ട്രംപിനെക്കുറിച്ചുള്ള പരാമർശം: മിഷാരി അൽ അഫാസിയെ മുൻഗണനാ പട്ടികയിൽ നിന്ന് ഒഴിവാക്കി ഖുർആൻ ഡോട്ട് കോം

ലണ്ടൻ: ലോകപ്രശസ്ത ഖുർആൻ പാരായണ വിദഗ്ധൻ ശൈഖ് മിഷാരി റാഷിദ് അൽ അഫാസിയെ തങ്ങളുടെ വെബ്സൈറ്റിലെ പ്രാഥമിക പാരായണക്കാരന്‍റെ സ്ഥാനത്തുനിന്ന് ഖുർആൻ ഡോട്ട് കോം നീക്കം ചെയ്തു. തന്റെ ഔദ്യോഗിക സാമൂഹിക മാധ്യമ അക്കൗണ്ടിലൂടെ അദ്ദേഹം നടത്തിയ രാഷ്ട്രീയ പരാമർശത്തിന് പിന്നാലെയാണ് ഈ മാറ്റം ശ്രദ്ധയിൽപ്പെട്ടത്. അമേരിക്കൻ പ്രസിഡന്റ് ഡൊണാൾഡ് ട്രംപ് 'നരകവാതിലുകൾ തുറക്കും' എന്ന അർത്ഥം വരുന്ന അൽ അഫാസിയുടെ അറബിയിലുള്ള കുറിപ്പാണ് ചർച്ചകൾക്ക് വഴിവെച്ചത്.

ഈ കുറിപ്പിന് പിന്നാലെ ഖുർആൻ ഡോട്ട് കോം വെബ്സൈറ്റിൽ ഖുർആൻ കേൾക്കുമ്പോൾ ആദ്യം വന്നിരുന്ന അഫാസിയുടെ ശബ്ദം മാറ്റി പകരം മറ്റൊരാളുടേതാക്കുകയായിരുന്നു. അദ്ദേഹത്തിന്റെ പാരായണങ്ങൾ വെബ്സൈറ്റിലെ ശേഖരത്തിൽ ഇപ്പോഴും ലഭ്യമാണെങ്കിലും, തനിയെ പ്രവർത്തിക്കുന്ന രീതിയിലുള്ള മുൻഗണനാ പട്ടികയിൽ നിന്ന് അദ്ദേഹത്തെ ഒഴിവാക്കി.

ഈ മാറ്റത്തെക്കുറിച്ച് വെബ്സൈറ്റ് അധികൃതർ ഔദ്യോഗികമായ വിശദീകരണങ്ങളൊന്നും നൽകിയിട്ടില്ലെങ്കിലും, വിവാദ പരാമർശവും മാറ്റവും തമ്മിൽ ബന്ധമുണ്ടെന്നാണ് പൊതുവെയുള്ള വിലയിരുത്തൽ. ലോകമെമ്പാടും വലിയ ആരാധകവൃന്ദമുള്ള ഖാരിഅ് ആണ് മിഷാരി റാഷിദ് അൽ അഫാസി.