യമനിൽ വെടിനിർത്തൽ പ്രഖ്യാപിച്ച്​ സൗദി സഖ്യസേന

സൻആ: അഞ്ചുവർഷത്തിലേറെയായി യമനിലെ ഹൂതി വിമതരുമായി പോരാടുന്ന സൗദി-യു.എ.ഇ സഖ്യ സേന ഏകപക്ഷീയ വെടിനിർത്തൽ പ്രഖ്യാ പിച്ചു. പ്രാദേശിക സമയം വ്യാഴാഴ്ച ഉച്ച 12ന്​ ഇത്​ പ്രാബല്യത്തിൽ വരുമെന്ന്​ സൈനിക വക്താവ് കേണൽ തുർക്കി അൽ മൽക്കി അ റിയിച്ചതായി സൗദി വാർത്ത ഏജൻസി റിപ്പോർട്ട്​ ചെയ്​തു. വെടിനിർത്തൽ രണ്ടാഴ്ച നീണ്ടുനിൽക്കും.

യമനിൽ കൊറോണ വ്യ ാപനം തടയാനും രോഗപ്രതിരോധ പ്രവർത്തനങ്ങൾ ഊർജിതമാക്കാനും ലക്ഷ്യമിട്ടാണ്​ തീരുമാനം. സംഘർഷത്തിന് പരിഹാരം കാണാൻ യു.എൻ നടത്തുന്ന ചർച്ചകളിൽ പങ്കെടുക്കാൻ ഹൂതികൾക്ക് അവസരം നൽകും. അതേസമയം, ഹൂതികൾ ഇതേക്കുറിച്ച്​ പ്രതികരിച്ചിട്ടില്ല. എന്നുമാത്രമല്ല, വെടിനിർത്തൽ പ്രഖ്യാപനം വന്ന ശേഷവും ഹൂതി വിമതർ മിസൈലാക്രമണം നടത്തിയതായി റിപ്പോർട്ടുണ്ട്​.

വ്യോമ, കര, നാവിക പോരാട്ടം അവസാനിപ്പിക്കണമെന്നാവശ്യപ്പെട്ട്​ യമൻ സർക്കാറിനും സൗദി-യു.എ.ഇ സൈനിക സഖ്യത്തിനും ഹൂതികൾക്കും കഴിഞ്ഞയാഴ്ച യു.എൻ പ്രത്യേക പ്രതിനിധി മാർട്ടിൻ ഗ്രിഫിത്​സ്​ സന്ദേശം അയച്ചിരുന്നു. ഇതി​ന്റെ തുടർച്ചയാണ്​ വെടിനിർത്തൽ പ്രഖ്യാപനം. വൈറസിനെ പ്രതിരോധിക്കാൻ ആഗോളതലത്തിൽ വെടിനിർത്തൽ വേണമെന്നാണ്​ ഐക്യരാഷ്​ട്ര സഭയു​ടെ ആവശ്യം. 11 രാജ്യങ്ങളിൽ സംഘർഷത്തിലേർപ്പെട്ട കക്ഷികൾ ഇതിനോട്​ ക്രിയാത്മകമായി പ്രതികരിച്ചതായി യു.എൻ ജനറൽ ​സെക്രട്ടറി അ​േൻറാണിയോ ഗു​ട്ടെറസ് പറഞ്ഞു. ദേശീയതയോ വംശീയതയോ വിഭാഗീയതയോ ഇല്ലാതെ ലോകം ഒരു പൊതുശത്രുവിനെ അഭിമുഖീകരിക്കുകയാണെന്ന്​ ഗുട്ടെറസ് ചൂണ്ടിക്കാട്ടി.

2014 അവസാനം സർക്കാറിനെ വിമതർ അട്ടിമറിച്ചതുമുതൽ യമൻ സംഘർഷഭൂമിയാണ്​. ലക്ഷത്തിലധികം ആളുകൾ കൊല്ലപ്പെടുകയും രാജ്യത്ത്​ കടുത്ത പ്രതിസന്ധി രൂപപ്പെടുകയും ചെയ്​തിരുന്നു. കഴിഞ്ഞ 10 ദിവസത്തിനുള്ളിൽ മാത്രം 270ലധികം പേരാണ്​ ഇവിടെ കൊല്ലപ്പെട്ടത്​.