text_fields
bookmark_border


മസ്​ജിദുൽ അഖ്​സയെന്ന മുസ്​ലിം വിശുദ്ധഭൂമിയോടു ചേർന്ന്​ നിരവധി മുസ്​ലിം കുടുംബങ്ങൾ വസിച്ചുപോരുന്ന ഒരു പ്രദേശം കൂ​ടി അധിനിവേശം നടത്താൻ ലക്ഷ്യമിട്ടുള്ള ഇസ്രായേൽ സൈനിക നടപടിയാണ് ഏറ്റവുമൊടുവിൽ ​ഫലസ്​തീനിൽ ചോര വീഴ്​ത്തിയിരിക്കുന്നത്​. വെള്ളിയാഴ്ച ജുമുഅ നമസ്​കാരത്തിനും അതുകഴിഞ്ഞ്​ പ്രതിഷേധത്തിനും സംഗമിച്ചവർക്കു ​നേരെയായിരുന്നു ഇസ്രായേൽ പൊലീസും സൈന്യവും ചേർന്ന്​ നരനായാട്ട്​ നടത്തിയത്​. 178 പേർക്ക്​ പരിക്കേറ്റ അതിക്രമത്തെ യു.എൻ അടക്കം സംഘടനകൾ കടുത്ത ഭാഷയിൽ അപലപിച്ചിട്ടുണ്ട്​.

അധിനിവേശ ഭീഷണിയിലുള്ള ശൈഖ്​ ജർറാഹ്​ പ്രദേശം മസ്​ജിദുൽ അഖ്​സയുടെ​ ഒരു കിലോമീറ്റർ പരിധിയിലാണ്​. സലാഹുദ്ദീൻ അയ്യൂബിയുടെ ​ഡോക്​ടറായിരുന്ന ശൈഖ്​ ജർറാഹ്​ താമസിച്ച ഭൂമിയെന്ന നിലക്കാണ്​ പ്രദേശത്തിന്​ ഈ പേരുവരുന്നത്​. 1948ൽ ഇസ്ര​ായേൽ അധിനിവേശത്തെ തുടർന്ന്​ ലക്ഷങ്ങൾ നാടുവി​ടേണ്ടിവന്നപ്പോൾ നിരവധി കുടുംബങ്ങൾ ഇവിടെ താമസമാക്കിയിരുന്നു. ഇവരുടെ പിന്മുറക്കാർ ഉൾപെടെ 38 മുസ്​ലിം കുടുംബങ്ങളാണ്​ ഇവിടെ താമസിച്ചുവരുന്നത്​. ഇതിനോടു ചേർന്ന്​ ജൂത കുടിയേറ്റങ്ങളും ധാരാളമായുണ്ട്​. കുടിയേറ്റം വിപുലമാക്കാൻ ഫലസ്​തീനികളെ കുടിയൊഴിപ്പിക്കുകയാണ്​ പദ്ധതി.

എന്നാൽ, ജറൂസലമിന്‍റെ നിലവിലെ ഭരണകർത്താക്കളായ ജോർദൻ സർക്കാർ എല്ലാ രേഖകളും നൽകിയതിനാൽ തങ്ങളെ പുറത്താക്കാനാകില്ലെന്ന്​ താമസക്കാർ പറയുന്നു. 38 കുടുംബങ്ങളിൽ നാലുപേരെ അടിയന്തരമായി കുടിയിറക്കാൻ നോട്ടീസ്​ നൽകിയിട്ടുണ്ട്. മൂന്നുപേരെ ആഗസ്റ്റ്​ ഒന്നിനും പുറത്താക്കും. അവശേഷിച്ചവരുടെ കേസുകൾ ഇസ്രായേൽ കോടതിയിൽ പുരോഗമിക്കുകയാണ്​. ശക്​തരായ ഇസ്രായേൽ കുടിയേറ്റ ഗ്രൂപുകളാണ്​ കേസുകളിൽ മറുവശത്തുള്ളത്​. അതിനാൽ, ജയിക്കാനാകില്ലെന്ന്​ ഫലസ്​തീനികൾ വിശ്വസിക്കുന്നു.

1967ൽ ജറൂസലം ഇസ്രായേൽ അധിനിവിഷ്​ട ഭൂമിയായി മാറിയശേഷം ശൈഖ്​ ജർറാഹിനുമേൽ ജൂത കുടിയേറ്റ സംഘങ്ങൾ അവകാശവാദം സജീവമാക്കിയിട്ടുണ്ട്​. ഇതിന്‍റെ തുടർച്ചയായി നൽകിയ കേസുകളിലാണ്​ ഫലസ്​തീനികളെ പുറത്താക്കുന്നത്​ തുടരുന്നത്​.

'വിശുദ്ധ താഴ്​വര' എന്ന പേരിൽ ​ശൈഖ്​ ജർറാഹ്​ ഉൾപെടുന്ന പ്രദേശം ഉൾപെടുത്തി കൂടുതൽ ജൂത കുടിയേറ്റ ഭവനങ്ങളും പാർക്കുകളുമുൾപെ​െട നിർമിക്കാൻ ഇസ്രായേലിന്​ നേരത്തെ പദ്ധതിയുണ്ട്​. ഇവക്ക്​ മുസ്​ലിം വീടുകൾ ഇവിടെനിന്ന്​ മാറണം. അതാണ്​ പുതുതായി സൈനിക നടപടിയിലേക്കും പ്രതിഷേധങ്ങളിലേക്കും കാര്യങ്ങൾ എത്തിക്കുന്നത്​.

അൽഅഖ്​സ മസ്​ജിദിന്​ തെക്കുള്ള സിൽവാനിൽ ബത്​ൻ അൽഹവ്വയിലുളള 87 ഫലസ്​തീനികളെ പുറന്തള്ളാൻ കഴിഞ്ഞ നവംബറിൽ ഇസ്ര​ായേൽ കോടതി അനുമതി നൽകിയിരുന്നു. ഇസ്രായേലിന്​ രൂപം നൽകിയ ബ്രിട്ടീഷ്​ സർക്കാർ ഭരിക്കുന്ന ഘട്ടത്തിൽ ഈ ഭൂമി ജൂതരുടെതാണെന്നായിരുന്നു അവകാശവാദം.

സമാനമായി ശൈഖ്​ ജർറാഹിൽ താമസിച്ചുവരുന്ന 24 ഫലസ്​തീനി കുടുംബങ്ങളെ പുറന്തള്ളാൻ 1982ൽ ജൂത കുട​ിയേറ്റ സംഘങ്ങൾ ആവശ്യവുമായി രംഗത്തെത്തിയിരുന്നു. 2002ൽ 43 ഫലസ്​തീനികളെ കോടതിയുടെ അനുഗ്രഹാശിസ്സുകളോടെ പുറന്തള്ളി ഭൂമി ജൂത കുടിയേറ്റക്കാർ ഏറ്റെടുക്കുകയും ചെയ്​തു. ഇതിന്‍റെ തുടർച്ചയായാണ്​ ഇസ്​കാഫി, കുർദ്​, ജാനോയ്​, ഖാസിം കുടുംബങ്ങൾ മേയ്​ ആറോടെ കുടി​െയാഴിയണമെന്ന്​ കോടതി ഉത്തരവിട്ടത്​. മറ്റു കുടുംബങ്ങളെയും ഇവിടെ കഴിയുന്ന കുടിയാന്മാരായാണ്​ ഇസ്രായേൽ കോടതികൾ കാണുന്നത്​. അതിനാൽ കേസുകളിൽ ഏതു നിമിഷവും കുടിയൊഴിപ്പിക്കാനുള്ള ഉത്തരവു വരുമെന്ന ഭീഷണി എല്ലാ കുടുംബങ്ങളിലുമുണ്ട്​. പ്രദേശത്തെ ഫലസ്​തീനി കുടുംബങ്ങളുടെ ഉടമസ്​ഥത തെളിയിക്കുന്ന രേഖകൾ ജോർദൻ വിദേശകാര്യ മന്ത്രി ഐയ്​മൻ സഫാദി കൈമാറിയിരുന്നു. അവ അവഗണിച്ചും 2020 മുതൽ ഇതുവരെ 13 കുടുംബങ്ങളെ കുടിയൊഴിപ്പിക്കാൻ കോടതികൾ ഉത്തരവ്​ നൽകിയിട്ടുണ്ട്​.

ഇവിടെ ഫലസ്​തീനികൾ നടത്തുന്ന സമരത്തിന്​ പിന്തുണയുമായി അധിനിവേശ വിരുദ്ധ ഇസ്രായേലി സംഘടനകളുമുണ്ട്​.

Show Full Article
TAGS:Sheikh Jarrah East Jerusalem neighbourhood Al Aqsa 
News Summary - Sheikh Jarrah explained: The past and present of East Jerusalem neighbourhood
Next Story