റഷ്യൻ പ്രതിപക്ഷ നേതാവ്​ രാസായുധ പ്രയോഗത്തി​െൻറ ഇരയെന്ന്​ ജർമനി

ബെർലിൻ: അതി ഗുരുതരാവസ്​ഥയിൽ ചികിത്സയിൽ കഴിയുന്ന റഷ്യൻ പ്രതിപക്ഷ നേതാവ്​ അലക്​സി നവാൽനി രാസായുധ പ്രയോഗത്തി​െൻറ ഇരയാണെന്നും മിലിറ്ററി ആശുപത്രിയിൽ നടത്തിയ പരിശോധനയിൽ അദ്ദേഹത്തി​െൻറ ശരീരത്തിൽ നിന്ന്​ റഷ്യൻ രാസവസ്​തുക്കൾ കണ്ടെത്തിയെന്നും ജർമനി. റഷ്യൻ പ്രസിഡൻറ്​ വ്ലാദിമർ പുടിനെ പ്രതിസന്ധിയിലാക്കുന്ന ​വെളിപ്പെടുത്തലാണ്​ ജർമനി നടത്തിയത്​.

സോവിയറ്റ്​ യൂണിയൻ 1970 കളിൽ വികസിപ്പിച്ച രാസായുധമാണ്​ നവാൽനിയുടെ ശരീരത്തിൽ നിന്ന്​ ജർമനി കണ്ടെത്തിയത്​. നാഡി സംവിധാനത്തെ വളരെ വേഗത്തിൽ തകർക്കുന്ന ഇത്തരം രാസായുധങ്ങൾ വിമതർക്കെതിരെ റഷ്യ പ്രയോഗിക്കുന്നതായി നേരത്തെ ആക്ഷേപമുണ്ട്​. മുൻ റഷ്യൻ ചാരനെതിരെ 2018 ൽ ബ്രിട്ടനിൽ ഇത്തരം രാസായുധ പ്രയോഗം നടന്നിരുന്നു.

റഷ്യൻ പ്രസിഡൻറ്​ വ്ലാദിമർ പുട്ടി​െൻറ പ്രധാന വിമർശകനാണ്​ 44 കാരനായ അലക്​സി നവാൽനി. എന്നാൽ, തെരഞ്ഞെടുപ്പിൽ മത്സരിക്കാൻ പോലും നവാൽനിയെ പുടിൻ​ അനുവദിക്കാറില്ല. പുടി​െൻറ അനുയായികളിൽ നിന്ന്​ പരസ്യമായ ആക്രമണങ്ങൾക്കും നവാൽനി നേരത്തെ ഇരയായിട്ടുണ്ട്​. രാസവസ്​തു മുഖത്തേക്ക്​ എറിഞ്ഞതിലൂടെ നവാൽനിയുടെ ഒരു കണ്ണി​െൻറ കാഴ​്​ച നേരത്തെ നഷ്​ടപ്പെട്ടിരുന്നു.

കഴിഞ്ഞ മാസം റഷ്യയിലെ സൈബീരിയൻ മേഖലയിലെ ടോംസ്​കിൽ നിന്ന്​ മോസ്​കോയിലേക്കുള്ള വിമാനയാത്രക്കിടെയാണ്​ നവാൽനി അവശനിലയിലായത്​. വിമാനം ടോംസ്​കിലേക്ക്​ തന്നെ തിരിച്ചു വിടുകയും അദ്ദേഹത്തെ ആശുപത്രിയിൽ ​പ്രവേശിപ്പിക്കുകയുമായിരുന്നു. അന്നുമുതൽ അതിഗുരുതരാവസ്​ഥയിലാണ്​ നവാൽനി. മൂന്ന്​ ദിവസം ഇവിടെ ആശുപത്രിൽ കഴിഞ്ഞ അദ്ദേഹത്തെ അനുയായികളുടെ സമ്മർദത്തിനൊടുവിൽ ജർമനിയിലെ ബെർലിനിലെ ആശുപത്രിയിലേക്ക്​ മാറ്റുകയായിരുന്നു. ബെർലിനിലെ ആശുപത്രിയിൽ നടത്തിയ പരിശോധനയിലാണ്​ റഷ്യ ഉപയോഗിക്കുന്ന നാഡീ വിഷം നവാൽനിയുടെ ശരീരത്തിൽ കണ്ടെത്തിയത്​.

ചോദ്യങ്ങൾക്ക്​ ഉത്തരം തരാനും അവ്യക്​തത നീക്കാനും റഷ്യക്ക്​ ബാധ്യതയുണ്ടെന്ന്​ ജർമൻ ചാൻസ്​ലർ ആഞ്ചലാ മെർക്കൽ പറഞ്ഞു.

പുടി​െൻറ നിർദേശമനുസരിച്ച്​ ടോംസ്​കിലെ വിമാനതാവളത്തിൽ ചായയിൽ കലർത്തി വിഷം നൽകുകയായിരുന്നുവെന്നാണ്​ നവാൽനിയുടെ അനുയായികൾ പറയുന്നത്​. ശരീരത്തിൽ നിന്ന്​ രാസവസ്​തുവി​െൻറ അംശം കണ്ടെത്താതിരിക്കാൻ ആവശ്യമായ കാര്യങ്ങളാണ്​ ടോംസ്​കിലെ ഡോക്​ടർമാർ ചെയ്​തതെന്നാണ്​ കരുതുന്നതെന്ന്​ നവാൽനിയുടെ പത്​നി പറയുന്നു. പത്​നിയുടെയും അനുയായികളുടെയും സമ്മർദത്തിനൊടവിലാണ്​ നവാൽനിയെ ജർമനിയിലേക്ക്​ മാറ്റാൻ അനുവദിച്ചത്​.