വിതരണക്കാരൻ ഓക്​സിജൻ എത്തിച്ചില്ല; പാകിസ്​താനിൽ ഏഴ്​ കോവിഡ്​ രോഗികൾ മരിച്ചു

ഇസ്​ലാമാബാദ്​: ഓക്​സിജൻ വിതരണം നിലച്ചതിനെ തുടർന്ന്​ വടക്കുപടിഞ്ഞാറൻ പാകിസ്​താൻ നഗരമായ പേഷവാറിലെ ആശുപത്രിയിൽ ഏഴ്​ കോവിഡ്​ രോഗികൾ മരിച്ചു. ശനിയാഴ്​ച രാത്രിയാണ്​ സംഭവം. വിതരണക്കാരൻ ഓക്​സിജൻ എത്തിക്കുന്നതിൽ വരുത്തിയ വീഴ്​ചയാണ്​ ദുരന്തത്തിൽ കലാശിച്ചതെന്ന്​ ഖൈബർ ടീച്ചിങ്​ ഹോസ്​പിറ്റൽ വക്​താവ്​ ഫർഹദ്​ ഖാൻ പറഞ്ഞു.

പേഷവാറിലെ രണ്ടാമത്തെ വലിയ ആശുപത്രിയാണിത്​. ഇവിടെ നിന്ന്​ 190 കിലോമീറ്റർ അകലെയുള്ള റാവൽപിണ്ടിയിൽ നിന്നുള്ള വിതരണക്കാരനാണ്​ ഇവിടെ ഓക്​സിജൻ എത്തിക്കുന്നത്​. സംഭവത്തിൽ വിശദമായ അന്വേഷണം നടത്താൻ ആശുപത്രിയുടെ ഡയറക്​ടർ ബോർഡിന്​ നിർദേശം നൽകിയിട്ടുണ്ടെന്ന്​ ആരോഗ്യ മന്ത്രി തൈമൂർ ഖാൻ ​​ഝഗ്ര പറഞ്ഞു. ഉത്തരവാദികൾക്കെതിരെ 48 മണിക്കൂറിനുള്ളിൽ നടപടിയെടുക്കും. സംഭവം സംബന്ധിച്ച എല്ലാ വിവരങ്ങളും പൊതുജനങ്ങളെ അറിയിക്കുമെന്നും ​അദ്ദേഹം പറഞ്ഞു.

24 മണിക്കൂറിനിടെ 58 പേരാണ്​ പാകിസ്​താനിൽ കോവിഡ്​ ബാധിച്ച്​ മരിച്ചത്​. ഇതുവരെ 8,361 പേർ മരിക്കുകയും 4,16,500പേർ രോഗബാധിതരാകുകയും ചെയ്​തിട്ടുണ്ട്​. പരിശോധന നിരക്ക്​ കുറവായതിനാൽ ശരിക്കുള്ള കണക്ക്​ ഇതിലും വളരെ കൂടുതൽ ആയിരിക്കുമെന്നാണ്​ വിലയിരുത്തപ്പെടുന്നത്​.