രക്ഷാപ്രവർത്തനത്തിനായി യുക്രെയ്​നി​ലെ രണ്ട്​ നഗരങ്ങളിൽ​​ വെടിനിർത്തൽ പ്രഖ്യാപിച്ച്​ റഷ്യ

മോസ്​കോ: യുക്രെയ്​നിൽ കുടുങ്ങിയവരെ സുരക്ഷിതമായി പുറത്തെത്തിക്കുന്നതിന്​ താൽകാലിക വെടിനിർത്തിൽ പ്രഖ്യാപിച്ച്​ റഷ്യ. ഇന്ത്യൻ സമയം ഉച്ചക്ക്​ 12.30ന്​ വെടിനിർത്തൽ നിലവിൽ വരും. റഷ്യൻ വാർത്ത ഏജൻസിയായ സ്പുട്​നിക്​ ന്യൂസാണ്​ ഇതുസംബന്ധിച്ച വാർത്ത റിപ്പോർട്ട്​ ചെയ്തത്​.

മരിയുപോൾ, വൊൾനോവാഹ എന്നിവിടങ്ങളിലെ രക്ഷാപ്രവർത്തനത്തിനായാണ്​ വെടിനിർത്തൽ പ്രഖ്യാപിച്ചിരിക്കുന്നതെന്ന്​ റഷ്യൻ പ്രതിരോധ മന്ത്രാലയം അറിയിച്ചു. മറ്റ്​ മേഖലകളിൽ വെടിനിർത്തൽ ഉണ്ടാവുമോയെന്നതിൽ വ്യക്​തതയില്ല. വെടിനിർത്തലിന്‍റെ സമയപരിധിയെ സംബന്ധിച്ച്​ റഷ്യൻ അധികൃതർ പ്രതികരിച്ചിട്ടില്ല.

എന്നാൽ, ആറ്​ മണിക്കൂർ സമയത്തേക്ക്​ വെടിനിർത്തൽ ഉണ്ടാവുമെന്നാണ്​ പ്രതീക്ഷിക്കുന്നത്​. മരിയുപോൾ, വൊൾനോവാഹ എന്നിവിടങ്ങളിൽ കുടുങ്ങിക്കിടക്കുന്നവരെ ഒഴിപ്പിക്കാൻ മനുഷത്വ ഇടനാഴികൾ ഒരുക്കുമെന്നും റഷ്യൻ പ്രതിരോധ മന്ത്രാലയം അറിയിച്ചിട്ടുണ്ട്​. യുക്രെയ്​ൻ ഇതുവരെ ഇതുസംബന്ധിച്ച്​ പ്രതികരിച്ചിട്ടില്ല.

അതേസമയം, വെടിനിർത്തൽ ഇന്ത്യൻ വിദ്യാർഥികളെ ഒഴിപ്പിക്കുന്നതിന്​ സഹായകമാവുമോയെന്നത്​ സംബന്ധിച്ച കേന്ദ്രസർക്കാർ പ്രതികരിച്ചിട്ടില്ല. യുക്രെയ്​നിലെ സുമി, ഖാർക്കീവ്​ നഗരങ്ങളിലാണ്​ ഇന്ത്യക്കാർ കൂടുതലായി കുടുങ്ങിക്കിടക്കുന്നത്​. നേരത്തെ ഇന്ത്യക്കാരെ ഒഴിപ്പിക്കാനായി വെടിനിർത്തൽ പ്രഖ്യാപിക്കണമെന്ന്​ ​റഷ്യയോട്​ കേന്ദ്രസർക്കാർ ആവശ്യപ്പെട്ടിരുന്നു.