'യുദ്ധം വേണ്ട'; യുക്രെയ്​ൻ അധിനിവേശത്തിനെതിരെ ശബ്​ദമുയർത്തി റഷ്യൻ ടെന്നിസ്​ താരങ്ങൾ

മോസ്​കോ: സ്വന്തം രാജ്യം യുക്രെയ്​നിൽ അധിനിവേശം നടത്തുന്നതിനിടെ സമാധാനത്തിനായി ആഹ്വാനം ചെയ്ത്​ പ്രമുഖ റഷ്യൻ ടെന്നിസ്​ താരങ്ങൾ. ലോക രണ്ടാം നമ്പർ താരം ഡാനിൽ മെദ്​വദേവും ഏഴാം നമ്പർ താരമായ ആന്ദ്രേ റുബലേവുമാണ്​ യുദ്ധം വേണ്ടെന്ന്​ അഭ്യർഥനയുമായി രംഗത്തെത്തിയത്​.

'ഒരു ടെന്നീസ് കളിക്കാരൻ എന്ന നിലയിൽ ലോകമെമ്പാടും സമാധാനം പ്രചരിപ്പിക്കാൻ ഞാൻ ആഗ്രഹിക്കുന്നു. ഞങ്ങൾ പല രാജ്യങ്ങളിലും കളിക്കുന്നു. ഒരു ജൂനിയർ എന്ന നിലയിലും പ്രൊഫഷനൽ എന്ന നിലയിലും ഞാൻ പല രാജ്യങ്ങളിലും പോയിട്ടുണ്ട്. ഈ വാർത്തകൾ കേൾക്കുക അത്ര സുഖകരമല്ല'-മെദ്​വദേവ്​ പറഞ്ഞു.

ദുബൈ ടെന്നിസ്​ ചാമ്പ്യൻഷിപ്പിൽ നൊവാക്​ ദ്യോകോവിച്​ ലോക 123ാം നമ്പർ താരം ജിരി സെ്​ലിയോട്​ തോറ്റതിനാൽ മെദ്​വദേവ്​ ലോക റാങ്കിങ്ങിൽ ഒന്നാം സ്ഥാനത്തേക്ക്​ ഉയരാൻ പോകുകയാണ്​. ആൻഡി റോഡിക്കിന് (2004)​ ശേഷം, 'ബിഗ്​ ഫോർ' എന്നറിയപ്പെടുന്ന റാഫേൽ നദാൽ, റോജർ ഫെഡറർ, ആൻഡി മറെ എന്നിവരല്ലാതെ മറ്റൊരു കളിക്കാരൻ റാങ്കിങ്ങിൽ ഒന്നാമതെത്തുന്നത്​ ഇതാദ്യമായിട്ടാകും. ദ്യോകോവിചിനെ കീഴടക്കി മെദ്​വദേവ്​ കഴിഞ്ഞ വർഷം യു.എസ്​ ഓപണിൽ ​ജേതാവായിരുന്നു. എന്നാൽ ഈ വർഷം നടന്ന ആസ്​ട്രേലിയൻ ഓപണിന്‍റെ ത്രില്ലർ പോരാട്ടത്തിൽ നദാലിനോട്​ അടിയറവ്​ പറഞ്ഞു.

ദുബൈ ടെന്നിസ്​ ചാമ്പ്യൻഷിപ്പ്​ സെമിഫൈനൽ വിജയത്തിന്​ തൊട്ടുപിന്നാലെയായിരുന്നു​ ആന്ദ്രേ റുബലേവ് യുദ്ധത്തിനെതിരെ പ്രതികരിച്ചത്​​.​ ഹ്യൂബർട്​ ഹർകാസിനെ 3-6, 7-5, 7-6ന്​ തോൽപിച്ച ശേഷമാണ്​ കാമറ ലെൻസിൽ 'ദയവായി യുദ്ധം വേണ്ട' എന്ന്​ എഴുതിയത്​. സമാധാനത്തിലും ഐക്യത്തിലുമാണ്​ താൻ വിശ്വസിക്കുന്നതെന്ന്​ 24-കാരൻ മാധ്യമപ്രവർത്തകരോട് പറഞ്ഞു.

റഷ്യയിലെ നിരവധി കായിക താരങ്ങൾ യുദ്ധത്തിനെതിരെ നിലപാടെടുത്തു. യുദ്ധം വേണ്ട എന്ന അടിക്കുറിപ്പിൽ റഷ്യൻ ഫുട്​ബാൾ താരം ഫ്യോഡർ സ്​മോലോവ്​ വ്യാഴാഴ്ച കറുത്ത ചിത്രം ഇൻസ്റ്റഗ്രാമിൽ പോസ്റ്റ്​ ചെയ്തിരുന്നു.